Herribiltza

Herribiltzaren udako topaketak, astelehena 8tik igandea 14ra

Frantziar eta Espainiar estatuen konstituzioek eta oinarrizko legeek euskal herritarren, frantziarren, espainiarren eta munduko herritarrengan eragiten duten egoera sozial eta ekologiko kezkagarriaren aurrean, hauteskundeetan irabaziz ere estatuen menpe diren instituzio politikoen barnetik euskal herritarron nahi eta beharrak asetzea ezinezkoa denez, Herribiltza, Euskal Herritarren Biltzarren Elkargoa, eraikitzen ari da.

1

Irati Mujika Larreta

Ama. Burujabetzaren alde. Aramaixo

Jarraian doaz www.herribiltza.eus web orrian eskuragarri diren Herribiltzaren udako topaketen antolaketa, egitarau zehatz eta eztabaiden oinarri teorikoak:

Topaketetan parte hartzeko, [email protected] helbidean ahal bezain goiz izena ematea komeni da, zein egunetan joateko asmoa den zehaztuz.

Web gune berean Herribiltzaren, Euskal Herritarren Biltzarren Elkargoaren, aurkezpen idazkiak irakur daitezke:

Zergatik eta zertarako Herribiltza eraiki?

Independentzia eraikitzen!

Frantziar eta Espainiar estatuen konstituzioek eta oinarrizko legeek, eta ondorioz beren instituzio politiko guziek, tartean Herriko Etxeek eta Udalek, Ipar Euskal Herriko Hiri Elkargoak eta Euskadiko eta Nafarroa Garaiko autonomiek, euskal herritarren, frantziarren, espainiarren eta munduko herritarren egoera sozial eta ekologiko kezkagarria eragiten dute; bereziki eragiten dute:

  • herritarrak egiazki erabakitzaileak ez izaitea;
  • genero ezberdinetako jendeen botere ezberdintasuna;
  • esplotazioa eta langileen pobrezia;
  •  hizkuntza guttituen desagerpena.

Egoera kezkagarri hori eragiten duten oinarrizko legeak aldatzea estatuen bortizkeriak eta izaera antidemokratikoak ezinezkoa egiten dutenez, estatuen menpe diren instituzio politikoen barnetik euskal herritarron nahi eta beharrak asetzea ezinezkoa da, hauteskundeetan irabaziz ere.

Gauzak hola, gure nahi eta beharrak asetzeko, euskal herriaren konstituzioak eta legeek arautuko dituzten instituzio politiko burujabeak gu haurek eraiki behar ditugu, erabakitzeko ahalmena herritarron eskuetan izaitea bermatuko dutenak, eta Frantziar eta Espainiar estatuengandik independenteak izango direnak.

Herritarrak egiazki erabakitzaileak izaiteko, instituzio politikoak herritarren biltzar burujabeak izan behar dira. Horretarako, Herribiltza, Euskal Herritarren Biltzarren Elkargoa, eraikitzen ari gira.

Herribiltza zer da?

Herribiltza

Herribiltza, Euskal Herritarren Biltzarren (batzarren, asanbladen) Elkargoa (federazioa), euskal herritarron biziei buruz erabakitzeko boterea egiazkiz gure eskuetan izaitea bermatu nahi duen Euskal Herri osoko erakundea (instituzioa) da, egiazko demokrazia bermatu nahi duena beraz.

Herribiltzan edozoin hizkuntza erabil daiteke, baina lehentasuna eta nagusitasuna euskarari emaiten diogu.

Oinarrizko Biltzarra, herri, auzo, eraikin edo karrika baten auzotar hamarkada batzuek osatzen dute. Biltzarrak, auzotar adingabe bat noiz biltzarkide bilakatzen ahal den erabakitzen du.

Biltzarran, kideen biziei, beharrei, nahiei, pozei, bihozminei eta arazoei buruzko eztabaidak egiten dira, eta biziko arlo guzietan gure nahiak eta beharrak gu haurek asetzeko, ekintza politiko, poetiko, ekologiko, sozial, kultural eta ekonomikoak gauzatzeko erabakiak hartzen dira.

Biltzarrak, biltzarkideen arteko adostasuna lortzeko ahaleginak egiten ditu. Lortzen ez duelarik, erabaki bat biltzarkide guziei behartzeko, erabakiak guttienez esku hartzaileen bi herenen onespena behar du.

Biltzarrak, bere erabakiak gauzatzeko, nahi duten biltzarkideei egin behar zehatzak agintzen dizkie. Egin behar zehatza, biltzarrarentzat erabaki batzuk hartzea izan daiteke, baina soilik premiazko egoeretan edo jokoan dena ez delarik garrantzi haundikoa edota itzuliezina.

Agindurik gabe ere, biltzarkideek bi bilkuren artean biltzarrarentzat erabaki batzuk har ditzazkete, baina soilik premiagatik edo jokoan dena ez delarik garrantzi haundikoa edota itzuliezina.

Arazo bat ezin delarik Oinarrizko Biltzarran konpondu edota jokoan denak Oinarrizko Biltzarraren lurraldea gainditzen duelarik, lurralde zabalagoko (haran, herri haundi edo hiriko auzo) Oinarrizko Biltzarren artean elkarlana egiten da. Elkarlana, zuzenki oinarrizko biltzarren artean egiten da edota Oinarrizko Biltzarrak elkartzen dituen Lehen Hedadurako Biltzarren Biltzarran.

