Gudari Eguna

30 lorazepam

sasian ibili zinen urte amaigabeetan
egun bakoitza izan zen nola tiro bat kopetan

2

Xabier Silveira

Bertsolaria. Lesaka

Ez nizun sekula erran hau hola, hori horrela
ez nizun sekula erran erraturikan zeundela
ez nizun sekula erran bertze moduak zeudela
epaitu gabe onartu, horixe zen erregela
Urek nola, nik halaxe bilatzen nizun nibela
jakinik horizontean beti agertzen zinela
gaur nik neuk idatzi behar izan dut zure eskela
ta gutienekoa da uzten didazun pastela
Ni agurtu gabe zoaz, inor ez banintz bezela
nik zergatik pentsatuko nuen lagunak ginela

Hogei urte geneuzkala sartu omen zinen ETAn
txakurrak bila etorri arte hogeita lauetan
sasian ibili zinen urte amaigabeetan
egun bakoitza izan zen nola tiro bat kopetan
Hamabi urte ta gero, heldu zinenean bueltan
galdutako urte haiek berreskuratu nahietan
etengabe saiatu naiz whatsappez eta deietan
eta zure erantzuna: 30 lorazepam

Esna bizi denak baina betirako lo gelditu
nahi izateko, jakina, bere arrazoiak ditu
agian ez dut ulertu, agian ez dut aditu
edo agian ezin dut zure minik entenditu
Ez dut errurik sentitzen ta ezin dut errukitu
ez dut hitzik edo ezin izan dut hitzik aurkitu
zer aldatuko litzake aurkitu izan banitu?
Orain dena alferrik, ezin da hilik berpiztu

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

2 erantzun “30 lorazepam” bidalketan

  1. Hunkigarria Silver!
    Gerrak dakarren ondorio izkutua, gordinki eta poetikoki josia, bihotzetik, laguntasunetik.
    Gora euskal gudariak!

  2. Auzo batean erakutsi zidaten, -intentzio onak-, hau garatu ezkero, zenbat zukutu leiken; amonaren mantala eranzteko garaia da, eta 30 etik 3ra jaistekoa. Baino, ez-eskuartze prinzipioa, modu askotan puska leike, azkenean ez dakigu hartzailea sasitan noraino dagoen.
    Epaitu gabe onartu, hitz politak dira, baino gauzatzen oso zailak.
    Ona Xabier, ausnartzeko hitzak jarri dituk.

Utzi iruzkina

Azken artikuluak