Hitz egiteko gaitasunik ere ez duten jaioberriak iritzirik gabe ikasteko eta irensteko prest datoz, begiak handi eta belarriak adi. Ikasteko irrikan haziko dira.
Senak eragingo digu edukiz hutsik datozen garun horietan mundua ulertzeko kodeak sartzeari eta bizitzeko tresnak kokatzeari ekitea, betiere dugun denbora eta gogoaren arabera. Geuk baino hobeto egingo duten profesionalei utziko diegu horren ardura albait azkarren, geure borondatez edo kontra, haurrak ez omen direlako geureak, gizartearenak baino. Gizartea norena ote den, ja, ez dago hain argi. Eskolaren garaipenik handiena ikasmina zapuztea izango da eta Jakintza pasiboki jasotzeko heztea.
haurrak ez omen direlako geureak, gizartearenak baino. Gizartea norena ote den, ja, ez dago hain argi
Gaztetan, haien burua amueblatzen jarraituko dugu denbora luzez, gaztaroa ondu, mindu eta antzutu arte, gazte. Adimena erabat formateatu artean heldugabetzat hartuko ditugu, karrera delako bide bakarra. Noranzko lasterketa ote den ondo jakin gabe ere, buruan altzari gehien sartzen dutenak kokatuko dira ondoen sisteman.
Bizitzan aurrera, altzari osagarriak bilatu behar dira. Bururatutako altzari zahar batzuk pipiak jota egongo dira ordurako eta IDEA* altzariekin ordezkatzen joango dira. Han, kolore eta estilo guztietako ideiak erosi ahal ditugu, modara, merke eta erosoki janzteko geure buruko gela guztiak, internetez ere bai, besaulkitik mugitu beharrik gabe.
Behar bada, altzari zahar dotoreak ere zaharberrituko dizkigute adituek, burujantziari dotoretasuna eransteko. Ordaintzeko nahiko dirurik izan ezean, klasiko estiloko kartoizko altzari serioak ere bururatu ahal izango ditugu.
Ideologiak beharko ditugu ideiak talka handirik gabe antolatzeko. Hutsune guztiak ondo beteko dira gogoetarako lekurik gabe gelditu arte
Horrela beteko dugu burua ideiaz. Ideologiak beharko ditugu ideiak elkarrekiko talka handirik gabe antolatzeko. Hutsune guztiak ondo beteko dira gogoetarako lekurik gabe gelditu arte, pentsatzen hasiko bagina altzariak desorekatuko litzaizkigukeelako, anabasa mentalera amilduz. Jada beteta dagoen buruan ez baita ezustetarako txokorik komeni.
Burua gela desberdinetan antolatuko dugu, bakoitza bere estiloan eta, hain beteak izango ditugunez, ez da argirik pasako batetik bestera. Gela batzuk ideologizatuak eta besteak praktikoagoak izango dira, adibidez: Harrera gela koloretsua izan dezakegu ukitu etnikoekin, Langelan esportaziorako armak, Jangelan mikrohuhin labea eta Globo-ko katalogoa, Ametsgelan paisaia berdeak, Txindokin edo Anboton artalderen bat eta bidezko mundu zoriontsua iradokitzen duten irudiak, Egongelan telebista erraldoia kirol fetitxez inguratuta eta igurtziak ematen dituen sofa, komunzuloan Trump edo uneko beste pertsonaia gaiztoren bat. Gela eredu sorta zabala dago aukeran eta, zalantzatientzat, algoritmoen bingoa.
Altzarien etiketek adieraziko dute nor garen. Etiketarik garrantzitsuena lanbidea edo titulazioari dagokiona izango da, titulazio nobiliario zein unbertsitario: -Ni doktorea naiz- edo arotza, edo esne-behia, janzakurra, loritoa… Beste etiketa osagarriekin eraikiko gara: nazioa, sinismen materialista edo erlijiosoak, ezker edo eskumaranzko zintzilikarioa, apeta sexualak, kirol zaletasunak…. denen artean osatuko da geure Nortasuna.
Behin burua garatuta, dorrean gotortu eta zirrikituak ondo zigilatzea komeni da geure buruaren errepublika askean zalantza haizerik sar ez dadin, ezta trinkotasuna zulatuko duen pipirik ere. Adituen* esku utziko dugu berrikuntza oro, altzari horien iraungitzea bizkorra delako. Atzean geratu dira belaunaldiz belaunaldiko balore sendoen transmisio garaiak.
etiketek adieraziko dute nor garen. Etiketa garrantzitsuena lanbidea edo titulazioari dagokiona izango da
Pantaila, betaurreko eta belarritakoetatik, irudiz eta zarataz betetzen dugu burua, isiltasunean bizi delako hutsune beldurgarria. Kremaz koipeztatzen dugu larrua, poroetatik ere eguzki izpi arriskutsurik sar ez dadin. Lurrinez ordezkatzen geure usaina, besteek antzeman ez gaitzaten. Solas homologatuetara mugatzen gara eta, noski, beeeti kondoia jantzita, kondoi existentziala baita babes neurririk egokiena. Barrenak ere mikroplastikoz kondoitzen ari gara.
Kondoi existentziala behar da erraiekiko entzungortzeko; izan ere, hesteek ez dute buruaren egitura zurrundua liseritzen eta bihotzaren taupadek altzarien markoak lasaitzen dituzte kolpez kolpe. Bai erlijio zaharrak, bai zientzia berriak, biek argi ohartarazten gaituzte haragiaren arriskuez, Jakintsuen obedientziatik sena garaitu beharraz. Bizimina minbizitzea baita progresoa.
Kondoi existentziala behar da erraiekiko entzungortzeko, hesteek ez baitute buruaren egitura zurrundua liseritzen
Kaskezur gogorrean garun biguna bizi da, burmuinaren fosilizazioak ondoeza eragiten digu, izan nahi duguna eta garenaren arteko talka; horrek gaixotu egiten gaitu. Arintze aldera, drogetara jotzen dugu, alkohola edota ludopatiara, baina aringarri horietara gehiegi joz gero gaitza korapilatu egingo da eta adituen laguntza beharko dugu. Jakintsuek industriaren joeren arabera etiketatu eta medikatuko gaituzte, ezinegona anestesiatuz eta gurpil zoroa handituz.
Horrela helduko gara garapenera, garau ganorabakoak izatera, izan ginen haurra argazki samurren batean momifokaturik.
Artikulu hau Iñaki Segurola zenaren eraginpean idatzia dago, haren baimenik gabe.
Zein errealitate tristea kontatzen diguzun, Asier! Ez zaizu koma bat falta, ezta soberan ere, eskerrik asko!
Onaaa, Asier. “Burua ondo amueblatuta duzu” esamoldea beste begi batzuekin ikusten da orain, jajaja. Zeozerengatik bilatzen zuen Oteitzak Hutsunea, bazekien zerbait akaso, eta ziur egon gaitezke Iñaki Segurolak ere bazekiela zerbait horri buruz.