Ordainezina benetan

Gora zuok eta gora Independentea!!!

Aurten izan da nire lehen baraua eta Independentearen barau hirukoitzaren bitartez egin dut nire estreinaldia. Benetan ez nekien zein izango zen esperientzia eta, egia esan, zoragarria, hunkigarria eta bizipen sakonetakoa izan da. Alde batetik, gaur egun teknologiak eskatzen digun etengabeko arreta estresagarriari gustura egin diot baraua, inolako adikziorik gabe. Teknologiari dagokionez, erabiltzen dakidan arren, ni ez naiz batere mileniala eta gustura hartu dut hau. Erdarari egindako baraua ere zoragarria izan da. Bilbon euskaraz hitz egiten dudanean kanpotarra banintz bezala sentiarazten nauten aurpegiak ikusten ditut, ze hizkuntza hitz egiten dudan ere ez dakitelakoan begiratzen didaten aurpegiak, galdera ikur erraldoi bat aurrean duten aurpegiak, zortea izanez gero bakarrik “perdone no hablo euskera” esaten didatenak. Erdarari baraua, beraz, gozoki bat izan da. Norbera, txikitan bezala, beti euskaraz hitz egiten sentiarazten ninduena. Nire jatorrizko mundura bueltatu nauena. Ordainezina benetan.

Giro ezin hobean dena egin liteke

Janari barauari dagokionez esan behar dut osasun onurak ekarri dizkigula: minak gutxitu, gaitzak hobetu, gure elikaduraz sakonago hausnartu, norbere ondoeza jasaten ikasi eta oraindik ulertzeke ditudan onurak, denbora igaro ahala bakarrik etorriko direnak ere badaudela nabari dut. Hori bai, esan beharrekoa da janari baraua gogorra izan dela ni bezalako jatun amorratu batentzat, baina giro ezin hobean dena egin liteke. Elkarrengandik ikasi dugun guztia, elkar entzutea eta besteekin ikuspuntu ezberdinak elkarbanatzea inolako arazorik gabe, liskarrik gabe eta bihotzez, hori ezin daiteke nahikoa eskertu. Hain nengoen gustura, ez nuela bukatzerik nahi, nahiz eta horrek gosez jarraitu beharra esan nahi zuen.

Hunkituta joan nintzen, egia esan, oraindik hunkitu egiten naiz baraukideengan pentsatzean. Zenbat abestu, zenbat hitz egin, zenbat ikasi, zenbat esan eta zenbat entzun, zenbat begirada maitekor eta besarkada zintzo! Itzal jartzen ninduen handik joateak, badakidalako gauzak inoiz ez direla bardin errepikatzen, baina, Independentearen barne indarra ikusita, badakit hurrengoan oraindik hobea izango dela, geroz eta gehiago garelako Independentean zein Independentearen edozein jardueratan parte hartu eta gero eta hobeak, gozoagoak, maitekorragoak eta irekiagoak garenok. Eskerrik asko eta gora zuok eta gora Independentea!!!