Mundu ikusezina, sinesgaitza izatetik konexio egiaztagarria izatera

Bizitzak, behar dituzun egoerak, jendeak, gertakariak jartzen dizkizu bidean aurrera joateko; hori pentsatzen dut nik behintzat.

Julie Bonin eta haren ama Béatriceri buruz lehen aldiz hitz egin didatenean, kostatu egin zait bikote ezohiko honen inguruan kontatzeko dagoen guztiaz jabetzea. Telepatia, orakulua, mundu eterikoa, Bodhisattva eta beste kontzeptu ezohiko asko aztertu eta ulertu behar izan ditut, bi urte eta erdi zituela Juliek, txerto baten ondorioz, entzefalitisa pairatu zuenetik, Lapurdin bizi den familia horrek bizi duena azaltzen saiatzeko.

Hemen doa ohiz kanpoko ama-alaba hauei egindako elkarrizketaren lehen zatia.

BÉATRICE ETA JULIE BONIN AMA-ALABEI ELKARRIZKETA

J. I. — Béatrice, zure istorioa, zure familiarena, Julierena kontatzea galdegin behar dizut artikulu honen kokatzeko.

B. B. — Julie gure hirugarren alaba da; anaia eta arreba zaharragoak ditu aurretik. Bi urte eta erdi zituela, txerto baten ondorioz, entzefalitisa pairatu zuen. Garai hartan, ulertu nahian, diagnostikoen bila joan ginen; gaixotasun genetikoaren, eritasun autoimmunearen eta ziurtamenik gabeko halako hainbat pista, ziurtapen zientifikorik gabe hutsean gelditu ondoren, Tibeteko medikuntza ikasi zuen mediku batek txerto baten ondoriozko iktusa zela frogatu zuen. Sendagile horrek beharrezkoak ziren urrats guztiak burutu zituen, farmako zaintza erakundeak ofizialki onar dezan Julie txerto baten ondorioz entzefalitisaren biktima izan zela.

Ordutik aurrera, ulertu genuen eskaintzen zigutenaz gain beste irtenbide batzuk aurkitu behar genituela, jakinda eskaintzen zena honako hauetara mugatzen zela: “Ikusiko duzue, zuen haurrak ez du urtea gaindituko” edo “hobe da zuen alaba zentro batean sartzea eta ahaztea”. Halako jarrerak onartezinak ziren guretzat. Beraz, gure txikia ahalik eta gehien zaintzea aukeratu genuen, segundo bakoitza gozatzea eta gurekin gertu edukitzea.

Handik, beste irtenbide batzuk bilatu genituen beste herrialde batzuetan, Estatu Batuetan, Ingalaterran, Italian, etab. Aztertu genituen teknika eta terapien artean, DOMAN metodoa zegoen, Filadelfiako Giza Potentzialaren Institutuan. DOMAN metodo multisentsorial bat da, haurrari hutsetik hasteko aukera ematen diona, ariketa multisentsorialen bidez. Gero, NRT, Arnasketa Teoria Neurologikoa, arnasketa eta diafragma funtzioak berreskuratzeko sistema bat aurkitu genuen; beste teknika aurreratuagoak ere aurkitu genituen, medikuntza kuantikoa barne. Eta horrek guztiak Julieren bizitza salbatzea ahalbidetu zigun; atzerrian dauden metodo hauei esker, atzerakada eta endekapen prozesua alderantzikatu ahal izan genituen, baita Julieren maila fisikoan ere.

