2022. urtean, gizon xinple batek igartzen ahal dituen hiru joera, gertatzen ari dena ulertzen eta datorrena usaintzen, bere ustez, laguntzen diotenak:
1. Bizi gaituen ekonomiak erreala deseraiki eta deseginarazi egiten du.
Deseraikitze eta deseginarazte horretatik ulertzen ahal dira gure gizarteetako gertakari zientifiko, politiko… eta ideia seinalatu gehienak.
2. Teknologia berriek humanoei emaniko boterea, bizidunen eta, partikulazki, humanoen euren kontra erabiliko da.
XX. mendeko hiru gertaldi gogoan: batetik, nazien deuseztatze-esparruak eta haiek bezalaxe sarraskitze-proiektu moduan sortu eta garatu zen energia nuklearra, bestetik, telebistaren eskutik zabaldu zen entretenizio masiboa: sarraski-dispositiboen eta zorion-dispositiboen ugaltzeari eta perfekzionatzeari erne behar dugu: nola suntsitzen gaituzten eta nola entretenitzen gaituzten, erne.
3. Totalitarismo ekologiko-sanitarioa konkretatzen ari da.
Ukitu sozialak, ukitu faxistak, ukitu nazionalistak, ukitu sexistak, ukitu feministak… izan ahal dituen totalitarismoa.
Gizon xinpleak bere artean egiten du ezen, hiru joera horiek inplementatzen dituzten dispositiboetatik kanpo-antzean izanez eta jardunez baino ezin saihetsiko direla gaitz horietako batzuk.
Estrainekoz Argiako Katazuloa blogean argitaratua, 2022ko azaroaren 17an
Ukitu “sozialen” eta ukitu “feministen” totalismoarena ez diat konprenitzen zehazki.
Nik uste, gizakien edozein aspirazio naturaletan ezkuta daitekeela totalitarismoa, asmo sozialetan eta feministetan barne, jakina. Ikusia dugu hori ere dagoeneko.
Faxismoak definizioz bilatzen du edozein ideia noble edota aglutinatzaile irrazionalki jarraitzea, eta gizakien irreflexioa eta inkonszientzia da bere indargunea.
Asmo zintzoenen esanahia perbertitzen du, indibiduoaren eta kolektiboaren indarra dominatzaileen aberraziora eta helburu gaiztoetara lerratzeko.
Josu:
Nolabait, ideia, lege… ustez on edo progresistez lagunduta etortzen ahal dela, edo haien atzean ezkutatzen ahal dela totalitarismoa, esan gura nuen.
Gaitz ebidenteei begiratzea ez zaigula aski.
Baita: sozialismoaren edo feminismoaren izenean, eta “langileak” edo “emakumeak” defenditzeko aitzakiaz ere heldu daitekeela totalitarismoa.
Matizatu beharreko iritziak, betiere.
Munduko handikiak komunikazio, ideia eta hitz ia guztiak erosten ari direnean oso zaila gai hauei heltzea lohitu gabe, elkar haserretu eta mindi gabe.
Agian sukalkietan itzultzaile neuronalengandik babesteko tenorea da.