Hona hemen herriBiltzaren agiria:
Zergatik independentzia?
- frantziar eta espainiar Konstituzioek, euskaldunen eta munduko gainerateko biztanleen bizi baldintzak funtsean hobetzea ezinezkoa egiten digutelako; bizitzeko behar ditugun gauzak (bizitegia, energia, elikagaiak, sendagaiak…) ukaiteko posibilitate berdina denek ez izaitea legalizatzen dutelako; langileen esplotazioa legalizatzen dutelako; ezberdintasuna (inegalitatea) legalizatzen dutelako; planetaren suntsitzea legalizatzen dutelako;
- frantziar eta espainiar Estatuen Konstituzioekin, eta ondorioz beren instituzio politiko guziekin (tartean Herriko Etxeak eta Udalak, Ipar Euskal Herriko Hiri Elkargoa eta Euskadiko eta Nafarroa Garaiko “autonomiak”), herritarren elkarbizitza antolatzeko erabakitzaileak ez direlako egiazki herritarrak, hau da, ez delako egiazko demokraziarik eta boterea oligarkiaren eskuetan delako;
- frantziar eta espainiar Estatuen agintariek, Euskal Herrian euskaldunak gutxiengoan ezarri eta ezartzen gaituztelako, eta komunikabide nagusiak kontrolatzen dituztenez, herritarren gehiengoarekin komunikatzeko posibilitate berdina ukatzen digutelako, hau da, egiazko adierazpen askatasunik ez delako.
Independentzia zertarako?
- Euskal Herria burujabe izaiteko, hau da, euskal herritarron elkarbizitza antolatzeko erabakitzaileak egiazki euskal herritarrak izaitea bermatuko duten instituzio politikoak ukaiteko;
- interdependentzia nola antolatu independentziaz erabakitzeko;
- euskarak bizirauteko;
- munduaren eta Euskal Herriaren egoera sozial, kultural, ekologiko eta politiko oso kezkagarriaren jatorrian den emakumeen eta oro har langileen esplotazioa desagerrarazteko;
- jendeen artean, bortizkeriarik gabeko harremanak, hots laguntasunezko harremanak, gauzatzeko;
Zergatik Frantziako Tourra ez da ongi etorria Euskal Herrian?
- Frantziako agintariek Euskal Herria zapaltzen dutelako;
- Frantziako Tourrak Ipar Euskal Herria Frantziako lurralde bezala kontsideratzen duelako;
- Frantziako Tourra, “panem et circenses”-en (ogia eta zirko jokoak) politika delako: jendeari janaria eta jokoak eman, munduko arazo larriei eta bidegabekeriei arretarik eman ez diezaion;
- Frantziako Tourran, bizikletarien aurretik pasatzen den publizitate karabana lotsagarria delako: 160 publizitate auto, 15 milioi publizitate “goodies” banatuak (giltzatakoak, goxokiak, kasketak, txanoak…);
- Euskal Autonomia Erkidegoko instituzio publikoek, Frantziako Tourrera 14,2 milioi euro bideratuko dituztelako (Eusko Jaurlaritzak, Bilboko Udalak, Bizkaiko Foru Aldundiak, Gipuzkoako Foru Aldundiak, Donostiako Udalak, Arabako Foru Aldundiak eta Gasteizko Udalak);
- Frantziako Tourra antolatzen duen enpresak, urtero hamar milioika euro langileen bizkar irabazten dituelako; – Frantziako Tourra, Vuelta, Mundiala, Joko Olinpikoak… eragiten dituzten bidaiak eta kontsumoa, eta ondorioz kutsadura eta beroketa klimatikoa, arduragabekeri hutsa direlako.
herriBiltza
Bilbon, 2023ko maiatzaren 19an
Bira antolaketa
Bizikleta lekuko bat, herriz herri bizikletari batetik bestera pasako da.
Bidean bakoitzak bere segurtasuna bermatu beharko du.
Goizetan 9:00etan abiatuko da eta arratsaldetan 15:00etan. Herrietan zer ordutan pasako den aurrerago zehaztuko dugu.
Herri bakoitzean atsedenaldia eginen dugu (orotara gutxi gora behera ordu bat goizean eta ordu bat arratsaldean).
Herri mugimenduko taldeek, txandaka bi herrien artean Bizikleta lekukoa eramanen dute. Lekukoa eraman nahi duten taldeek, herribiltza@riseup.net helbidera idatziz zein herrien artean nahi duten zehatz dezatela.
Geldialdiak eginen ditugun herrietan, herri mugimenduko taldeek beren aurkezpen mahaiak ezartzen ahalko dituzte.
Geldialdiak eginen ditugun herrietan, hamaiketakoa edo bazkaria edo arratsaldeko askaria edo afaria eginen dugu.
Bazkari eta afarietatik landa, ordu beteko Berbaldiak eginen ditugu: herriBiltzaren aurkezpena eta Biran esku hartzen duten herri mugimenduko taldeena.
Gauean dutxatzeko eta lo egiteko aterbea eskaintzeko ahaleginak egingo ditugu. Ekar lo zakuak eta zaku azpikoak.
Bilbon uztailak 1, Donostian uztailak 2 eta Baionan uztailak 3, Independentzia aldarrikatzeko eta Frantziako Tourra Euskal Herrian ez dela ongi etorria adierazteko elgarretaratzeak egingo ditugu.
