Euskara gurutze-bidean

Euskarak hitz egitean, ahoz ahoko erabileran iraun du eta iraun dezakeen heinean iraungo du. Ahoz ahoz erabiltzen ez den hizkuntzak, hitz egiten ez denak, ez du izateko zentzurik, hila da besterik gabe.

Euskararen erabileraren desagerpena euskaldunen desagerpenaren isla edo zantzu argia da (euskaldunen etnozidioa).

Hizkuntza baten transmisioa amaren hizkuntza seme-alabek jasotzean datza. Seme-alabarik jaio ezean, transmisiorik ez da gauzatzen, aita-amekin batera galduko da hizkuntzaren erabilera ere.

Euskal hiztun komunitateak erdal hiztunen euskalduntzean duen gaitasuna oso mugatua da. Erdal hiztuna nagusi den euskal komunitatean, hutsaren hurrengoa izango da euskaldunduko den erdalduna. Integrazioa utopikoa da gaurko erdal hiztunen etorreraren aurrean eta gauden euskaldun kopuruarekin. Dakartzaten erdaldunek Euskal Herrian iraun ahal izateko, ezinbestekoa zaie euskaldunaren eta euskararen desagerpena; alegia, kultur aniztasuna Euskal Herrian, globalizazioa.

Euskarak iraungo badu, politika abertzaleak, euskaldunaren iraupenaren aldekoak ezinbesteko ditu. Alderdi politiko abertzalerik ez da existitzen, ordea, gaur egungo Euskal Herrian. Politika abertzaleak desagertzearekin batera doa euskara eta euskaldunaren desagerpena.

Euskararen aurkako atzoko politikek beren izaera argi azaltzen zuten; frankista nahiz falangista edo faxista, zer ziren garbi adierazten zuten

Atzo ezarri zizkiguten euskararen eta euskaldunaren aurkako politikek beren izaera lau haizeetara zabaltzen zuten, ikurrak garbi azaltzen; frankista nahiz falangista edo faxista, zer ziren garbi adierazten zuten. Gaur, euskararen eta euskaldunaren desagerpen politikak aurrera daramatzaten alderdi politikoak ikurrinarekin estaltzen dira, beren buruari abertzale deitzen diote.

Ondorioz, ez dago euskaldunaren aldetik erreakziorik, indar erreakzionariorik, altxamendurik, iraultzerik. Etsaia euskal ikurrez jantzia baita eta EAJ edo EH Bildu siglak erosiak baititu. Egunerokoan politika etnozidak bultzatzen ari direnak atzoko indar erreakzionarioak dira, salduak izan zirenak.

Hori Vox-en politika baino eraginkorragoa da euskaldunaren desagerpenerako, euskalduna oharkabean baitoa amildegira, ez baitu otsoa ikusten. Atzo ez bezala, gaur indar erreakzionariorik sortu gabe goaz (ETA, ezker abertzalea, AEK, Ez dok hamairu, KORRIKA, Ikastolak, …). Datuek argi eta garbi adierazten dute hau guztia.

Euskararen desagerpena zuzenki lotua dago euskaldunik ez jaiotzearekin

Euskararen desagerpena zuzenki lotua dago euskaldunik ez jaiotzearekin, ama hizkuntzarik jasoko ez duenarekin. Abertzalea den alderdi politiko batek, politika abertzale batek, euskaldunaren, bertakoaren jaiotza bultzatu behar luke besteak beste, edo jaiotzeko baldintzak ezarri. Gaur egun indarrean diren politikek, bai laguntza sozialei dagokionez, baita etxebizitza bat eskuratzeko ere, erdaldunaren, alegia, kanpotik etorri denaren aldekoak dira. Zein laguntza politikatan hartzen da kontuan euskal hiztuna izatea Euskal Herrian? Zein etxebizitza esleipenetan?

Bai, aldiz, familia sortzea bera mespretxatzen duten haurren doktrinamendu antinatalistak hedatzen dituzte agintean diren alderdi politiko abertzale deiturikoek (beren herriaren etnozidioa gidatzen dutenek). Bai gure ikastoletako sexu heziketako saioetan, edota zenbait udaleku euskaldunetan ere bai.

gure eguneroko bizitzako edozein hautuk politikoa behar luke, herrigintzara bideratua

Benetako politika abertzaleak abian jarriko dituzten alderdi politiko abertzaleak sortzea eta bideratzea da euskararen biziraupenerako urgentziazko zereginetako bat Euskal Herrian. Euskal Herriak, gaur-gaurkoz, ez baitu alderdi politiko abertzalerik. Honetaz jabetu ala galdu, iraun ala desagertu, euskara gurutzeratu.

Eta, bitartean, gure eguneroko bizitzako edozein hautuk politikoa behar luke, herrigintzara bideratua. Edozein hautuk euskaldun komunitatean izango duen eragina kontuan izan, abertzale izan.

2026-01-08ko albiste honen harira idatzia.