herriBiltza

Independentzia!

Elgarretaratzeak. Frantziako Tourra ez da ongi etorria Euskal Herrian!

6

Haizea Urtasun Rosano

Ama, sukaldaria. Zuhatzu

Hona hemen herriBiltzaren agiria:

Zergatik Frantziako Tourra ez da ongi etorria Euskal Herrian?

Euskal Herria zapaltzen duelako

  • Frantziako agintariek Euskal Herria zapaltzen dutelako;
  • Frantziako Tourrak Ipar Euskal Herria Frantziako lurralde bezala kontsideratzen duelako;

Klimatizida delako

  • Frantziako Tourra, Vuelta, Mundiala, Joko Olinpikoak… eragiten dituzten bidaiak eta kontsumoa, eta ondorioz kutsadura eta beroketa klimatikoa, arduragabekeria hutsa direlako, munduko tenperaturak 1,5 graduko maila udan lehen aldiz gainditzen duelarik eta Europa munduan azkarren berotzen den eskualdea delarik.

Kapitalista delako

  • Frantziako Tourra antolatzen duen enpresak, urtero hamar milioika euro langileen bizkar irabazten dituelako;
  • Euskal Autonomia Erkidegoko instituzio publikoek, Frantziako Tourrera 14,2 milioi euro bideratuko dituztelako (Eusko Jaurlaritzak, Bilboko Udalak, Bizkaiko Foru Aldundiak, Gipuzkoako Foru Aldundiak, Donostiako Udalak, Arabako Foru Aldundiak eta Gasteizko Udalak);

“Ogia eta zirkoa” delako

  • Frantziako Tourra, “panem et circenses”-en (ogia eta zirko jokoak) politika delako: jendeari janaria eta jokoak eman, munduko arazo larriei eta bidegabekeriei arretarik eman ez diezaion;
  • Frantziako Tourrean, bizikletarien aurretik pasatzen den publizitate karabana lotsagarria delako: 160 publizitate auto, 15 milioi publizitate “goodies” banatuak (giltzatakoak, goxokiak, kasketak, txanoak…).

Elgarretaratzeen tokiak eta orduak:

Uztailak 1

  • Durangon Landako Gunean 12:00
  • Elgoibarren Herriko plazan 17:30

Uztailak 2

  • Zarautzen Musika plazan 12:15
  • Donostian Antiguoko eliza aurrean 17:30

Uztailak 3

  • Ziburun Frontoian 11:45
  • Baionan San Espiritu plazan 17:30

Uztailak 4

  • Irisarrin Herriko plazan 13:30
  • Donapaleun Merkatu plazan 17:00

Uztailak 5

  • Maulen Kioskoan 11:00
  • Donibane Garazin Herriko Etxean 18:45

Uztailak 6

  • Donezteben Udaletxean 13:00
  • Irurtzunen Plazan 19:00

Uztailak 7

  • Ziordian Frontoian 12:15
  • Gasteizen Errekaleorren 18:15

Uztailak 8

  • Amurrion Udaletxeko plazan 13:00
  • Bilbon Erronda kaleko Bira ostatu aurrean 18:00

Independentziaren aldeko BIRAren ibilbide eta ordutegi zehatzak www.herribiltza.eus gunean.

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

6 erantzun “Independentzia!” bidalketan

  1. Haizea eta lagunok, zuen arrazonamendua “inplakablea” dun, baina…(arazo orok ditun bere “bainak”:

    1. Lehenik, TOURRA aspalditik dugu barneratua eta bizi duguna EHak.

    2. Tourrak aspalfitik dauka ikurriña jantzitzat, euskal txirrindulari eta zaleak protagonistatzat (gu Jaio aurretik)

    3. Tourrak ogia ere badakar EHko jende askorentz…

    4. Baita euskal kultura erakusten du Mundu OROren aurrean…

    Beraz, kontuz ume mokoak hau eta beste esateaz hutsaren truke.

  2. Josu: Tourrak ogia dakarren hori, tira , aberatsei bai, besteoi kalte baino ez. Euskal kultura erakutsi, bueno, euskal kultura kosmopaleto eta kontsumista erakusten du, bai, bagarala besteak beste hortan ere.
    Baina zein kultura kultibatu nahi dugun euskaldunontzat eztabaidatzeko dago.

  3. Guztiz ados zurekin, Haizea. Era berean, Josu, tourrari euren buruak saltzen dituzten hoiek, ez dut uste gure herri proiektua eraikitzen baliagarriak, bai ordea, zatiketa eta mina eratzeko, izan ere halako ikusgarriKERIak herriak banatzeko dira, beraz…. jarrai dezatela euren buruak saltzen tourrari, Sarri edo dena delakoari.

    Amaitzeko, Haizea, iparralde aipatzen duzu baina oker ez banaiz hegoaldera ere ekarri dute, ezta?