Oinarrizko Biltzarrek, Lehen Hedadurako Biltzarren Biltzarrerako guttienez bi bozeramaile hautatzen dituzte, ahalaz genero eta belaunaldi ezberdinetakoak. Oinarrizko Biltzarrak, bozeramaileak aldizkatzeko ahaleginak egiten ditu eta edozein unetan alda ditzake. Bozeramaileek, Oinarrizko Biltzarraren boza (erabakiak) Biltzarren Biltzarrera eramaiten dute, eta Biltzarren Biltzarraren boza (proposamenak) Oinarrizko Biltzarrera eramaiten dute. Erabakitzeko boterea beraz, lurralde hedadura txikieneko biltzarran gelditzen da beti.

Lehen Hedadurako Biltzarren Biltzarra, Oinarrizko Biltzarren bozeramaile hamarkada batzuek osatzen dute; biltzarkideen arteko adostasuna lortzeko ahaleginak egiten ditu. Lortzen ez duelarik, proposamen bat Oinarrizko Biltzarrei egiteko, proposamenak guttienez esku hartzaileen bi herenen onespena behar du.

Arazo bat ezin delarik Lehen Hedadurako Biltzarren Biltzarran konpondu edota jokoan denak biltzar honen lurraldea gainditzen duelarik, lurralde zabalagoko (eskualde edo hiri) Oinarrizko Biltzarren artean elkarlana egiten da. Elkarlana, zuzenki lurralde zabalagoko Oinarrizko Biltzarren artean egiten da, edo lurralde zabalagoko Oinarrizko Biltzarrak elkartzen dituen Bigarren Hedadurako Biltzarren Biltzarran.

Bigarren Hedadurako Biltzarren Biltzarra, Oinarrizko Biltzarren bozeramaile hamarkada batzuek osatzen dute. Finkatutako bozeramaile kopuruaren arabera, Oinarrizko Biltzar bakoitzak hautatu behar dituen bozeramaile kopurua finkatzen da.

Euskal Herriko Biltzarren Biltzarrerarte, Oinarrizko Biltzarren arteko elkarlana, Oinarrizko Biltzarrak elkartzen dituzten hedadura gero eta zabalagoetako biltzarren biltzarretan (hirugarrenekoa, laugarrenekoa…) egiten da.

Herribiltzak eraikitzen duen jendartearen oinarri sozial eta ekonomikoak hauek dira:

  • genero ezberdinetako jendeen botere berdintasuna izaitea;
  • langileen esplotaziorik ez izaitea; lankidetzazko eta elgar laguntzazko harreman ekonomikoak  izaitea;
  • bizitzeko behar ditugun gauzak ukaiteko posibilitate berdina ukaitea denek: bizitegia, jantziak, elikagaiak, energia, sendagaiak…
  • hau da, bortizkeriarik gabeko giza harremanak izaitea.
Herribitza zer da? Eskema

Nola Herribiltza eraiki?

Herribiltza eraikitzeko urratsak

1) Euskal herritarrei Herribiltzako kideak izaitea proposa.

2) Euskal Herriko lurralde hedadura guzietan, ber unean biltzarrak sortu: herri, auzo, eraikin, karrika, haran, herri haundi, hiriko auzo, eskualde, hiri, herrialde eta Euskal Herria. Biltzar bat bi lagunen artean abia daiteke.

3) Euskal Herriko lurralde hedadura ezberdinetan, biziko arlo guzietan gure nahiak eta beharrak gu aurek asetzeko batzordeak sortu: lana, bizitegia, energia, elikadura, lurra, osagarria, zaintza, justizia, autodefentsa, hezkuntza, ingurumena…

4) Batzorde guzi hauek hunkitzen dituzten arloetan Herribiltzatik kanpo jada lanean dihardutenak (elkarteetan, alderdietan, mugimenduetan, instituzio politikoetan…), Herribiltzaren batzordeetako eta biltzarretako kide izaitera gomita.

Zein da Herribiltzaren batzordeen ibilmoldea?

Batzordeen ibilmoldea

Batzordeak

Batzordeak biltzarrentzat proposamen egileak dira, ez erabakitzaileak, eta biltzarren ibilmolde berdina dute.

Lurralde hedadura ezberdinetako batzordeen arteko elkarlana, biltzarren arteko elkarlana bezala egiten da.

Batzorde bat, denei irekia izan daiteke edo sortzen dutenek nori ireki erabaki dezakete, hurbiltasunez (afinitatez) osatutako batzordeak eraginkorragoak izan daitezkeelako.

Biltzarren eta batzordeen bilkuren eraginkortasunerako, denen ardura da:

  • egitarauaren atal bakoitzarentzat aurreikusitako denboraren errespetatzea;
  • bakoitzak erraiten duena eztabaidagaiari hertsiki lotua izan behar dela gogoratzea.

Herribiltza

Euskal Herritarren Biltzarren Elkargoa eraikitzen

2022.06.21

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Erantzun bat “Herribiltzaren udako topaketak, astelehena 8tik igandea 14ra” bidalketan

  1. Zinez GURE arbasoen
    ZELAIETAKO isokraziaz funtzionatzen duzue!

    Bada GURE arbasoen kontzeptu garrantzitsu bat, kontutan hartzekoa:

    ABASOLOA
    “ABASOLOA” euskal leinuaren (ABU.en) SOLOA duk, “ondare ekonomiko komunala”

Utzi iruzkina, izen eta abizenez

Azken artikuluak