Enararen esanak

Aitorpena: idazketaz adierazteak

Idazketaz adierazteak norberaren ahalegin handiak eskatuz gero, saiatzearen porrota adierazi eginen du, eta, agian, ez du inork hori merezi eginen, baldin eta adierazi beharrezkoa ahoz eta bat-batean adierazteko gaitasunik ez badauka.

1

Fito Rodriguez

Idazlea. EHU eta UEU Filosofia irakaslea. Donostia

Idazketaz adierazteak
norberaren ahalegin handiak
eskatuz gero,
saiatzearen porrota adierazi eginen du,
eta, agian, ez du inork hori merezi eginen,
baldin eta adierazi beharrezkoa
ahoz eta bat-batean
adierazteko gaitasunik ez badauka.

Idazketaz adierazteak
zientzia edo filosofia
sortu lezake.
Zientziak badaki,
eta filosofia, berriz,
ez dakigunaren jakintza da.
Literatura, aldiz,
idazketaz adieraztea,
ez da filosofia
ezta zientzia ere,
beraz…

Idazketaz adieraztea
kultur ohituren ondorio
izaten da.
Errepikapenaren errepikapenak
ondoriorik gabeko idazkiak
izaten dira.
Idazten den guztia
behar ez diren burugabekeria
izaten dira
norbaitek beretu arte.

Idazketaz adieraztea
zerbaiten alde edo
zerbait azaltzeko baino
norbaiten aurka
egiten da beti,
nahita nahi ez.
Beraz,
aitor dezagun hurkoen aldean
baino areago
kontrako diren idazleengatik
idazten dugula.

Idazketaz adierazitakoa
eta aditutako guztia
ahazten denean,
geratzen den apurraz
idazten hastean,
orduan ari da
idazlea sortzen,
bakarrik, isilik eta
aurkako dituen
idazleen konpainian.

Idazketaz adierazteak
ahikorra dena,
iragankorra,
iraunarazten du.
Akitzen denari
balioa berrematen diona
da idazkia.
Esaterik ez dagoena
idazterik badagoelako

Idazketaz adierazteak
ematen duena
jakin behar da irakurtzen,
gozatzen.
Adieraren bidea
ez baitago adimenean,
gustuan baizik.
Esan ez diren
hitzenganako joeran,
isiltasunaren peskizan
kontrajarritasunean egosia.

Idazketaz adierazteak
irakurle saiatuen premia du,
idazle kontrarioa dena.
Hura gabe,
idaztea
zentzugabekeria litzateke,
erabateko bakardadean
testu esanguratsuenak
ekoitzi arren.

Idazketaz adieraztea
neurriz kanpoko hitzak
erabiltzea
izaten da beti.
Testuinguruz kanpoko
testuak erreskatatzea.
Urteen uretan,
naufrago izaten
eta
esanahiak higatuz
galdu dituzten
esaera itoak
izaten direnak.

Idazketaz adierazteak
ezin du
idazleak adierazi
nahi duena
guztiz burutu
baina
idazleak dauzkan
kezkei
helarazten
lagunduko dio.
Idazketaz adierazteak
gogamenaren aurretik
doa.
Idazketak ez baitu, soilik,
gertatutakoaren berri ematen,
idazleak berak
adierazi nahi duena
baino gehiago adierazten baitu,
idazten adierazten
saiatzen denean.

Idazketaz adieraztea
lehia
izaten da
gure adimen-jarrerentzat.
Batzuei
irabazten diegu,
beste batzuekin
berdindu eta
bakarren batekin
bat
egiten dugu.

Idazketaz adierazteak
bidezko hitzak
baino areago
balizkoak
aurkitzean
datza.
Edonor
engainatzeko
balio izanen direnak,
idazleari
izan ezik.

Idazketaz adierazteak
ez du esanahia
azaltzen bilatzen
hizkuntzaren
izaera lausoa
agerrarazten
baizik.

Idazketaz adierazteak
idazkiak sortzea da,
ez hitzak.
Hizketan dakienak
ez du
idazten jakin behar
ez eta irakurtzen
jakin ere.

Idazketaz adieraztea
kontzientziazko
egoera moldatu
bezain berezian
ulertu behar da,
idazteak
kontzientzia arruntetik at
aritzea eskatzen baitu.

Idazketaz adierazteak
idazkuntza saiakerak
behar ditu.
Egilearen eskubideak,
ordea, testuen balizko balioak
oinordetu arren,
idazleak ez duela oinordekorik
ezkutatu ohi du
eta
beraren ondarea,
saltzearen poderioz
etengabe
ahituz doala
lainotzen du.

“I. Aitorpena” testua, “Enararen Esanak” liburua, Fito Rodriguez, Dakit argitaldaria 23/09/2022

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Erantzun bat “Aitorpena: idazketaz adierazteak” bidalketan

Utzi iruzkina, izen eta abizenez

Azken artikuluak