2025eko urrian argitaratu zen Distopia baten kronika Angel Bidaurrazagak Independentean 2022ko martxotik gaur arte idatzitako artikuluekin.
Asteartean Gasteizen izango da Angel Bidaurrazaga liburua aurkezteko. Urtarrilaren 27an, arratsaldeko 19:00etan, Liburutopian izango da.
Eva Forest Liburutopia Gasteizeko alde zaharrean kokatzen den kafe-liburudenda da. Elkarte batek kudeatzen du zeinak helburu ezberdinak dituen, horien artean auzoko loturak indartzea, euskal kultura sustatzea eta pentsamendu kritikoa sustatzea besteak beste. Horretarako liburu aurkezpen eta ekimen ezberdinak antolatzen dira.
Liburuaren idazlea Angel Bidaurrazaga izan da, sendagilea eta medikuntzan doktorea, EHUn eta UEUn irakasle eta ikertzailea izan dena eta bere ikasleekin Euskal Wikipedian medikuntza arloa garatu duena.
Kote Camacho arduratu da diseinuaz eta maketazioaz eta Ihintza Tellabidek egin ditu hitzaurrea eta testu edizioa. Hitzaurreko pasarte batzuk baliatuz kokatuko gara distopia honetan.
Gogoratzen al zarete zer irakurtzen genuen 2020an eta 2021ean euskal prentsan? Adibidez, koronabirusagatik hondartzak desinfektatzean kontuan hartu behar zela produktuak ingurumenarekin errespetuzkoak izatea, zalantzan jarri gabe zer zentzu zuen hondartzak desinfektatzeak. Garai hartako albisteak nola fabrikatu ziren, orain hobeto ulertzen dugu, hedabideen morrontza Eusko Jaurlaritzak ehundaka mila euroz lagundu baitzuen 2021eko abenduan. Zertarako? Angelena bezalako ahotsak ezkutatzeko jaso zuten dirua, besteak beste.
Xoroei mintzo den xoria izan daiteke Independentea. 2020an gure buruari galdetzera iritsi ginen, momentu askotan, ea zoratzen ari ginen, ea ez ginen oker egongo, ea nola zen posible euskaldunok ahotsik ez altxatzea bertsio ofizialaren aurrean. Lehorte informatiboaren erdian, koronaldiarekin kritiko baina erdaraz ari ziren mediku eta biologoak euskaratzen aritu behar izan genuen Independentearen sorreran.
Angelek urteotan Independentean kontatu duena ez du beste inork kontatu Euskal Herrian, euskaraz eta euskaldunontzat, eta ez dakit konturatzen ote garen zein garrantzitsua den gure kontakizun propioa izatea, geure historia geuk idaztea. Balio beza liburu honek, 2020an deklaratu ziguten gerra sanitarioaren aitzakian egindako krimenak ulertzeko eta azaleratzeko.
Euskeraz, Gazteleraz, edo bi hizkuntaz izango da?
Printzipioz euskeraz, erdaldunena xurxulari itzultzaileekin konpondu dezakegu.
Orain arte halan moldatu gara, baina norbaitek gazteleraz galdetzen badu hizkuntza berdinarekin erantzungo diot.