Agiri hau zortzi emakumek adostu eta sinatu dugu, zortziak Kote Cabezudoren biktimak eta “En el nombre de ellas” dokumentaleko partaideak. Dokumentala Disney+ España plataformak erosi zuen eta azkenik ez ematea erabaki du.
Lehenik Kote Cabezudoren eskuetan eta ondotik Ana Isabel Pérez Asenjo magistratuak ordezkatutako Justiziaren eskuetan jasan genuena dokumental batean kontatzeko erabakia prozesu izugarri traumatikoa izan da. Gutako gehienoi terapia eta tratamendu psikologikoa ekarri dizkigu, birbiktimizazio bortitzagatik. Hala ere, eta etorkizunean izan ditzakegun ondorioak gorabehera, dokumentalean parte hartzea erabaki genuen, geure buruaz haragoko erantzukizuna genuela ulertuta: egia ezagutua izatea, Kote Cabezudoren biktima diren beste emakumeei ahotsa jartzea, haiek ez baitute beste justiziarik izango ezpada gu entzun eta ikustea, lasaitua hartzea haiek ezin izan baitzuten salatu edo ez baitzuten jakin salatzen, eta bai haiek eta bai guk sufritu genuena ez dadin inoiz errepika.
Inoiz ez genioke prozesu honi aurre egingo gure abokatu Mario Diezen lan bikain, miresgarri eta titanikorik gabe, nahiz bere babes moralik gabe, hark aurre egin baitie alor judizialean jarri dizkioten traba guztiei. Ezinbestekoa izan da halaber Melchor Mirallesen lana, bera izan baita kazetari funtzioa bete duen kazetari bakarra, kasua ikertuz eta salatuz, diru publikoz bustitako gainerako hedabideek isiltasun deliberatua praktikatzen zuten bitartean, Kote Cabezudori babesa eman dion egiturarekiko konplize. Biek larrutik ordaindu dituzte beren eginbeharra asumitu eta betetzearen ondorio latzak.
Bi horien eskutik iritsi ziren Sr. Mono ekoiztetxea eta haren ordezkari Iñigo Pérez Tabernero, zeinari konfiantza osoa eman genion dokumentala egiteko. Dokumentalak Kote Cabezudoren haur pornografiaren eta sexu-abusuen istorio iluna azaleratu behar zuen. Kote Cabezudorena ez-ezik, haren jarduera kriminalean parte hartu, hura ahalbidetu edo haren emaitza kontsumitu zuten lagun boteretsuena. Hiru baldintza baino ez genituen ezarri:
- Dokumentalaren ekoizpenean egiten zen urrats bakoitzaren berri ematea Mario Díez gure abokatuaren bitartez eta, behin dokuseriearen atal guztiak amaituta, haiek ikusteko aukera eta gure onespena nahitaezkoa izatea.
- Egia osoa kontatzea, errealitate larri-larriaz ezer zentsuratu gabe, hain zuzen, epaitegietan 9 urteko instrukzioan zehar agerian jarri dena, eta gure abokatuaz gain Melchor Miralles kazetariak ere ezagun duena gure bitartez.
- Dokumentala bai ala bai ematea. Inork ez zezala erabaki dokumentala ez ematea, gu hura egiteko prozesu hagitzez mingarritik igaro ostean.
- Sr. Mono ekoiztetxeak 1. eta 2. konpromisoak beregain hartu zituen berehala. Eta 2021eko abenduaren 1ean, duela urtebete baino gehiago, prentsan argitaratu zen Disney+ plataformak
“En el nombre de ellas” dokumentala erosi zuela emititzeko. Disney+ plataformaren tamainako multinazional batek 3. konpromisoa onartuta, hala uste genuen behintzat guk, gu ere ausartu ginen, gu pasatutakotik pasatu ez den inork imajina ez ditzakeen lotsa, min eta beldurren gainetik.
2021eko abenduaren 1etik gaur arte hau guztia jakin dugu, denbora errealean:
- Disney+ek dokumentalaren kapitulu bakoitzaren aurregidoi guztiak ikusi eta onartu zituela.
- Disney+ek atal bakoitzaren azken muntaketa guztiak ikusi eta onartu zituela, egoki iritzi zituen aldaketak sartuz.
- Disney+ek trailer bat egin zuela eta dokumentalaren estreinaldia jendaurrean iragarri zuela 2022ko azaroaren 23an.
- Disney+ek kazetari eta influencer talde handi bati dokumentala osorik bidali ziola estreinatu baino bi aste lehenago.