  4. Justu “klimaren beroketa” ez dakit arazo den; betiko eta betidanik jasaten dugun kutsadura, ordea, BAI… eta, paradoxikoki, zenbat eta gehiago aritu “beroketa globalaz”, orduan eta gutxiago kutsaduraz. Hau da marka! Jakina Tourradaren kontsumo-maila lotsagarria dela eta alde guztietatik begiratuta ere justifikaziorik gabea. Horrek pertsonentzat dakarren kaltea ahazten dugu klima gora eta klima behera gabiltzalarik, Marten bizitza aurkitzea Lurrean bizitza duina egitea baino garrantzitsuagoa den garaiotan.
    Orokorki klima deitzen dugun horrek arazorik gabe jarraitzen ditu bere zikloak homo sapiens-aren erokeriak gorabehera. Kontua da KUTSADURAK sortzen dituen arazoak geuretzat direla. Horregatik, ‘klimatizida’ beharrean ‘bizizida’ esango nuke nik, besteak beste erraustegiei “ekonomia zirkular” eta AHTei “garraio jasangarri” deitzeko lotsarik ez duten arlote txoriburuen demagogiatik urruntzeko bidean.

    Azkenik: niri ere dopaje-txapelketa horrek ez dit inoiz ogirik ekarri, nahi dutena esango dute politikariek.

  5. Zatiketaren adibide bat, kazeta.eus-en gaur argitaratua:
    ” Lehen hiru egunak, uztailaren 1etik 3ra, Euskal Herriko lurretan eginen ditu lasterketak, eta uztailaren 5ean Xiberoko hainbat herritatik ere iraganen da”
    Xiberua antza, EHtik atera da 🤔😉

  6. Deitoragarria gertatzen zait borondate oneko jendea klimaren inguruko pentsamendu bakarrean erortzen ikustea. Zein unetan galdu dugu sistemaren diskurtso ofizialen analisi kritiko ezinbestekoa?

    Klimaren balizko berotzearen prediku formal-estatala AEBetatik ekarritako fenomeno sozio-ekonomiko-politiko transbertsala da eta Europan soilik aplikatzen da. Ez ordea Europa “gehiago berotzen delako”, metropoliak inperioaren kontrol ekonomiko-politikoa bere kolonietan ezartzen duelako baizik, OTANen eremuan batik bat.

    Nire ustez, berotzearen hipotesiak egiazko osagai batzuk izanda ere, eredu sozioekonomiko honen egiturazko arazoei aurre egiten ari direnaren itxurak egiteko, eta betiko oligarkia estatal-korporatiboa boterean mantendu ahal izateko beharrezko aldaketa errazteko eta azkartzeko, herritarraren kolaborazio borondatezko eta komentzimenduzkoa behar dutelarik, manipulatzaileek asmatu duten maniobra perbertsoa da. Eta propagandazko industria oso bat sortu dute horretarako.

    Efektuak ikusten ari gara dagoeneko: herritar xumearen askatasuna eta burujabetza mugatzeko, korporazioen irabaziak lotsagarriro igo eta zerga berriak asmatzeko aitzakia perfektua da. Iraganeko garai ez hain urrunetan errebolta eta desobedientzia piztuko lukeena, jende kezkatu eta izutuen kolaborazioaz lagundua da orain. Halaber, bistan da klase kontzientziaren galera nabarmena, betebehar horiek zuretzat soilik baitira, langile; baina ez jet pribatuetan bidaiatzen duten aristokratentzat.

    Tenperatura globala gradu bat igo omen dela alarmazko jarreraz dioskutenean, ahanzten dugu planteatzea ea klima epeltzea ingurunearentzat ezer txarra den ere, edota zer zerikusi dugun horretan industrian interesik ez dugunok. Krisi kognitibo sakon honetan, jendeak uko egin dio egia jakiteari ere, izan ere “finean berdin da klimarekin zer gertatzen den, larrialdian gaude, aditzen? la-rri-al-di-an”.

    Honela lortzen da, bat, jende aztoratuak beste aldera begira dezan aurrean dauzkanean kutsadura, porlanizazioa eta lurraren artifizializazioa, nekazaritzaren industrializazioa, plastikoen eta pozoinen fabrikazio zentzugabea, neurrigabeko elektrifikazio interesatua, uraren eta beste ondasun komunen pribatizazioa eta kontrola esku gutxi batzuetan bildurik. Eta bi, kontzientzien eta errudun-sentimenduen isilaraztea zergen ordainketaren eta kontrolaren onarpenaren bidez. Baina autoritatea, larrialdi klimatikoaz ari zaigularik, esandako hori guztia -eta gehiago- ari da egiten.

    Gerra kognitibo-psikologiko bete-betean gaude. Gerra zikina, oso. Nagusi koldarren eta bizkarroien baliabidea. Ez ahantz, portaerak bideratzea helburu duen propaganda eta ekintza psikologikoaren erabilera planifikatua dela, kontrol sozial eta politikoa helburu, indarraren erabilerara jo gabe. Eta guk kolaboratzea ezinbesteko dutela.

    Aurkariaren morala eta zentzutasunezko aburua suntsitzea, bere pentsamendu eta ekintzen baliozkotasunaz zalantzan has dadin, eta oharkabean, bere suntsiketa propioan kolabora dezan. Horretan ari da, pausatu gabe, gizaki librearen etsaia. Nik ez dut zalantzarik propaganda dela egungo lehenengo boterea, eta ez laugarrena; bigarrena biolentzia da. Eta faxismo zaharra traje berde berriaz, bere lorpen handia.

Utzi iruzkina, izen eta abizenez

Azken artikuluak