Nafarroako Euskararen Legea okertzeari planto!
Merezimenduen 97/2024 Foru Dekretuak 1986ko Euskararen Legea areago okertu du.
Nafarroako Gobernuak 2024an onetsitako Merezimenduen Dekretuak Euskararen Foru Legea eta, beraz, Nafarroako euskal hiztunon egoera areago okertu ditu. Ordura arte, eremu mistoko udalek nahi adina balora zezaketen euskara beren lan deialdietan meritu gisa; zerbitzu publikoa, gazteleraz gain, euskaraz (Nafarroako jatorrizko hizkuntzan) ere eman ahalko zuten langileen sarbidea ahalbidetuz neurri batean.
Nafar euskaldunei eta udalen autonomiari murrizketa larria: euskarari %2 baino ez!
Alabaina, Merezimenduen Dekretu berriarekin, eremu mistoko udalek gehienez ere puntuazio guztiaren % 2,1 saritu dezakete euskara, hutsaren hurrengoa, langile euskaldunen kontratazioa areago zailduz eta nafar euskaldunon hizkuntz eskubideak eta udalen autonomia larriki murriztuz, gazteleraz jakitea derrigorrezkoa den bitartean.
Dekretuari errekurtsoak jarri zizkioten ELAk eta Steilasek alde batetik, eta Mendigorriko udalak bestetik, baina “Nafarroako” Justizia Auzitegi Nagusiak Dekretu berriaren bi atal baino ez ditu indargabetu bi sindikatuon errekurtsoaren ondotik, murrizketa larrienak ontzat joz: eremu “ez euskaldunean” ez da aurreikusten euskara baloratzea; gaztelera, ordea, derrigorrezkoa da, eta ingelesa, frantsesa eta alemana saritzen dira. Nafar guztiei arreta ematen dieten zerbitzu zentralen kontzeptua desagerrarazi da. Gobernuko departamentu bakoitzak tarte zabala izanen du euskararen balorazioa areago murrizteko. Eta eremu mistoan Osasunbideko osasun-lanpostuetarako balorazio orokorra egiteko aukera baztertu da Dekretuan. Gainera, Mendigorriko Udalaren errekurtsoa erabat bota du atzera nafar euskaldunak baztertzeko ohitura duen auzitegi horrek.
Nafarroako Euskararen Legea onartu zenetik, eremu mistoko udaletan 500 deialdi inguru izan dira, euskara % 2 irrigarri hori baino gehiago puntuatuz. Akabera eman dio horri “gobernu aurrerakoiak” orain, epaile euskalfoboen babesarekin. Udal eta alderdi abertzale ia guztiek isil-isilik onartu dute erasoa, eta herritar gehienek, euskaldunak barne, ez dakite gertatu denik ere.
Euskararen Legea okertzen duen dekretua zuzentzeko deia.
Horregatik guztiagatik, Euskaltzaleen Foroak deituta, ELA, LAB eta Steilas sindikatuen babesarekin elkartu gara Nafarroako Gobernuaren aurrean, Merituen Dekretu hau zuzendu dezaten aldarrikatzeko eta Nafarroako euskaldunon hizkuntz eskubideen defentsan.
