Badira urte dezente herri honen lema galdu zutenetik. Urte asko dira preso politikoak baztertu eta moketa laztantzen hasi zirenetik. Amnistia kontzeptua lelo politiko izateari utzi eta kaxoiaren zulo sakonenean abandonatu zutenetik. Orduz geroztik, etsaiaren borrero bihurturik zipaio eta mota guztietako etsaiei gorazarre egin diete herri langilearen benetako beharrei muzin eginez. Hori izan da Ezker Abertzale ofizialak herri honi azken hamarkadan egindako ekarpen antiiraultzailea.
Oraingoan, GKS eta Mugimendu Sozialistaren aurka oldartu dira garaian Euskal Herria defendatzen zuten horiek; izan ere, etsaiaren kolaboratzaile bilakatu dira aitzina Estatu espainol eta frantsesaren aurka borrokan egindako hainbat eta hainbat. Lehenago ATA erakundearekin egin legez, eta euren orbitatik irteten diren guztiekin egin bezala, konfrontazioa hautatu dute disidentzia garaitzeko modu gisa. Oraingoan ere, noski, kale egitera kondenatuta daude.
Ezker Abertzale ofizialaren gerifalte handiek azken boladan egindako azken mugimendua penagarria bezain lotsagarria izan da. Oraingoan Hernaniko gaztetxetik eusko gudarien irudiak kentzera dei egin diote Mugimendu Sozialistari. Gerifalteek agindu dute Euskal Preso Politikoek copyright-a dutela eta ezin daitezkeela disidenteek kontrolatutako guneetan egon; hau da, gudariak ezin daitezkeela moketadunek kontrolatzen ez dituzten lekuetan egon. Hortaz, eremu publikoa pribatizatzeaz harago, presoen irudia ere pribatizatu nahi dute. Jai daukate, noski.
Guztiarekin argi ikus daiteke beste herrialde ugaritan ikusi bezala, Ezker Abertzale Ofiziala galduta dagoela, noraezean, aspaldidanik ikusi ahal izan dugun lez. Urduritasun hori Euskal Herriaren askatasunaren aldeko borrokan seinale on bat bezala ulertu beharko genuke. Instituzio arrotzen berotasuna besarkatu dutenak gero eta ahulduago daude eta herri honek iparrorratz berri eta itxaropentsu bat du ortzimugan. Gure aitaren etxea defendatu nahi izanez gero, etxe hori eraitsi eta berri bat eraikitzeko premia ezinbestekoa dugu. Mugimendu Sozialistako gazteak lan hori egiteko prest daudela erakutsi digute. Eman diezaiegun, oraingoan bai, aukera eta gure konfiantza.
Aurrera gazteak, txosnetan ikusiko gara. Gora euskal gazteria iraultzailea.
kaixo Mikel
nire ikuspuntua emateko duk, diskutia goritzen baitoa.
Hego EHko egoeraren gako nagusietariko bat, nik uste, hemen ez gaituztela hazi ezein demokrazia motatan, ezta liberalean ere.
Ezin diagu “jaurti demokrazia zerri-askara”, gure bertsolariak esan zuenez, zeren eta hemen betidanik baitago zerri-askan “demokrazia” duela gutxienik 60 eta piku urtetik honantz. Beraz, guretariko iork ere ez dugu dastatu hura, ezta hurrik eman ere. Katalunyan badute haren usain pixkat, lotuago daude eta Europako demokrazia liberalekin, baina hemen ezta horrekin ere.
Gure pàtua eta jitea duk ez-negoziatzailea PRINTZIPIOZ. Ez gaudek horretarako hezita, mutilak; aitzitik, bakoitza bere lubakian sartuta eta alboko lubekikoari irainka, Erdi Aroko “banderizoen” erara, batzuek besteen gazteluak suntsitzen, nahiz eta den-denak euskaldunak izan.
Oraingoan ere denok independentzia zaleak, zelan uka hori batak besteari!
Eta zer? -esango duzu, Mikel.
Ba zer dakit nik, motel.
Baina gutxienez ez dezagun doako ikuskizunik eskaini, atze-auzoen gozamenerako.
Kontura gaitezen zein den etsaia, eta ez dezagun deserra eta erratu tiroa.
Zer egin orduan, etsaiari doako ikuskizunik EZ EMATEKO? Negoziatzera emanak ez garenez, gure hezkuntzan ez dugulako demokrazia nagoiatzailerik ezagutu (ezta liberalik ere), egin dezagun ahalegintxo bat sikeran.
Eta ez neri etor, adibidez, “paternalista” naizela eta. Jada hortzak berdinduak dizkiat, lagun; eta laurogei urte bizkarrean.
Baina, nire partetik ahalegintxo bat egingo nuke, bederen, alde bien artean.
Isil bitez (edo bareago hitz egin behintzat) alderdizale muturrekoek; eta hitz egin bezate areago negoziatzaile zaleek. Amin.
Woke Ezkerra badaukagu gure artean. USAtik etorritako Kantzelazio-kultura iritsi da gure herrira. Otegik ondo baino hobeto antzeztu du: ez dira ezker abertzalekoak, autoritarioak dira. Kantzelatuak, eta kitto.
Zinismoaren erakustaldi ederra. Autoritarioak Covid pasaportearen kontra ibili zirenak; demokratak inposatzen zigutenak. Bitxia da.
Bai, Josu, azken bi urte hauetan ni ere somatu dut kultura demokratikoaren gabezia handia daukagula EHn. Pertsonaren funtsezko eskubide eta libertateen bermea eta errespetua azaldu zuten egunean gehienok ez ginela egon klasean iruditzen zait. Pandemia madarikatu honek begiak ireki dizkit.
Disidentzia kontrolpean hartzeko eta desaktibatzeko era onena, nire ustez, konfrontazio faltsua sortzea eta herriaren sormena eta indarra sekta alternatibo-ustekora bideratzea da. Izena eta aurpegia garbitu, diskurtsoa itxuraz berritu, guru eta biblia berriak ezarri -jakina da gorriak beti seduzitzen duela beraz apustu segurua dela-. Honela lortzen da artaldea mantentzea hautsi gabe elementu autonomoetan eta ekintzak segi dezan kontrolpean eta bideratuta.
“ezkerra”: sistemaren hitza.
‘Ezkerrak’ : erregimen parlamentarioaren, alderdikraziaren,
kapital sistemaren
TRESNAK.