Ttakun ttakun… baraualdia
Baraualdia, asebetean bizi izan dut.
Hori esanda ere, barauaren bizipenarekin gabezia, elikadura falta eta hutsaldia lotu daitezke. Ez da hala? Jatekorik ez, eta gorputzari ez ematea, ustez, behar duena, edo, hobe esanda, eskatzen duena.
Eta beherakada datorrenean, ahuldade eta nekea, gorputzaren noraezean bidaiatzea.
Ai ene! Horretan ematea egonaldiaren denbora, gorputza zigortzen eta gosea pasatzen…, ez ete da aldrebeskeria galanta? Holakoak entzun ditut batzuetan nire inguruan.
Uztaileko baraualdian bizi izandakoaren kontaketa xume bat egiteko gogoz, honela laburbildu ditut zertzelada batzuk:
- Barau sasoian, ura izan da lokarria, bizi-oinarria, energia-iturria. Ur garbiak elikatu gaitu, eta gorputzaren barruan alkimia berezia sortu du.
- Nahikoa izan da ur gozagarri hori etengabe eskura izatea, nahi beste edateko aukera izanda, gorputzaren ase ezina baretzeko, garbialdi sakona egiteko eta barruko korapiloak askatzeko, bide batez, arnas-bideak eta lixeriketako tutu-bideak nasaituz.
- Hauspoaren metafora izan liteke, edandako urak eragindako mozkorraldian, barneko sua hauspotu, sugarrak eta su biziaren zipriztinak goratuz, gorputzaren txoko guztietara zabaltzeko.
Eta horrela egon gara osasuntsu, indartsu, kementsu eta gogotsu. Suaren dantza, gauero. Kantetan eta olgetan, egunean zehar. Mokadu goxoenak dastatu ditugu gure egonaldian, barru-kanpoko bidaiak izan dira eguneroko menua. Ingurumarietako bazterrak gozatzeko txango ederrak, gai batzuen inguruan hausnarketa mamitsuak, erlaxatzeko ariketak, kantu eskola, gorputz-gogoa lasaitzeko eta zaintzeko aribideak, barre-algarak, irrintziak…
Eta ttakunak. Txalapartaren doinu jolasgarrietan, hegan eta jauzika. Hegaldian goraaaaaaaaaaaaa…
Bidaia horretan lagun batzuk batu gara, aske, libre eta independente. Taldekide izan gara, adiskide, solaskide. Lagun. Baraualdiko kide, mahaikide.
Burujabetzaren bidean, elkarrengana batuz, barealdia ospatu dugu taldekide Independentezaleok. Zuekin, pozarren, eta esker onez. Gora bihotzak!
Roxaaaaa, zein polita zu irakurtzea! Eskerrik asko.
Bai gooraaaa!
Aupa Roxa! Pozten naiz zu hemendik ikusteaz.