Errebotez jaso nuen 2024ko Barau Astera joateko gonbidapena, edo, hobeto esanda, baraualdiarekin zuzenean zerikusirik ez duen arrazoi batengatik: baraualdian zehar antolatzen dugun Gune Irekiarekin laguntzeko eskaeragatik, alegia.
Gune Ireki nahikotxotan egon eta gero, badakit denbora luzez gogoratuko dudan bizipena izango dela 2024ko baraualdia. Aurreko Gune Irekien antzera; ala gehiago?
Gaztetan, batzuetan, azkarregi jaten nuela esaten zidaten etxean. Oro har, platerean dudan janari guztia bukatzeko eta, denon artean, mahaian dagoen jateko guztia amaitzeko beharra nigan barneratuta egon da aspalditik.
Azken urteetan, baraua era ezberdinetan “agertu” da nire bizitzan
Azken urteetan zehar baraua era ezberdinetan “agertu” da nire bizitzan: kultura ezberdinetan bizi izana eta janordu ezberdinetara ohitzea, aita izatea eta umeen janariarekiko erlazioaz ikastea (adibidez, noiz eta zer jan momentuan sentitzen dudanaren araberakoa da), nire kabuz egun bateko baraua egitea, luzaroan ikusten ez nituen lagunekin bazkaldu eta nik baino askoz azkarrago jaten dutela ikustea, edo erretiro batean egonda askoz gutxiago jan (gorputzak benetan eskatzen zidanari erantzuna emanez) eta gose ez nintzela ohartzea. Gainera, Ramadanean zehar baraua egiten duen lagun baten batekin egun batzuk igarotzearekin “amestu” izan dut maiz.
2024ko Barau Astea momentu aproposean agertu dela uste dut
Oro har, janariarekin dudan erlazioa nire bizitzako lehentasunetako bat bilakatzen ari dela esango nuke. Beraz, 2024ko Barau Astea momentu aproposean agertu dela uste dut.
Baraua taldean bizitzea, esperientziadun pertsonekin, espazio autoeratuan, hitz egiteko aukerarekin, betebeharrik gabe,… Esperientzia polita izango denaren seinaleak dira horiek guztiak.
Beldurrak egon badaude: Ainoak esan zidan moduan, litekeena da nire emozioak, gustuko ez ditudan horiek batez ere, janariarekin ezkutatzen nabilela. Zer gertatuko da horiekin baraualdian?
Nork daki; anti-hauskortasunari aukera emango diot, hori ziur.
Izena emateko bete ondorengo formularioa:
IZEN-EMATEA
• 2024 Barau Astea •
Uztailak 19-25 Elosu
Informazio gehiago:
– Euskarazko Barau Asteari buruz
