Eraiki osasuna eta askatasunerako euskal komunitate independentea

Elosuko aterpetxera iritsi nintzenean izenburu hori aurkitu nuen horman eta ikutua sentitu nintzen. Hiruzpalau egun neramatzan baraualdirako prestatzen, ostiral horretan hasten zen prozesua eta bereziki sentibera nengoen. Agian horregatik, edo iazko baraugileak eta berriak ikusteagatik, zirrara sentitu nuen urdailean. Aurreko urtean ere egonda nengoen Independentea.eus-ek antolatutako baraualdian. Iaz, nora nindoan ondo jakin gabe erori nintzen bertan; baraualdia euskaraz izango zela jakiteak bereziki erakargarria bihurtu zuen niretzat.

Iazko lagunak ikustean eta horman agertzen zen izenburua irakurtzean, etxean sentitu nintzen berriz ere. Elosuko auzoa toki berezia da Euskal Herrian; han bertan ikus daitekeen mapa zahar batean (1100. urte ingurukoa) Elosua, Arrasate eta Aitzorrotz inguruko beste guztien gainetik aipatzen dira. Elosuak Euskal Herriaren antzinatasunean murgiltzen gaitu, bai historikoki, bai animikoki, eta hala izan zen.

Baraualdian gorputza hasten zaigu mezu ezberdinak bidaltzen, bakoitzari berea

Baraualdian krisiak bizi izaten dira nahi eta nahi ez, jateko ohiturarekin apurtzeak gure barruko eta kanpoko erlojuak zorabiatzen ditu eta gorputza hasten zaigu mezu ezberdinak bidaltzen, normalean ez oso atseginak, norbanako bakoitzari berea. Egia esan, baldintza horietan, ez gara egoten kanpora ateratzeko unerik onenean, baina aldi berean zintzoago kanporatzeko aukera eskaintzen zaigu, batez ere giroa geure alde somatzen badugu.

Baraualdi-egun hauetan garatu den dinamika oso bizia izan da; 20 proposamenetik gora egin dira goizero egiten genituen bileretan eta, jendeak aukera ugari horien artean hautatuta, taldeetan elkartu gara; betiere oin bien legea jarraituz, non gogoa, han zangoa; hots, hemen egon eta izango naiz nahi dudan bitartean, baina nagoenean, banago (edo ez nago).

Dinamika ugari izan ditugu gorputzari arreta emateko plano fisiko, psikiko eta espiritualean, zergatik ez esan. Landu ditugu luzaketak, chi-kung, masaiak, txakren mugimendua eta energia gorputzean zehar mugitzearena, baita meditazioa ere; zaindu dugu elkar; bakoitzak bere jakinduriatik, jakina. Bestelako hamaika tailer interesgarri ere izan dira; Pikuineta baserrirako ibilaldia, Iruña-Veleiari buruzko hitzaldia Juan Martin Elexpuruk eta Maritxu Goikoetxeak bideratua, txalaparta ikastaroa Oreka TX-ko Mikelek bideratua, kantu tailerra Ainhoak bideratua… Zenbat eta zenbat bilgune, Eskola, Unibertsitate eder eta gozagarriak.

Dena dela, eta ikus dezazuen zein mailatako sakontasunean murgildu garen, hona hemen Aitziber Madariagak Euskal Komunitate Independentea eraikitzearen gaia lantzen ari ginela esandakoa:

Gizaki guztiok daukagu taldearen dimentsioa; ni niago naiz taldea zaintzen badut. Euskarak gordetzen du duela milaka urteko ezagutza eta adimena, eta Independenteak hari horri eusten dio zentzu batean; Independentea antikapitalista da ezinbestean; iparra da

Hain aberasgarria izan da bizipena, non datorren urtera begirakoa ere itxi baitugu. 2025eko uztailaren 21etik 28ra izango da Elosuan bertan. Aurretik egitekoak ere badira, nola ez; Independentearen ibilaldia, Elosua-Aitzorrotz, bi egunetan… eta ez noa gehiago luzatzera.

Azken zera bakarrik: esker mila parte izan zareten guztioi eta ongi etorri baraugile berriak; hau dugu bidea euskal komunitate independentea eraikitzeko.