Juliek 29 urte bete ditu, mediku konbentzional eta ofizialek urtebeteko biziraupena eman ziotelarik

Pixkanaka ohartu ginen ere, Juliek aukeratu zuela bizitzako misio hau eta gu ere aukeratu gintuela. Hori ulertu ahal izan genuen gaur egun konexio bidezko adierazpide deitzen diogunari esker, Estatu Batuetan Facility Communication edo Pointing deitzen den metodoari esker hain zuzen ere. Julierekin komunikatzeko aukera eman zigun irakaskuntza honi esker, gure alabak adierazi behar zuen guztia ulertzen hasi ginen. Urrats izugarria izan zen hura. Hainbeste mezu zituen hedatzeko, 18 urte inguru zituela, nazioarteko sinposioak antolatzera bultzatu gintuela, ezgaitasunak dituzten haurrentzat. Hau da Julieren ondoan daramagun bidaia iniziatikoaren laburpen txiki bat, eta argi da Juliek jakitun handien pareko irakaspenak ekartzen dizkigula haren ondoan gaudenoi. Juliek 29 urte bete ditu 2025eko abuztuan, mediku konbentzional eta ofizialek urtebeteko biziraupena eman ziotelarik.

— Juliek komunikatzeko parada zuela jakitea urrats handi bat izan da.

Filadelfiako Giza Potentzialaren Institutura joan ginenean, txostenak ikusi eta bertan Pointing izenekoa praktikatzen zuten pertsonak ezagutu genituen. Australiatik datorren metodo bat da Facility Communication deitzen dena, haur mutuei edo autista edo desgaitu deituriko haurrei pantailan transkripzio bat sortzen duen teklatu baten bidez komunikatzea ahalbidetzen diena. Filadelfiatik itzuli ginenean, hemen norbait bilatu nuen ni trebatzeko eta han jasotako prestakuntza osatzeko; hor aurkitu nuen Marguerite Vexio anderea. Bere lehen ikasleetako bat izan nintzen eta ikastaro guztiak jarraitu nituen, eta horrek etxean, laster, metodoa erabiltzeko aukera eman zidan. Han, lehen praktikaldiaren lehen egunean bertan, Juliek, bere ordenagailuaren pantailaren aurrean eserita, oso hitz hunkigarri batzuk idatzi zituen, gure memorian grabatuta geratu direnak. Garai hartan, ez genuen benetan ulertu esanahia, baina gero, benetan ulertu genuen zer esan nahi zuen: Jainkoari eskerrak eman zizkion familia hau aukeratzen uzteagatik bere misioa jarraitzeko.

— Noiz ohartu zineten Julieren gaitasun eta dohain bereziez?

Juliek beti izan ditu bere dohainak; besterik gabe, erronka batzuk gainditu behar izan ditu eta guri gaindiarazi, bere dohainen hedadura uler genezan. Gaur egun, frogatu da momentu berean leku ezberdinetan egoteko dohaina duela, sendatzeko dohaina, iragarpen dohaina eta memoria Akashikoekin konektatzeko dohainak ere badituela. Norbait ezagutzen duenean, anitzetan, eskaneatzen du eta argi ikusten ditu bere iraganeko, oraingo eta etorkizuneko bizitzak.

Sinposioan hitzaldiak eman zituenean, argi ikusi nuen eraldatzeak eta sendaketak egiten. Haren aitzinean eszeptizismoa erakusten zuten aditu batzuei eskanerra egin eta inork asmatu ezinezko errealitate pertsonalak, intimoak kontatu zizkien, lehen aldiz ikusten zituenean, aho bete hortz utziz. Behin, gure lagun Gorka Etxarrirekin danbor xamaniko saio bat izan genuen eta, saio horretan, jendea sendatu zuen. Beste behin, Bosnia-Herzegovinako Medjugorje erromesaldi lekura joan ginen (1981ean Ama Birjinaren agerraldiak izan omen ziren bertan, geroztik erromesaldi leku ez ofiziala da) eta pertsonalki, zuzenean konektatu zen Ama Birjinarekin eta haren mezuak transmititu zizkigun. Beraz, zaila da bere dohain guztiak laburbiltzea, egunero berriak aurkitzen ari baikara oraindik. Gure lagunek dioten bezala, Bodhisattva bat da, orakulu bat, xamana bat, sendatzailea, denetarik pixka bat. Beraz, zaila da definizio bat ematea.

