Ia hedabide guztietan agertu den informazioaren aurrean, Iruña-Veleia Argitu, ez Suntsitu Plataformak prentsa-agiri hau argitaratu du:
PRENTSA-AGIRIA
Eliseo Gil izutzeko beste ahalegin bat Arabako Foru Aldundiaren eta Jaurlaritzaren aldetik
Kontua ezin da izan gaiztoagoa eta erridikuluagoa. Gasteizen Iruña-Veleia argitu, ez suntsitu lemapean manifestazioa egiteko bost egun falta direnean, eta benetakotasunaren aldeko eta sarraskiaren aurkako mugimendua sekulako indarra hartzen ari denean, zer asmatuko eta ondorengoa:
Arabako landagunean aspaldi agertutako arkeologia piezak inbentariatzen ari omen dira, eta zer aurkituko Espejon Lurmenek egindako indusketetan? CESAR eta NERON jartzen duten bi grafito. Ezinezkoa, beraz, faltsua, CAESAR eta NERO omen dira eta zuzenak. Eta Jaurlaritzako funtzionarioek eta hedabideek gogora ekartzen dute Eliseo Gil kondenatua izan zela faltsifikazioagatik 2020an. Ez dute esaten, apropos, Espejoko indusketok 1995ekoak direla. Ertzaintzaren esku utzi omen dituzte piezak, ikerketa zabaldu dezan.
Denok dakigu Eliseo Gilen erru bakarra aurkikuntza handi bat egitea izan dela
Odola irakiten jartzen zaigu horrelakoen aurrean. Iruña-Veleiako grafitoak sakon aztertu dituzten gehienek diote idazkunak ezin direla faltsuak izan, eta eskatzen dute laborategiko froga erabakigarriak egitea beren konbikzioa zuzena den ala ez jakiteko. Bestalde, hor daude txikizio zaharren eta berrien argazkiak eta bideoak, egileek ez dute inolako zigorrik jaso, epaitegian salaketak jarri arren. Eta denok dakigu Eliseo Gilen erru bakarra aurkikuntza handi bat egitea izan dela. Oso garesti ordaintzen ari da gizona!
Gaineratu behar CESAR eta NERON sarri dokumentatzen direla epigrafian nahiz bestelako testuetan. Erantsita bidaltzen dizuegun pdf dokumetuan hainbat adibide daude. Gainera, ia hizkuntza guztietan Cesar eta Neron gelditu dira. Zesarren kasuan, -ae- diptongoa -e- bihurtu zelako denborarekin, eta Neron-en kasuan, nominatiboan Nero zen arren, Neronis, Neroni, Nerone… deklinatuta. Plato zen nominatiboan, baina Platonis, Platoni, Platonem… deklinatuta. Eta Platon geratu da ia hizkuntza guztietan.
Igandean, martxoak 30, manifestazioa Gasteizen: Iruña-Veleia argitu, ez suntsitu!
Gogorarazi nahi dugu datorren igandean manifestazioa dagoela Gasteizen, eta sekula baino ozenago deiadar egin behar dugula “Iruña-Veleia argitu, ez suntsitu”!
Iruña-Veleia argitu, ez suntsitu Plataforma
2025-03-26
