Krisi ekologiko eta sozial larri baten aurrean gaude, eta horrek aldaketa nabarmenak ekarriko ditu gure bizimoduan. Industria, erakundeak eta alderdi politikoak ados jarri dira energia-trantsizioko eredu bakar batean, konponbide gisa. Horrek, gure premiei erantzun beharrean, honaino eraman gaituzten mekanismo berberetan sakontzen du, praktikan, trantsizio berde eta digitalaren diskurtso korporatiboaren pean, era guztietako azpiegituren garapen itsura mugatuz. Beste batzuetan bezala, krisiari erantzuteko erantzukizuna banatzen da, baina mozkina inbertsio-funts handien eta horien sustatzaileen eskuetan mantentzen da, ingurune naturalak suntsitzen dituzten bitartean.
Lurraren defentsan, Euskal Herria Bizirik, esperientziak partekatzeko eta jasaten ari garen gehiegikeriari erantzuteko agertu diren talde eta erakundeen mobilizazioa errazteko sortu da, batez ere landa-eremuetan. Egin nahi duten espoliazioa maila guztietan eta modu deszentralizatuan salatu behar da. Hori dela eta, maiatzaren 26an Enkarterriko (Bizkaia) Kolitza gailurrera lehenengo mendi martxa deitzen dugu, Balmasedatik abiatuta.
Euskal Herrian mendira igotzea tradizio herrikoia da, askotan haurtzarotik familia-ingurunean txertatzen dena. Hala ere, une honetan gure mendiak industria makro-eolikoaren mehatxupean daude. Industria horrek, onuraren logikan, eta diskurtso berde faltsu batean oinarrituz, gure mendilerro eta gailurrak konkistatzeari ekin dio, monopoli-taula bat balitz bezala.
Gure gailurren zeruertz aldaezina betiko alda daiteke 200 metro baino gehiagoko altuera duten turbinak instalatuz gero, horrek dakartzan goi tentsioko lerro, pista, zarata, flora eta faunaren gaineko eraginak kontutan izanda… Euskal Herrian 150 poligono berri baino gehiago jartzea aurreikusita dago, hau da, ia kordal guztiak eta balio handiko beste lursail batzuk industrializatzea. Kolitza ingurua da horietako bat. Gure mendiak dira, gure haurtzarokoak, gure arbasoenak eta gure ondorengoenak. Ondasun sakratua da, eta ezin da eman aurrerapen faltsu baten izenean, gutxi batzuei bakarrik mesede egiten diena.
ETORRI MAIATZAREN 26KO MOBILIZAZIORA
Bizitzaren eta lurraren defentsan,
MAKRO BERRIZTAGARRIAK EZ HEMEN EZ INON
Lurraren defentsan Euskal Herria Bizirik Sarea
