Hona hemen Maputxe Mugimendu Autonomoarekiko Elkartasuna nazioarteko elkarteak berriki zabaldu duen testua:
Martxoaren 19an, bost Preso Politiko Maputxek (PPM), Jose Lienqueo, Bastian Llaitul, Roberto Garling, Axel Campos eta Oscar Cañupanek, hilabeteko gose greba bete dute Temucoko kartzelan, batez besteko euren pisuaren %15 jada galduta. Preso dauzkate Maputxe Herrian bertoko basoak txikitu eta eukaliptoz betetzen dituzten forestal txiletarren bi kamioiren erreketagatik, inolako froga zehatz barik, eta gose greban daude 15 eta 17 urteko kartzela zigor neurrigabearen jaitsiera eskatzeko.
Euren eskakizunak ondokoak dira: jasotako epaia partzialki ezeztatzea eta Temucoko kartzelan PPMen izaera maputxea mantendu ahal izateko zein bizitza komunitarioa indartzeko euren zeremoniak egin ditzaten hobekuntzak eskuratzea; era berean, epaiketaren zain dauden eta epaia emanda duten preso maputxeen artean dagoen sakabanaketari amaiera ematea. PPM guztien askatasuna ere aldarrikatzen dute.
Epaiketa prozesu osoa irregulartasunez betea egon da: bi urte eta erdiko kartzela prebentiboa, epaiketa itxaroten eta atzeratzen hiru bider epailerik ez zegoelako, aurpegirik gabeko lekukoak erabili izana, hiru aldiz hasiera datak aldatzea, epaiketa telematikoa (epaile eta akusazioak epaitegian ez zirela, internet bidez baizik), epaitegian presoak eta abokatuak bakarrik egonda oinak eta eskuak eskuburdinez lotuta egotea akusatuak…
Zigorra bera berezitasun batez etorri zen: fiskaltzak eskatutako hamabi urteko zigorra baztertu eta forestalen eta Gabriel Boricen gobernuak eskatzen zituen 15 eta 17 urtekoak jarri zizkieten. Horra, duela lau urteko hauteskundeetako programaren arabera, ustez Maputxe Herriaren autodeterminazioa gerturatzeko etorritako Gabriel Boricek, jada presidente ohia denak, maputxe borrokalari hauei utzitako oparitxoa.
Maputxeei ezarritako justizia sistema neokoloniala enpresa kolonialen morroia da
Azpimarratu beharrekoa da Boricen gobernua iraunkorki akusazioaren parte izan dela maputxeen kontrako epaiketa guzti-guztietan. Bide beretik, enpresa forestalen abokatuek Txileko Fiskaltzak baino botere gehiago izateak ezin argiago uzten du maputxeentzat ezarria den justizia sistema neokolonialak enpresa kolonialekiko duen morrontza.
Bi miloi eta erdi pertsonaz osaturik eta Argentina zein Txileko estatuenpean inbadituta eta kolonizatuta, Maputxe Herria aspaldi dabil Itrofil Mongen edo biodibertsitatearen aurka ari diren enpresa txiletar eta transnazionalak borrokatzen, berbaz eta ekintzaz. Ekinbide horretan, forestalen makineria sabotatzea da, lantzean behin baina iraunkorki, erabiltzen ari diren zilegizko lanabesetako bat.
Quillecokoen gose greba aldarrikatuz, jada bi sabotaje gertatu dira forestalen aurka, hainbat makina errez. Maputxe herriak berezibiziko garrantzia ematen dio bertoko basoari, bizidun guztien orekarako eta euren osasun sistemarako behar-beharrezkoa dutelako. Era berean, mapudunguna euren hizkuntzaren normalizatze lanari, euren kosmobisioaren berreskurapenari, aitite-amamei lapurtutako lurren berreskurapenari eta autodeterminazio prozesu bati gogor atxikituta dago, azken hamarkadetan, erakunde ezberdinetan antolatuta dagoen Maputxe Herriaren Mugimendu Autonomoa.
Maputxe herriak berezibiziko garrantzia ematen dio bertoko basoari, bizidun guztien orekarako eta euren osasun sistemarako behar-beharrezkoa dutelako
Argentina eta Txileko gobernu neofazistek komunitate maputxeetan etengabeko sarraldiak egiten dituzte (presoak atxikiz, uztak galaraziz eta lapurtuz, adingabeak eta adinez nagusiak ere jazarriz). Lurralde osoan kontrol militarra ezarri dute, eta jada han zegoen poliziari ejerzitoa eranstea izan da Boricen gobernuaren ekinetako bat, dronez eta check pointez zerua eta bideak josiz, dagoeneko lau urtez dirauen salbuespenezko egoera batean. PPMen senideek poliziaren jarraipenak eta edozein lekutan identitate kontrol “aleatorioak” jasaten dituzte.
20 Preso Politiko Maputxe ziren duela lau urte eta 150 inguru dira gaur egun, Kasten gobernu faxista hasten den honetan.
Autodeterminazio eskubidean sinisten dugunok, Iran, Venezuela, Cuba, Palestina, Rojava gogoan, ez dezagun bazterrean utz Maputxe Herriaren borroka
Mundua nahasturik dabil, bai. Baina erregu bat; herri guztien autodeterminazio eskubidean sinisten dugunok, Iran, Venezuela, Cuba, Palestina, Rojava gogoan, ez dezagun ahaztu eta bazterrean utzi Argentina eta Txile estatuenpean, euren hizkuntza berreskuratu nahian eta euren kulturaren aldeko ekina borrokaren ardatz bihurturik autodeterminazioa defendatuz, bere etorkizunaren alde borrokan ari den eta munduarentzat naturarekiko orekan bizitzeko proposamena duen Maputxe Herria.
Quilleco kasuko presoak euren gorputza jartzen ari dira Maputxe Herriaren alde eta justizia ñimiño bat euren buruarentzat lortu nahian.
Lagundu ditzagun ahal dugun neurrian. Eurek dioten legez:
Amulepe taiñ weichan! Gure borroka aurrera!
Marichi weu! Hamar aldiz irabaziko dugu!
