Pfizer paperak eta gizateriaren aurkako krimenak

Pfizer Paperak munduko leku ezberdinetan kokatutako 3.250 kide ezezagunen lanaren emaitza dira. Aparteko trebetasuna duten pertsona arruntena alegia, jatorri eta interes desberdindunak.

Daily Clout-eko Amy Kelly-ren gidaritzapean 2022tik aurrera burututako ikerketa proiektu zorrotz eta konplexu honek munduko erakunde handi eta ustelenetakoa, Pfizer, belaunikarazi zuen eta farmazeutika erraldoi horrek milaka milioi dolar galtzea eragin zuen. Era berean, munduko politikari boteretsuenen planak balakatu zituen eta enpresa teknologiko indartsuenen zentsura gainditu zuen.

FDAk epaileari eskatu zion Pfizerren dokumentuen argitaratzea 2096. urtera arte atzeratzeko

Aaron Siri abokatuak FDA (AEBko Elikagaien eta Drogen Administrazioa) 2021eko irailean auzitara eraman zuenean hasi zen dena, Pfizer Paperak argitaratzera behartu baitzuen horrek. Auzi horretan Siri Gardentasunerako Osasun Publiko eta Medikuntzako Profesionalak deituriko elkartearen ordezkaria zen. FDAk, ordea, auzi horretako epaileari Pfizerren dokumentuen argitaratzea 2096. urtera arte atzeratzeko eskatu zion (hilero 500 orrialde kaleratuz, alegia). Zorionez, epaileak uko egin zion FDAren eskaerari eta hilero 55.000 orri argitaratzera behartu zuen. Aztertutako materialak, guztira, 450.000 orrialde baino gehiago izan zituen, hizkuntza trinko eta teknikoan idatzitakoak.

Naomi Wolf kazetariak (izenburuko liburuaren editoreak) kezka azaldu zuen honen berri izan zuenean. Bazekien kazetari bakar batek ere ez zuela material honen bolumena prozesatzeko ahalmenik izango. Ezta txostenaren hizkuntza multidimentsionala (eta teknikoki espezializatua) ulertzeko behar den prestakuntza eta trebetasunik edukiko ere.

Wolfen ustez, Pfizerren agirietan esaten zen guztia ulertzeko, mediku eta zientzialariez gain, ezagutza ezberdinak dituzten partaideak beharko lirateke. Horien artean: gobernu eta farmazia-industriaren arautze-prozesuei buruzko ezagutza sakondun adituak, FDAren onespen-prozesua ulertuko luketen jakitunak, osasun-iruzur espezialistak eta azkenik, Paperetan zein delitu gauzatu ziren ulertzeko, abokatuak.

Zein izan zen Naomi Wolfen krimena? Emakumeak RNAm-dun injekzioak jaso ostean hilekoaren diserregulazioaz ohartarazten ari zirela informatzea

Naomi Wolf betidaniko demokrata ezaguna zen, Bill Clinton presidentearen aholkularia izan zen hauteskunde kanpainan eta Al Gorerena presidentetzarako kanpainan. 2021eko ekainean (Pfizerren dokumentuak argitaratu baino lehen), interneteko plataformetatik (Twitter, Facebook, YouTube, etab.) kanporatua izan zen. Zein izan zen bere krimena? Emakumeak RNAm-dun injekzioak jaso ostean hilekoaren diserregulazioaz ohartarazten ari zirela informatzea. Horren ondorioz, “antitxerto” eta “konspirazio teorikotzat” eraso zuten mundu osoan, eta bere “best-seller idazle-ospetsu-feminista” bizitza, komunikabide legalen barruan, bertan bukatu zen. Baina aurrera jarraitu zuen, eta bere deiadarra ordura arte pentsaezina zen aipatutako lantalde ausart eta erraldoia batzeko gauza izan zen.

Izenburuan aipatutako liburua lantalde garrantzitsu horrek argitaratutako bigarren txosten-liburua da izatez. Lehenengoa 2023an publikatutako War Room/DailyClout Pfizer Documents Analysis Volunteers’ Reports izan zen. Hirugarren bat ere datorren apirilean kaleratzeko asmotan daude: The Moderna Papers. Moderna’s Crimes Against Humanity.

