“Bizitzaren doinuak” diskoa kalean

Egoera hau hasi zenetik, esparru desberdinetako profesionalak entzun ahal izan ditugu, hala nola medikuak, birologoak, abokatuak… komunikabideetan entzuten dugunaren ikuspuntu desberdina ematen.

Kulturaren arloan, musikari askok sentitu dugu egoera horri guztiari letrak, harmonia, jartzeko beharra, gure sormenarekin lagunduz. Kalera atera gara, kantuan parte hartu dugu… eta, horrela, Bizitzaren lehen diskoa sortzeko proposamena plazaratu zen, orain esku artean duguna.

Bizitza Plataformaren helburuak lortzeko: osasun-diktaduraren aurka eta gure eskubide eta askatasunaren alde altxatzea

Jende askoren laguntzari eta egindako crowfounding-ari esker, labetik atera berria, joan den azaroaren 27an aurkeztu genuen Bizitza Records-en lehen diskoa, “BIZITZAREN DOINUAK”, Bilbon, Areatzan eskainitako kontzertuan.

Disko honen bidez, ekarpen txiki bat egin nahi izan dugu diskoan parte hartu dugunok (musikariok, abeslariok, ekoizleek eta diseinatzaileek) Bizitza Plataformaren helburuak lortzeko: osasun-diktaduraren aurka eta gure eskubide eta askatasunaren alde altxatzea.

Aniguitarren ahotsean entzun dugu La mascarilla rokanrola, Aiz eta Javier Goñi ere kantuan ikusi ditugu, gure kantautore nekaezinenarekin batera: Rasta sin Pasta, aurrez beste mobilizazio batzuetan ere entzun ditugun bezala. Txalaletaminak txalaparta elektronikoen soinua zabaldu du: esklabu alaiak ote gara? Nik neuk ere parte hartu dut disko honetan, eta honela diot kantetako batean: “elkar ukitu gabe, gizakiak zertarako gaude? Heriotzaren beldurraren menpe suntsitu nahi gaituzte”.

Diskoan Mikel Altzuart eta Xabier Silveira bertsolariek ere parte hartu dute, eta, Iban Nikolai edo Txala-os bezalako artisten kantuak entzun nahi dituenari, diskoa eskuratzeko gonbitea luzatzen diogu, oso-osorik gozatzeko! Beldurragatik parte hartu ez duten artistei ere, eskua luzatzen diegu hurrengo diskoan parte har dezaten. Zuen zain gaude!

Diskoa eskuratzeko, hona idatz dezakezue: musikariakbizitza@gmail.com

Informazio gehiago hemen: https://t.me/BIZITZA_RECORDS_FAN_KLUBA

Iturria: www.bizitza.eus

Jarraian iaz Oiatzun Irratian grabatutako irrati saioa, Joxe Leonekin, «Bizitzaren Oinarria» single-a aurkezten.