Repsolen ERREKA makroproiektu eolikoaz datu berri batzuk

Kaixo! Informazio honetan Repsolen “Erreka” makroproiektu eolikoari buruz datu berri batzuk bildu dira. Datu hauek “Anteproyecto Parque Eólico Erreka. MEMORIA GENERAL” (2024ko uztaila) eta “Proyecto de Prospección Arquelógica Superficial referente al Proyecto del Parque Eólico Erreka y su infraestructura de evacuación, en los términos municipales de Arano Y Goizueta” (2025eko urtarrila) dokumentuetatik ateratakoak dira. Honi dagokionean, dokumentu horietako orrialde hautatu batzuk eskaneatuta ikus ditzakezue atxikitako bi artxiboetan:

Atxikitako 1. Artxiboan:

• LUR-MUGIMENDUEN KOPURUA: “Resumen de Movimientos de Tierra” taulan ikusten denez, aurreproiektuan 2’8 MILIOI metro kubikotan zenbatzen da zentral eolikoaren obran egin beharreko lur mugimenduen kopurua. Hots: proiektuan kasik 1’7 milioi metro kubikoko indusketa lanak (“desmonte”) eta 1 milioi metro kubikoko betelanak (“terraplen”) egin behar direla aurrikusten da. Aurreproiektuaren taula berean, beste 138.000 metro kubikotan zenbatzen dira “lur begetalen” indusketa lanak (“Tierra vegetal”). Aurrikusitako lurren mugimendua 2’8 milioitik gorakoa da beraz. Lur-mugimenduen artean nabarmentzen dira:

“Caminos”: Sarbidearen eraikuntzan 1’6 milioi metro kubikotik gorako lur-mugimenduak aurrikusten dira. Kopuru hortatik, kasik 960.000 metro kubiko indusketa lanak dira (desmonte) eta 700.000 metro kubikotik gora betelanak (terraplen). “Plataformas”: Aerosorgailuak muntatzeko plataformen lur-berdinketak (esplanazioak) egiteko, guztira kasik 1 milioi metro kubikoko lur-mugimenduak aurrikusten dira. Kopuru hortatik, 685.000 metro kubiko indusketa lanei dagozkie (desmonte) eta 284.000 metro kubiko betelanei.

Oharra: Lur-mugimenduei dagokienean, bestalde, aipatu diren indusketa eta betelanen aurreko zifra horietan erreparatuz, ondoriozta daiteke 675.000 metro kubikokoa dela hondakindegietan botatzeko soberakinen kopurua (“volúmen de sobrantes destinados a vertedero” o escombrera, gazteleraz). Hori baita obrako indusketa lanek osotara duten 1.687.000 metro kubikoko bolumenaren eta betelanek osotara duten 1.012.000 metro kubikoko bolumenaren arteko diferentzia.    

• Aerosorgailu motaren ilustrazioa: guztira 199’5 metro altuera dute Repsolek jarri nahi dituen 15 aerosorgailuek. Hau da, 112 metroko euspen-dorrea eta 175 metro diametroko errotorea (85’7 metroko “aspak”).
• Muntaketa “plataformen” neurria eta eskema: guztira 183 metroko luzera eta 72 metroko zabalera hartzen duten triangelu antzeko lautada banatan kokatzen dira aerosorgailuak muntatzeko lan eremuak. Ondoren ikusiko dugunez, plataforma bakoitzak 10.000 metro karratuko lur-azalera hartzen du.
• Aerosorgailuen euspen “zapatak”: 25 metro diametroko zimentazioak.
• LURREN OKUPAZIOA (“superficie de ocupación”): Obrak zuzenean 434.000 metro karratuko lur-azalera okupatzen du aurreproiektuaren arabera. Sarbideen eraikuntza lanek kasik 284.000 metro karratu, eta “plataformek” 150.000 metro karratu inguru (hots, aerosorgailuen plataforma bakoitzeko 10.000 metro karratu). Zifra hauetan ez dira zenbatzen indusketa lanen 675.000 metro kubikoko “soberakinak” botatzeko nonbait sortu behar den hondakindegia (“escombrera”), ezta ebakuazio linea eraikitzeko lanen eta linea horren azpian gelditzen diren lurretan ezartzen den “segurtasun korridoreak” eragindako baso-mozketak ere.
• SARBIDEA: 2024ko aurreproiektuan Hernaniko Pagoagatik aurrikusten da sarbidea, 22 kilometro eta pikuko luzerarekin. Argazki aereo motako plano batean ikusten da Pagoagako Errotatik sartzen dela sarbidea mendialdera eta Sagarreta errekaren bailaratik gora doala. 2025ko Prospekzio arkeologikoen dokumentuan, berriz, sarbidea Urnietako Besabitik abiatuta planteatzen da, 27 kilometro eta pikuko luzerarekin.

