Odol zirkulazioa orekatzeko landare bikaina da elorri zuria

Elorri zuria – Crataegus Monogyna

Kimu eta hosto gazteak entsaladan jaten dira, zaporetsuak dira, fruitu lehorren antzekoak. Hosto lehorrekin infusioak egin daitezke.

Loreak ere entsaladan jan daitezke, arbendola mingots zapore xuabea dute. Elorriaren loreak erreximenta edo jarabeak egiteko ere erabiltzen dira.

Fruituak gordinik ala egosita jan ditzakegu. Ardo edo likoreak egiteko ere erabiltzen dira. Fruituak lehortu egin daitezke, eta gero ehotu, ogia, pasta edo gaileta oreari gehitzeko. Hazi xigortuekin kafearen ordezkoa egin daiteke.

C bitamina, B1, B2 eta B3 bitaminak, kaltzioa, kromoa, kobaltoa, burnia, magnesioa, manganesoa, fosforoa, potasioa, selenioa, silizioa, sodioa, zinka eta aluminioa ditu, batez ere fruituek.

Bihotza eta odol zirkulazioa orekatzeko landare bikaina da elorri zuria.

Loreek zein haziek glukosido zianogenikoak dituzte kopuru txikian. Hauek, dosi handietan pozoitsuak baldin badira ere, neurri apalean hartuta lasaigarriak dira giharrentzat nahiz bihotzarentzat. Kikara bete hazi jan beharko litzateke kalteren bat somatzeko. Hala ere, kontraindikatua dago heterosido kardiotoniko eta benzodiazepina tratamenduekin. Haurdunaldi eta edoskialdian ere saihestu behar da.