Irailaren 27ko Palestinaren aldeko greba dela-eta, Hezkuntza Sailak Algortako J. C. Baroja BHI institutuko bi irakasle jazartzen dihardu, baina guk salatzeko asmoa dugu eta egin dugu. Hasteko, guztia azaltzeko eta publikoki salatzeko idatzi bat atera dugu eta atxikimenduak bilatzen gabiltza. Hori zabaltzen lagunduko al diguzue? Mila esker.
Adierazpena:
Getxoko J. C. Baroja BHI-ko bi irakasleren aurkako errepresio politikoa irailaren 27an Palestinaren alde greba egiteagatik
Irailaren 27an, CGT-LKN (Confederación General de Trabajador@s) eta Confederación Sindical Solidaridad Obrera sindikatu anarkistek espainiar mailako greba orokorrerako deialdi bat egin zuten Israel palestinar herritarren aurka gauzatzen ari den genozidioaren aurrean erakunde publikoek duten jarrera eta jokabide hipokrita salatzeko eta palestinarrei elkartasuna adierazteko. Deialdia espainiar Lan eta Gizarte Ekonomia ministerioaren aurrean behar bezala legeztatu zen.
“Euskal gehiengo sindikalak” deialdi honen aurrean izan duen jarrera lotsagarria aztertzen denbora galdu gabe (deialdiari ez lotzeaz gain hura isilarazten ibili dira), Institutu honetako bi lankideri gertatutakoa salatu nahi dugu:
Getxoko Algortan dagoen J. C. Baroja BHI institutuko Geografia eta Historia mintegiko bi irakaslek greba deialdiarekin bat egin genuen eta, denbora pasata, urriaren amaieran, Hezkuntza Saileko ikuskariek egun horretan “justifikatu gabeko hutsegitea” egin genuela jakinarazi digute. Institutuko zuzendaritzak argi azaldu eta egiaztatu digu Hezkuntza Sailaren aplikazio informatikoan Sailak ez duela greba deialdia jasotzeko aukerarik ematen eta, urriaren 30ean, oraindik, “hutsegiteak” zuzendu gabe jarraitzen duela. Ikuskariari eta Hezkuntzatik telefonoz deitu digutenei greba egin genuela adierazi diegunean eta greba deialdia bidali diegunean, aitzakia gisa greba deialdiaren berririk ez zutela erantzun digute, eta, urriaren 29an, arrazoi berdina erabiltzen jarraitzen dute oraindik. Haiei esan bezala, hori GEZUR BIRIBILA da!!! Greba espainiar Lan eta Gizarte Ekonomia ministerioaren aurrean behar bezala legeztatuta zegoen, Eusko Legebiltzarrak 09/26ko bere saioan deialdiaz eztabaidatu zuen eta euskal hedabideek greba deialdiaren berri jaso zuten… Hilabete bat pasata, nola ausartzen dira deialdiaren berririk ez zutela esaten jarraitzera eta guri gezurretan jarraitzera? Gure grebarako eskubidea zapaltzen jarraitzera?
Bizkaiko Lurralde Ordezkariaren erabaki –zigor politiko- honen aurkako helegitea jartzeaz gain, gure grebarako eskubidearen urraketa Lan Ikuskaritzan ere salatu dugu, nahiz eta Eusko Jaurlaritzaren menpeko erakundeengan konfiantza gutxi izan… Eta horrela izan da; esparru publikoko langileak garenez, kasu honetan jarduteko eskumenik ez duela argudiatuta, Lan Ikuskaritzak ez ditu gure salaketak onartu. Hala ere, gure salaketarekin beste bideetatik aurrera egiteko asmo irmoa dugu. Ezagunak dira Eusko Jaurlaritzaren eta hura osatzen duten bi alderdi politikoen eta Israeleko estatu terrorista eta hiltzailearen arteko negozio eta harreman luze eta estua.
Gure aldetik, Palestinaren alde eta langileon eskubideen alde borrokatzen jarraituko dugu! Eskubideak bermatzeko, defendatu egin behar dira!
Borroka da bide bakarra!
Xabier Cerezo Ansoleaga eta Imanol Sagarna Mezo
(zigortutako bi irakasleak)
