Frankenstein Parkea: haurrentzako amets, jolas eta sorkuntza gunea

Viktor Frankenstein zientzialari transhumanista ospetsuaren birbilobek, etxeko tradizioari jarraiki, Ciborglinika bat fundatu dute Suitzako Alpeetan, ikuspegi progresista eta inklusibotik, natura eta biologiaren akatsak konpontzeko helburuarekin.

Punta-puntako zientzialari eta ikerleak bildu dituzte bertan, arlo desberdinetako adituen sinergia-gunea sortzeko asmoz: munduko zirujau, teknobiologo, mekanikari, elektronikari, informatikari, hartakin, iturgin eta jostunik ospetsuenek elkarrekin dihardute etorkizuneko Cyborgizakia eraikitzen.

bizidun eta bizigabeen arteko berezitasun binarista iraungi eta desagertutakoan

Garun bikaindun horien seme-alabentzako eskola berezi bat sortu dute; Frankenstein Park, txiki-txiki-txikitatik trebatu daitezen etorkizuneko gizakiaren sorkuntza, birziklapen eta mantentze lanetan, aurreiritzi heteropatriarkalen eraginetik aske. Haur Formakuntza hori Ciborglinikako hondakinak birziklatuz gorpuzten da, soberakin organiko zein inorganikoekin, biak ala biak izango direlako laster etorkizuneko jendearen osagai, behin bizidun eta bizigabeen arteko berezitasun binarista iraungi eta desagertutakoan.

Eskola iraultzaile hori haur ametsgelaren inguruan eraikia da, bertan siestara biltzen diren haurren ametsak erregistratu eta bakoitzaren desiorik gordeenetan arrantzatutako giza-ereduak eraikitzeko: Ametsetako Gizakia.

txakurra sentitzen den haurrari hortzak aldatu, muturra luzatu eta belarriak buru gainean jar dakizkioke

Jende organiko analogikoak ulertzen zaila bada ere, txakurra sentitzen den haurrari hortzak aldatu, muturra luzatu eta belarriak buru gainean jar dakizkioke; pirata izatearekin amesten duenari hankapaloa jarri eta begia atera; baina hauek adibide xinple batzuk baino ez dira.

Behin gaztarora iritsita, hormonak bereak egiten hasiko dira eta hor arazoak sortuko dira ugaltze gaitasun arkaikoak ezabatu ezean. Etorkizuneko jendea ezingo da alua eta zakila moduko leku antihigienikoetatik sortu, eboluziorako galga izango liratekeen giza organikoak jaiotzeko arriskuarengatik. Beraz, organo sexualak bere ugal gaitasunetatik erauzita, bezeroaren edozein apetatara egokitu ahal izango dira.

haurrak eskatu ahal izango ditu, hazteko, plazererako, lanerako edo besterik gabe konpainia egiteko

Haurren sorkuntza desbiologizatuz, bakoitzak bere ahalmen ekonomikoen araberako haurrak eskatu ahal izango ditu, hazteko, plazererako, lanerako edo besterik gabe konpainia egiteko.