Pfizerren dokumentuetako milaka datuen artean hauexek topa ditzakegu:

• Pfizerrek bazekien txertoaren osagaiak ez zirela sorbaldako deltoide muskuluan soilik geratzen, bozeramaile guztiek hala esan arren. Areago, 48 ordutan gorputz osoan barreiatzen ziren giza gorputzeko mintz guztiak zeharkatuz —odolaren eta garunaren hesia barne—, eta gibelean, adrenaletan, barean, garunean eta, emakumea izanez gero, obarioetan pilatzen ziren.
• Pfizerrek lanaldi osoko 2.400 langile kontratatu zituen konpainiaren Mundu mailako Segurtasun datu basean aurkezten ari ziren “gertaera kaltegarrien txostenen gehikuntza handia” prozesatzen laguntzeko.
• Pfizerrek 2021eko otsailaren 28rako jakin zuen —COVID txertoa gizarteratu eta laurogeita hamar egunera— bere injekzioa hamaika gertaera kaltegarri larrirekin lotuta zegoela. Eragin desiragaitzen artean hauexek zeuden, adibidez: heriotza (1.233 heriotza botikaren lehen hiru hilabeteetan), COVID-19 larria, gibeleko arazoak, gertakari kaltegarri neurologikoak (iktusak, dementziak, dardarak, Parkinsona, Alzheimerra, epilepsiak), industria-eskalako odoleko koagulu gertakariak (tronbosiak), bihotzeko arazoak (miokarditisa, perikarditisa, takikardia, arritmia), aurpegiko paralisia, giltzurrunetako kaltea, gaixotasun autoimmuneak, organo anitzen disfuntzioaren sindromea, herpes zosterraren aktibatzea, larruazal eta mukosetako lesioak, arnas arazoak, biriketako egituraren kaltea, arnas gutxiegitasuna, arnas aparatuko estres akutuaren sindromea eta SARSa (edo SARS-CoV-1, 2004tik munduan ikusi gabea, baina Pfizerren dokumentuetan injekzioen albo-efektu gisa agertzen dena).
• 2021eko martxoaren 12rako, Pfizerreko ikertzaileek ia plazebo kohorte osoa (txertatu gabea) txertatu zuten, nahiz eta Pfizerren konpromisoa txertatutako eta txertatu gabeko kohorteen jarraipena bi urtez egitekoa izan. Larrialdiko Erabilerarako Baimena jaso eta berehala, Pfizerrek FDAri presio egin zion txertatu gabeko kohorteari txertoa jartzeko arrazoi “humanitarioengatik”. Ondorioz, segurtasun ikerketak egiteko gaitasuna bertan amaitu zen.
• Pfizerrek 2021eko apirilerako bazekien injekzioek kalte egiten zietela gazteen bihotzei.
• Pfizerren txertoa publiko egin zenerako, farmazeutika erraldoiak bazekien umetokiko haurrak hilko zituztela eta emakumeen eta gizonen ugalketari modu beldurgarri eta jarraian kalte handia egingo ziotela. Izan ere, jaiotze-tasaren jaitsiera “nabarmena” gertatu zen hainbat herrialdetan txertaketa publikoa hasi eta bederatzi hilabetera (Europako herrialdeak, Britainia Handia eta Australia barne).
• Pfizerrek datu okerrak aurkeztu zizkion FDAri, plazeboaren taldean heriotza gehiago izan zirela erakutsiz (nahiz eta benetan kontrakoa izan).
• Haurrek eta hamabi urtetik beherakoek Pfizerren txertoa jaso zuten txerto pediatrikoa onartu baino zazpi hilabete lehenago, eta horren ondorioz iktusa, aurpegiko paralisia edota giltzurrun gutxiegitasuna bezalako albo-ondorioak eragin zituzten.
• Txertaketaren ondoren, paziente gazteenak minbiziekin agertzen hasi ziren; tumoreak handiagoak ziren eta populazioak masiboki inokulatu aurretik baino erasokorrago eta bizkorrago hazten ziren; minbizi ezberdinen aldi bereko agerpena ere ohikoagoa bihurtu zen.

Munduko indarrik boteretsuenak (gobernu, komunikabide, sare sozial, medikamentuen agentzia arautzaile eta elkarte profesionalik indartsuenak barne) Amy Kelly-k, ikerlari bolondresek eta Naomi Wolfek 2022tik mundura azalarazi zuten informazioa erreprimitzen saiatu ziren.

Ikerketa honetan parte hartu duten bolondres askok (egindako lan eskergaren truke sari ekonomiko edo profesionalen bat jaso beharrean) ostrazismoa, lan-galera, bazterkeria eta beste zigor batzuk jasan dituzte benetako zientzia eta medikuntzarekin nahiz egia azaleratzearekin hartutako konpromisoaren ondorioz.

Borrokak aurrera darrai. Gizateriaren aurkako krimen masibo hau egin duen inor ez dago kartzelan, ezta zigor zibil edo kriminalei aurre egiten ere. Gutxienez hiru auzi daude Pfizerren aurka AEBn, luze joko dutenak ziur aski. Baina, behintzat, egiaren beste zati bat kanpoan da.