Baraualdi auto-eratua Elosuan uztailean, 21etik 27ra

Uztail honetan, baraualdia egiteko ohitura dugun pertsona talde batek berriro elkartzea erabaki dugu, esperientzia hau nola errepikatu ikusteko.

Daukagun asmoa da berriro espazio bat sortzea gure gorputzei denbora bat emateko hiru modutan geldiarazteko:

Baraua janariari
Baraua teknologiari
Baraua euskara ez den hizkuntzari

Geldialdi hau garrantzitsua dela uste dugu, arrazoi hauengatik:

• Gure identitate biologiko, sortzaile eta kulturalerako sarbidea errazten digulako.
• Hazkunde indibidual, kolektibo eta/edo espiritualera hurbiltzen gaituelako.
• Isolamendu indibidual, kolektibo eta soziala hausten duelako.
• Pentsamendu eta esperientzia pertsonalen bidez informazio berria jasotzen dugulako.
• Kontzientzia fisiko, psikologiko eta emozionala jasotzen dugulako.

Nire esperientziaren anekdota bat:

Egokia iruditzen zait zuekin partekatzea gaur iazko baraualdian bizi izandako egoera pertsonal bat.

Urte askotan baraualdiak egin ditut, nire gorputza eta burua zaintzeko modu egokia iruditzen zaidalako. Sekula ez nuen uztartu hori teknologiari eta gaztelaniari buruz barau egitearekin.

Baraua hasi aurretik nire bikotekidearekin komunikatzeko baimena eskatu nion taldeari egun batez. Bera Venezuelakoa da eta ez daki euskaraz. Bera euskaltegian zegoen eta oso gutxi hitz egiten zuen euskaraz. Etxean beti erdaraz hitz egiten genuen. Baina baraualdiaren konpromisoak euskara hutsean komunikatzera bultzatu gintuen. Minutu asko eman genituen euskara hutsean komunikatzen.

Telefonoa eskegi nuenean negarrez hasi nintzen.

Ez nekien oso ondo zergatik, baina gero zerbait ulertzen hasi nintzen. Beti entzun izan diet gurasoei zein berezia den zure seme edo alabari lehen hitza esaten entzutea. Ezin nuen jakin zer zen hori, ez naizelako aita. Imajinatu besterik ezin nuen egin. Bikotekidearekin euskaraz hitz egiteak errealitate hori ulertzera eraman ninduen.

Eta iazko baraualdian zegoen jendearekin partekatu nuen istorio hau gaur zuekin partekatzen dut.

Eskerrik asko hor egoteagatik.

Baraualdiari buruzko artikuluak