Oharra: Esan beharra dago sarbide horiek 1.700-1.800 metro inguruko desnibela metatzen dutela aerosorgailu ezberdinetara heltzeko. Aurreproiektuan Pagoagatik marraztuta dagoen sarbidean erreparatuz, gutxi-gorabehera 1.020 metroko desnibela metatzen du goraka eta beste 830 metro beheraka. Prospekzio arkeologikoen dokumentuan Besabitik aurrikusitako sarbideak, berriz,  690 metro goraka eta 1.040 metro beheraka metatzen ditu. Izan ere, proiektuak kaltetzen dituen Adarra-Mandoegi mendilerroaren inguru hauek eta bereziki Pagoagako Etxola-Erreka bailararen arroa (zeina Olaberria, Urruzuno, Etxolaberri edo Kartola izenekin ere ezagutzen den) lurralde oso-oso menditsua da. Ingurune horretantxe, hain zuzen, REPSOLEN egitasmoarekin lehian sartu den beste zentral eoliko baten proiektua sustatzen du ENDESA enpresak ere.  

• Proiektatutako obraren aurrekontua: 102 milioi euro. Besteak beste: lur-mugimenduak 10 milioi, aerosorgailuak kasik 69 milioi, ebakuazio-linea 12 milioi…
• “Onura sozialak”:   Ikus 1. artxiboan “Imagen y Turismo” atalean inongo lotsarik gabe esaten duena!
• “Análisis económico-financiero”: Negozio energetikoaren alorrean, “Erreka” izeneko “parke” eolikoaren elektrizitarearen salmentari esker urtero 13’5 milioi euroko irabaziak kalkulatzen ditu Repsolek.  

Atxikitako 2. artxiboan:

EBAKUAZIO-LINEAREN XEHETASUNAK

• 2. Artxiboaren lehenengo 10 orrialdeak 2024ko aurreproiektuan jasotakoak dira. Bertan agertzen dira: Proiektuaren kokapenaren deskribapen labur bat, ebakuazio-linearen tentsio altuko dorre motaren ilustrazio bat (altuera 27 metro), eta ebakuazio linearen 4 plano (argazki aereoak): argazkietan ebakuazio-linearen trazadua marrazketa nahiko fin batekin agertzen da, baina inguru kaltetutak zein diren zehaztasun handiarekin kokatzeko nahikoa da. Hernani, Urnieta, Astigarraga, Errenteria eta Oiartzungo udalerrietan kaltetutako inguru batzuk honako hauek dira:
• HERNANIN: Ezioko Harkaitzak, Igarola Goikoa baserri aldea, Urruzuno, Katamotzarri,  Saratsain, Larregain, Epele (Labezarreta), Añua.
• URNIETAN: Etzubiko hegia, Altzusta, Katamotzarri.
• ASTIGARRAGAN: Atxurromendi, Ermañalde (Artolaborda), Bolaleku.
• ERRENTERIAN: Alperkabi (Egiluze), Bidagorri (Listorretatik behera), Xenpelarre.
• OIARTZUNEN: Suantza/Portugal, Olazaga, Urdakone, Matxilanda, Altzatxiki/Albiztur, Karrika (Bidasoro), Aroskenea, Zabalea, Ergoien (Txanpañe), Telleritxiki, Larremotxaborda, Markelainberri, Arkale (azpiestazio elektrikoa).
• ARANON: Prospekzio arkeologikoen dokumentuan, ebakuazio linearen lehenengo 2’5 kilometro inguruko zatia San Migel Sorotik abiatu eta Garagartza mendiaren Arano aldeko mendi-magalera lekualdatu dute, Epiñabar aldetik Gipuzkoa aldera sartzeko.
• Jarraian, 2025eko prospekzio arkeologikoen dokumentutik jasotako 7 orrialde doaz bigarren artxiboan: proiektuaren plano orokor bat eta ebakuazio linearen 68 dorreen koordenada geografiko zehatzak ematen dituen taula bat. 

