Aiton-Etxe: ebidentziatan oinarrituta ez dute produktu esperimentala txertatuko

Duela egun batzuk oso ezaguna egin da nire herriko eguneko zentroa. Atzo adibidez baimenik gabe sartu ziren Tele5eko kamerak Aiton-Etxeren eremu pribatuan, eta egoitzako telefonoa eten gabe joka dabil: EITB, Antena 3, La Sexta,…

Zergatik? Bere egoiliarrak babestu, arduratsu jokatu eta gerta dakiekenaren aurrean inolako erantzukizunik ez izateko, zuzendaritzak Covid19 txertoa deitu duten hori eguneko zentroan banatzeari uko egin diolako, eta hartu nahi duten pertsonak herriko osasun zentrora bideratu dituelako.

Kontua da Aiton-Etxeko egoiliarrei gutun bana igorri zietela. Argudio ugari erabiliz, produktu horrek beraien ezaugarriak dituzten pertsonei (gaixotasun kronikoak dituztenak edota gaixotasun anitzak dituztenak, eguneko zentroan gehienak) onura baino kalte handiagoa eragin diezaiekela esaten du, eta beraz Covid19 txertoa deitu duten hori ez banatzeko erabakia hartu dutela jakinarazten diete. Era berean, produktu hori jaso nahi duten egoiliarrak herriko osasun-zentrora joan daitezkeela gogorarazten die gutunak.

Pfizer-Biontechek FDAra igorri duen dokumentuan oinarrituz eta txertoei buruzko ikerketak kontuan hartuz, honako argudioak aipatzen ditu gutunak produktu hau bere eguneko zentroan ez banatzeko:

1. Esperimentazio fasean dagoen produktua da (entsegu klinikoaren III. fasea).
2. Edozein txertok 4 eta 10 urteko ikerketa behar du eta hau ikertzen hilabete gutxi daramate .
3. Ez da indargabetutako birus batetik sortutako txertoa, orain artekoak bezala; txertoetan inoiz erabili ez den terapia genikoa darabilte oraingoan.
4. FDAk ez du txerto gisa baimendu produktu hau, larrialdi-erabilpenerako botika gisa baizik. Botikaren izena BNT162b2 da.
5. Botika honek bere formulazioan ez dauka inmunitate espezifikoa eta aktiboa eragin dezakeen antigenorik, ezta hildako edo indargabetutako mikroorganismorik edota mikroorganismoetatik eratorritako produkturik, ARNm SINTETIKOA baita.
6. Pfizer-Biontechen dokumentuan aipatzen diren ikerketak osasuntsu dauden pertsonekin egin dira, oraindik ez dago nahikoa esperientzia gaixotasun kronikoak dituzten edota gaixotasun anitzak dituzten pertsonekin (eguneko zentroan gehienak).
7. Epe ertain-luzerako albo-ondorioak ezezagunak dira, oraindik ezin izan baitira ikertu.
8. Epe motzean eragin ditzaken albo-ondorio larriak % 4,6koak dira.
9. Honelako erabakia hartzean, onura eta arriskuaren arteko erlazioa hartu behar da kontuan: kasu honetan ez dago frogatua botika honen onurak eragin ditzaken arriskuak baino handiagoak direnik.
10. Ikerketa aldi honen ostean, Pfizer-Biontechen dokumentuan aipatzen duten ondorioa honakoa da: “Arrazoizkoa dirudi produktua eraginkorra izan daitekeenaren ustea”.
11. Honegatik guztiagatik, eta erizaintza ikuspegitik informazio oso gutxi dagoela kontuan hartuz, zalantzazko da botika honen banaketak zein jasotzeak dituen arrisku/onurak. Horregatik erabaki dugu botika hau egoiliarrei ez banatzea eta segurtasun zein eraginkortasun arloan sor daitezken datuen zain egotea.
12. Hala ere, unea iristen denean osasun zentrora joateko aukera izango du nahi duenak.

Eta nik poza sentitu nuen Aiton-Etxeko egoiliarrei igorritako gutun informatibo hori irakurri nuenean. Gure artean pertsona ausartak geratzen direla jakitean harrotasun emozioa ere sortu zitzaidan. Zeren denak ez du balio. Eta denari baietz esateak edo itsuki agindu guztiak obeditzeak ondorioak ditu.

Kasu honetan, zuzendari honek ez du bere gain hartu nahi bere ardurapean dauden adineko pertsonei bere ustez bermerik ez duen produktu hori eskaintzearen ardura. Besterik gabe. Osasun sistema publikoa bada produktu horren banaketan interesa duena bere osasun zentroetan egin dezala eta bere gain har dezala ekintza horren ardura eta erantzukizuna. Puntu.

Zein da arazoa? Barazki eta frutak erostera barazki-fruta dendara bagoaz, arraina erostera arraindegira bagoaz, haragia erostera harategira bagoaz,…ez al da txertoak jasotzeko toki logiko eta egokiena osasun zentroa? Zergatik normalizatu da txertoak eskoletan edota osasun zentroak ez diren tokietan jasotzea? Edo erantzun zehatzagoak jasotzeko, zertarako bilakatu dira eskolak edota adinekoen zentroak osasun sistema publikoaren “sukurtsalak”?

Norbera da bere gorputzaren jabe bakarra. Norberak du bere gorputzaren subiratonasun osoa. Eta noski, bere osasunarena ere bai.

Eta zure ardurapean zaurgarriak diren pertsonak izateak, ez du esan nahi haien gorputzen eta bizitzen jabe zarenik. Ez du esan nahi erantzukizunik ez duzunik . Ez du esan nahi egiaren ordua heltzean, “goiko aginduak betetzen nituen” esatean errugabe izango zarenik.

Nire ustez pertsona honek egin duena ausardia ekintza izan da. Pertsona honek egin duena ekintza koherentea izan da.

Gustatuko litzaidake beren ardurapean pertsona zaurgarriak dituzten zuzendariek (adin-txikikoak, behar bereziak dituztenak, adinekoak,…) emakume honen jarrera arduratsua izatea eta beren ardurapean daudenentzako kaltegarriak edo zalantzazkoak izan daitezkeen aginduei maizago EZetz esatea.

Ezetz esatea eskubidea delako. Eta zenbaitetan betebehar morala.