GOIERROTIK eta ORDIZIAKO OSASUN TALDEAren mezua:
Goierrotik eta Ordiziako Osasun taldeek solasaldia antolatu dute Distopia baten kronika liburuaz eta osasun kooperatiba batez aritzeko.
Solasaldia datorren ostiralean, azaroaren 21ean, arratsaldeko 18:30ean, Ordiziako Barrena Jauregiko areto nagusian izango da.
Distopia baten kronika liburuak Angel Bidaurrazaga sendagile eta medikuntza doktoreak Independentea egunkari digitalean 2022ko martxotik gaur arte idatzitako artikuluak biltzen ditu. Hitzaurrea eta testu edizioa Ihintza Tellabide Amunarriz irakasleak egin ditu.
Angel Bidaurrazaga Vandierdonck (Brusela, Flandria, 1961), sendagilea eta medikuntzan doktorea izateaz gain, EHUn eta UEUn irakasle eta ikertzailea izan da, eta bere ikasleekin Euskal Wikipedian medikuntza arloa garatu du. 2021etik erretiratuta dago, eta Covid iruzurra salatzeagatik hedabideetan zentsuratua eta baztertua izan da. Sendagileen familiakoa da: anaia, iloba, aita eta aitona ere sendagileak ziren. Aitona Anjel zuen, edo Gotzon Bidaurrazaga, sendagile bilbotarra, naturista aitzindaria, 1918ko pandemian gaixoak sendatzen laguntzeagatik ezaguna. 1936ko gerrak erbestera behartutako familia abertzale eta berritzaile batekoa da.
Egilea medikua izanda, pandemian gertatutakoaren berri emateaz eta iruzkin disidenteak egiteaz gain, hor gertatua azaltzeko gako batzuk ematen ditu medikuntzaren historia azalduz eta enpresa farmazeutikoen azken hamarkadetako indarraren ibilbidea deskribatuz. Euskal Herrian gertatuaz gogoeta egiteko balio izango du.
Solasaldian, liburua aurkezteaz gain, Bidaurrazagak berak aldarrikatutako osasun kooperatiba baten beharraz arituko dira: “Osasungintzaren erreferentzia berri bat behar dugu eta osasunaren merkantilizazioari uko egin, kapitalismoak sustatutako joerek eta ‘pandemiak’ bizkortu duten merkantilizazioa”.
GOIERROTIK eta ORDIZIAKO OSASUN TALDEA