HEMEN BI ARTXIBOAK deskargatzeko moduan:

BUKATZEKO:

Aipagarria da zenbait aldaketa egin dituztela 2024ko uztaileko aurreproiektuaren eta 2025eko urtarrilean Prospekzio arkeologikoak egiteko dokumentuan agertutako proiektuaren artean. Hauek dira:

• Sarbidea: Esan bezala, 2024ko aurreproiektuan Pagoagako Errotatik gora planteatzen da sarbidea, eta 2025ko Prospekzio arkeologikoen dokumentuan, berriz, Urnietako Besabitik.
•  Hiru aerosorgailuren kokapena aldatu eta beste bi apur bat mugitu dituzte: 2024ko uztaileko aurreproiektuan Pagoagako mendietan Antxistako Harria eta Azketaren artean aurrikusitako aerosorgailu bat, eta Aranoko mendietan Errekaleku azpitik San Migel Sorora doan bideko magal batean aurrikusitako bat (Unamene azpian), nahiz San Migel Soron bertan proiektaturiko aerosorgailu bat lekuz aldatu dituzte 2025eko urtarrileko Prospekzio arkeologikoen dokumentuan. Hiru aerosorgailu horietako bi Garagartza mendira lekualdatu dituzte (Arano eta Hernaniren mugan) eta hirugarrena Garagartzatik Pagalegira jeisten den hegian dagoen Larregi izeneko tontorrera lekualdatu dute (Hernani). Aipagarria da, bestalde, aurreproiektuan Merkuko gailur arrokatsuaren tontorrean (Pagoaga) aurrikusitako airesorgailua mendiaren magalera lekualdatu dutela, Etxolaberri eta Gibraltarretik Arantzizabal aldera jeisten den bidearen ondoan kokatuz. Halaber, aurreproiektuan Esteizako Puntan (Pagoagako mendietan) aurrikusitako aerosorgailua hamarnaka metro batzuk Esteiza eta Azketa arteko leporantz mugitu dutela dirudi. 
• Azpiestazio elektrikoa, 2024ko  aurreproiektuan Garagartza mendiaren gailurrean aurrikusten da, eta 2025eko Prospekzio arkeologikoen dokumentuan San Migel Sorora lekualdatu dute. Azken dokumentu honen arabera aerosorgailu bat planteatzen da Garagartzako gailurreko toki horretan.
•  Ebakuazio-linea: 2024ko aurreproiektuan, Garagartzako gailurrean aurrikusitako azpiestazio elektrikotik zuzenean Pagoaga aldera abiatzen da ebakuazio–linea, eta Oiartzungo Arkaleraino 19 kilometro eta piku eta 60 euspen-dorretako tentsio-altuko linea bat aurrikusten da. 2025eko Prospekzio arkeologikoen dokumentuan, berriz, San Migel Soron aurrikusten da azpiestazio elektrikoa, eta tentsio-altuko linearen lehenengo 2’5 kilometro inguru Garagartza mendiaren Arano aldeko mendi-magaletatik eta Epiñabarretik egiten ditu, ondoren Pagaoagako mendietara sartzeko. Ondorioz, Oiartzuneraino 21 kilometro eta piku eta 68 euspen-dorretako tentsio-altuko linea bat aurrikusten du. Gainerakoan, ebakuazio linearen trazadua Pagoagako Ezio menditik Gipuzkoa aldera eta Oiartzungo Arkaleko azpiestazioraino (konexio puntua) oso antzekoa da bi dokumentuetan (“korridore” berdin bat segituz egin dituzten aldaera batzuk gora-behera).

EDOZEIN ERATAN, DOKUMENTUETAN EMATEN DIREN DATUEK HERNANIKO PAGOAGA ETA ARANO INGURUAN REPSOLEK PLANTEATUTAKO ZENTRAL EOLIKOAREN NEURRI ITZELA ETA MENDIETAN ERAGINGO LUKEEN TXIKIZIOAREN TAMAINA ERAKUSTEN DUTE. JAIZKIBELGO SUPEPORTUAREN AURKARIEK ZIOTENEZ: EZ DEZAGUN GAL!

Agur!

Mikel (695715510 tlfnoa)