— Aipatu dituzun sinposioetan, zein dira adituek tratatu dituzten gaiak?

Desgaitasuna duten haurren alde zerbait egiteko asmoz, eguberriko azokak antolatzen hasi ginen laguntzaileen artean Lapurdi aldean. Elkartasun salmenta hutsa izatetik, desgaitasuna duten haurrei buruzko ikerketa sinposio izatera pasatu zen hitzordua.

2015 urtearen inguruan Biarritzen eta Pauen antolatu zientzia jardunaldi horietan, mundu osoko ikertzaile anitzek parte hartu zuten, baita Nobel saridunek ere, filosofoek eta idazleek, hala nola: Ervin Laszlo (UNESCOn aholkulari eta Zientzia, Arte eta Filosofiako nazioarteko akademietako kidea, Yale eta Princeton unibertsitateetako irakaslea etab.), James Redfield (Andeetako profezia liburuaren idazlea), Roger Nelson, (Princeton unibertsitateko ikerlaria, psikologia esperimentalean doktorea…), Masaru Emoto ikerlaria (Uraren mezu ezkutuak ikerketa eta liburu ospetsuaren egile), Don Ernesto Ortiz (idazlea, Memoria Akasikoak liburuaren idazlea…), Luc Bodin (mediku eta mintzaldi emailea), Bernard Werber (Les Fourmis saila idatzi duen frantses idazle ospetsua), Jose Rodrigues Dos Santos idazle kazetaria (La Formula de Dios liburuaren idazlea …) eta kontzientzia gaietan beste aditu eta aitzindari asko… Pertsona horiek ikerketaren ikuspegi desberdinak ekarri zituzten, medikuntzaren ikuspegi desberdinak, medikuntza mota desberdinak, guztiei eskaini dakizkiekeen terapia potentzialen ikuspegi desberdina. Ikerketa munduko aditu ospetsu bikainak izan genituen eta abangoardiako pentsamenduko ordezkariak ere bai, esango nuke.

urtebete generaman komunikazio erraztua praktikatzen, tokiko apezarekin teologiaz eztabaidatzen hasi zenean

— Nola bizi izan du hori guztia ama batek?

Deskribaezina da hitz egiten zuen haur bat izatetik, mutu gelditzen den haur bat izatera pasatzea. Azkenean haur horri berriro bere burua adierazteko aukera ematea, eta ez oinarrizko beharrentzako bakarrik, baizik eta burutik pasatzen zaizkion pentsamendu guztientzako ere, izugarria izan zen. Julie oso azkar joan zen, oso urrun; uste dut urtebete besterik ez generamala komunikazio erraztua praktikatzen, boluntario gisa bisitan etorri zitzaion tokiko apezarekin teologiaz eztabaidatzen hasi zenean. Bestalde, metodo hau, zoritxarrez, desitxuratu egin da denborarekin eta, horregatik, pixkanaka Juliek bultzatu gintuen gure eskola propioa eta gure metodo propioa sortzera, bere etika oso-oso zorrotzarekin, “konexio bidezko adierazpena” deitu genuena.

Duela urtebete, Juliek animatu gintuen Le Cercle Magique (Zirkulu Magikoa) liburua idaztera, teknika honen oinarriak aurkezten dituena, eta askoz gehiago egitera ere bultzatu gintuen, hau da, berak hizkuntza unibertsala, bihotzaren hizkuntza deitzen duen horretara iristeko eta denak elkarren artean berriro konektatzen ikastera bultzatzeko, gure izatearekin berriro konektatzera, naturarekin, osotasunarekin berriro konektatzera. Horregatik sortu zen azken liburua, Connexions izenekoa, konexioaz, konexioaren bidezko adierazpenaz, hizkuntza unibertsalaz eta berak Holasfera deitzen duen gizatasun berriaz hitz egiten duena.

(Jarraituko du).