ERREPRESIOAK EZ DEZALA PALESTINAREKIN ELKARTASUNA ETEN!
Palestinarekin Elkartasuna plataformak eta Donostiako Zinemaldiaren harira Zurriolako zubian ekimen desobediente bat egiteagatik epaituak eta La Vuelta txirrindulari lasterketan Irunberrin, Enekurin zein Bilboko helmugan Israel Premier Tech taldearen aurka protesta egiteagatik epaituak eta isunduak izango garen zenbait kidek errepresioari aurre egiteko kanpaina politiko eta ekonomiko bat abiatu genuen pasa den abenduaren 10ean.
2023ko urriaren 7az geroztik, Palestinarekiko elkartasun mugimendua indartzearekin batera, bere aurkako errepresioa areagotu egin da, bereziki Israelen konplize diren mendebaldeko herrialdeetan.
Izan ere, estatu genozidaren erasoaldi bortitzenaren aurrean, elkartasun mugimendu indartsu baten existentziak errelato sionista ez nagusitzeko arriskua dakarkie, eta hori ahalik eta gehien oztopatzeko interesa dauka mendebaldeko oligarkiak. Hala ere, elkartasunak eta antolakuntzak Israelen aurkako jarrera eta palestinar herriaren zein erresistentziaren aldeko iritzia nagusitzea lortu du herrialde askotan eta hainbat sektoretan.
Palestinar herriaren eta erresistentziaren aldeko mobilizazio eta borroka forma oro zilegia eta beharrezkoa da
Errelato eta zilegitasun-talkatik harago, gainera, elkartasun mugimenduok gure egunerokoa desnormalizatzea lortu dugu hainbat unetan, eta garaipenak erdietsi dira Israelen konplizeak zokoratzen. Euskal Herrian bertan, lortu dugu 2025eko apirilean Israel Premier taldeak Tech Lizarran ez parte hartzea, ekainean Donostian jokatzekoa zen junior mailako surf txapelketa bertan behera uztea Israelen parte hartzeagatik, Elitzur Ramla taldeak Gernikan ez jokatzea, Sestaoko Xake Txapelketan jokalari israeldarrek ez parte hartzea edota Sidenorrek eta AMC Mecanocauchok harreman komertzial batzuk bertan behera uztea. Bide horretan, sinbolo bihurtu da La Vuelta txirrindulari lasterketaren harira piztutako mobilizazio eta desobedientzia zikloa, Euskal Herrian indar handia hartu zuena eta Israel Premier Tech talde sionistaren desagerpena eragin duena. Azpimarratu nahi dugu palestinar herriaren eta erresistentziaren aldeko mobilizazio eta borroka forma oro zilegia eta beharrezkoa dela, ekintza zuzena eta desobedientzia barne.
Elkartasun-mugimenduaren aurrerapenaren aurrean, ordea, kaleak desaktibatzen saiatzen ari dira. Batetik, Trumpen planaren eta su-eten faltsuaren bitartez bakea dagoela sinetsarazi nahi digute, eta borroka jada ez dela beharrezkoa. Uste dugu komunikabide nagusiek ere paper garrantzitsua betetzen dutela protestaren baretze horretan. Bestetik, borrokatzen duenari errepresioz erantzuteko saiakerak ditugu. Kasu gogorrenak beste herrialde batzuetan eman dira, adibidez Britainia Handian Palestine Action taldearen ilegalizazioa eta 2.000 atxiloketatik gora taldeari elkartasuna adierazteagatik; Frantzian Urgence Palestine eta Palestine Vaincra taldeak legez kanpo uztea; Alemanian nazionalitatea lortzeko Israelen existentzia eskubidea aitortzearen baldintza jartzea…
La Vueltaren harira zazpi auzipetu eta hamarnaka isundu daude
Euskal Herria ere ez dago joera horietatik salbu. Hain zuzen ere, La Vueltaren harira zazpi auzipetu eta hamarnaka isundu daude: Irunberrin, Enekurin, Bilboko helmugan, Larrabetzun… Gainera, Zinemaldiaren testuinguruan ekimen desnormalizatzaile bat egiteagatik, gure kide bat epaitua izan da Donostiako Auzitegian. Israel Premier Tech taldearen aurkako protesta Irunberrin egin zutenek atzo izan zuten deklarazio judiziala eta urtarrilaren 14an pasako dira epailearen aurretik Bilboko helmugan atxilotuak izan ziren 3 kideak. Bestalde, Enekurin La Vueltako 11. etaparen hasiera oztopatzeagatik bost pertsonak 3.000 euroko isuna jasoko dute.
Instituzioen hipokresia agerikoa da. Diskurtsoak Palestinako genozidioaren aurkako hitzez eta Israelekin harremanen eteteaz bete badituzte ere, herri langilea izan da hori praktikan jarri duena. Orain, ordea, gobernuek Israelen eta bere konplizeen aurkako neurri efektiborik edota zigorrik hartu ez, eta haiek hitzez esandakoa ekintzez gauzatu dutenen kontra bidali dituzte poliziak eta auziegiak. Eta, beste herrialdeetan ikusi duguna baino bigunagoa izan arren, ezin dugu elkartasunaren aurkako errepresioa normalizatzen utzi, errepresioa bera gogortzeko baldintzak jarriko genituzkeelako. Kontrara, injustizia ororen aurka borrokatzeko baldintzak hedatzea izan behar da bidea.
Argi dugu errepresioa Israel eta sionismoa babesteko beste forma bat dela, ezin dugula normalizatzen utzi eta horren aurrean ere elkartasunez erantzun behar dugula. Denon garaipena izan da La Vuelta oztopatzea eta sionismoaren konplizeak seinalatzea. Orain, errepresioari denon artean erantzun beharrean gaude.
Errepresioa salatzeko eta kostu ekonomikoei aurre egiteko kanpaina bat abiaraziko dugu hurrengo asteetan. Hasteko, Donostiako Auzitegiaren aurrean bildu gara gure kideari babesa adierazteko eta bere aurkako epaia salatzeko. Era berean, dei egin dugu abenduaren 18an Irunberriko auzipetuei babesa adierazteko kontzentrazioan parte hartzera. Bestalde, hurrengo asteetan isunei eta epaiketen kostuei aurre egiteko material ezberdina salgai jarriko dugu eta crowfunding kanpaina martxan jarri dugu: labur.eus/isunduekin_elkartasuna.
Azkenik, dirua biltzeko egon daitezkeen bestelako ekimenei gure babesa adierazi nahi diegu, hala nola, Larrabetzuko ekintzaileen isunei aurre egiteko martxan jarritako ekimenari.
Egin bat kanpainarekin HEMEN
Eskerrik asko, Iñigo. Zigorrak oso handiak dira, eta poliziak asmatutako hainbat deliturengatik leporatzen dizkiguten eskaerak zentzugabekeria dira, 10.000 eta 60.000 euro bitartekoak. Horregatik, edozein laguntza eskertzen da, izua eragiten duten zifra horiek pixka bat arintzeko bada ere.