- Disney+ek Mono produktorearengandik irizpen juridiko bat lortu zuela, dokumentalaren neutraltasuna eta legezko ekintzen xede izateko ia aukerarik eza ziurtatuz.
- Disney+ek sinatuta zeukala, demanda baten kasu gertagaitzerako, erantzukizuna Sr. Mono ekoiztetxearena izango litzatekeela.
- Disney+en lasaitasunerako, arrisku horren aurrean, Sr. Monok erantzukizun zibileko asegurua kontratatu zuela, inork dokumentalaren emisioagatik bide judizialetik lor zezakeen balizko kalte-ordaina baino 100 aldiz handiagoa.
- Azkenik, Disney+ek, inongo azalpen publiko koherenterik eman gabe eta Kote Cabezudoren biktimoi zuzendu ere egin gabe, dokumentala ez emititzea erabaki duela.
Horren guztiaren aurrean, “En el nombre de ellas” dokumentalean parte hartu dugun Kote Cabezudoren biktimok, honokoa adierazi nahi dugu:
A. Erabat traizionatuta sentitzen gara Disney+ España plataformaren eta Simon Amselem eta Vincent Sourdeau buruzagi nagusien aldetik, horiek baitira dokumentala ez emititzearen arduradunak, gure minarekin, duintasunarekin eta gure konfiantzarekin modu zital eta onartezinean jolastu dutenak.
B. Disney+ Españak iritzi publikoari gutxieneko azalpen sinesgarri eta koherente bat ematen ez dion bitartean, azalduz zergatik ez duten emitituko ekoitzi, iragarri eta kazetari eta influencerrei osorik bidali dieten dokumentala, Kote Cabezudoren biktimok konbentzituta jarraituko dugu Disney+ek atzera egin duela, hain zuzen, hiru hamarkadatan Kote Cabezudoren jarduera kriminal miserableak babestu zituen botere beragatik.
C. Sentitzen dugu Disney bezalako marka batek, haurtzaroari hain estu lotutako irudia saltzen duena, haur-pornografiaren eta sexu-abusuen biktima izan ginen neskatoei bizkarra ematea erabaki izana. Dokumentala emateari uko egiteak Disney kokatzen du hainbeste urtez jakinaren gainean beste aldera begiratzea erabaki zutenekin, bortxatzaile eta haur pornografoaren konplize isil eta estaltzaileekin.
D. Gure historia bai ala bai ezagutuko da. Ez gara jada Kote Cabezudok manipulatu eta hautsi ahal izan zituen haur eta nerabeak. Disney+ek ordezkatzen du gurekin jolasten den azken aldia. Dokumentala, Disneyk emititzeari uko egin dion bezalaxe, ikusi nahi duen orok ikusiko du oso laster. Simon Amselem eta Vincent Sourdeau gaiztakeriaren edo koldarkeriaren gainetik (haiek bakarrik dakite koldar bainoago gaizto ala gaizto bainoago koldar jokatu duten), jada ezeren eta inoren beldur ez garen emakume talde honen ausardia eta duintasuna gailenduko dira.
Donostia, 2022ko abenduaren 14a.
“En el nombre de ellas” dokumentalean parte hartu dugun Kote Cabezudoren zortzi biktima.
Krimen hauetan ere konplize gehiegi dagoelakoan nago, gradu desberdinetan parte hartzen dutenak, batzuek baita inkontzientzia aukeratuan ere. Nork dauka adorea egia osorik ikertzeko, esateko, entzuteko? Zipriztinduko gaituen beldur gara, akaso? Mafia kriminalaren garroak luzeak eta zabalak dira, eta zer esanik ez gure gizartearen zurikeria, hipokrisia eta zinismoa.
Zipriztinduko?
Ohartuko ote gara leporaino kaka honetan murgilduta gaudela!
Neri arreta gehien ematen didana zera da: “diru publikoz bustitako hedabideen” kontua.
Zeren ez baita kasu bakarra, baizik errepikakorra.
Horri oso larria deritzot:
SUBENTZIO BATEN TRUKE, GIZARTEARI TRAHIZIOA EGITEA baiteritzot.
“Lakra” larria euskal gizartearen bihotz-bohotzean.
Txalo bero bat eta besarkadarik handiena emakume talde honentzat. Bortxaketa eta abusu sexualen aurkako borroka luzea izaten ari da, baina erakusten ari zaretenez, sufrimenduez gain, kemenik ez da falta. Aurrera irabazi arte!