Epstein koalizioak sortutako hondamena
Amerikako Estatu Batuetako eta Irango negoziatzaileek muga armamentistikoaz hitz egiten zuten bitartean, negoziazioaren porrota eta Ormuzeko itsasartea ixteko aukera aurreikusiz agian, AEB petrolioa metatzen aritu zen. Egun batzuk geroago Epstein koalizioak, hau da, Amerikako Estatu Batuek eta Israelek, 100 pertsona inguru hil zituzten Irango neskatoen eskola baten kontra eraso eginda.
Badirudi Epstein koalizioak, horrelako ekintzekin, Txina ahultzen duen bitartean, gobernu aldaketa eragin nahi duela Iranen. Eta Donald Trump eskolaren aurkako erasoaren erantzukizuna gainetik kentzen saiatu bada ere, New York Times egunkariak gezurtatu egiten du hori.
Historia pixka bat eginez, esan behar da duela 80 bat urte Nazioen sozietateak porrot egin zuela, besteak beste, armagintza garatuegia zegoelako eta bertan negozio goxo bat zegoelako. Orduz geroztik negozio hori hazi baino egin ez denez, egungo egoera askoz larriagoa da, eta horren adibide izan daiteke Start Berriaren amaiera, hau da, armak ez ugaltzeko AEB eta Errusiaren arteko ituna, Estatu Batuek ez baitute berau berritu.
Iranen aurkako gatazka hasi zuen Epstein koalizioa, dirudienez, ez dago bakarrik, Erresuma Batuak eta Australiak koalizio horren alde parte har dezaketela onartu baitute. Hori gertatzen den bitartean, Trump jaunak esan digu sortu duen gatazka kontrolpean eta amaitzear dagoela.
Argi dagoena da Epstein koalizioak eragindako gatazka berri honek pobrezia ekarriko duela Europara, inflazioaren bidez behintzat, eta are gehiago gatazka denboran luzatzen bada. Europarrok argi izan behar dugu, Txinaren eta Epstein koalizioaren arteko lehia honetan, kaltetuta aterako garela bai ala bai; izan ere, lehian atzean ez geratzeko, Estatu Batuek Europako ustezko aliatuak sakrifikatzen dituzte. Beraz, nire ustez, ez da komeni gatazka honetan Iran galtzaile ateratzea.
