Nortasun Agiri hau bidea irekitzen duen lorpena da

Asier Guridi Zaloña, Venezuelako Errepublika Bolivariarrean dagoen euskal errefuxiatu politikoak, lerro hauen bidez gaur asteazkena maiatzak 3, Venezuelako Iheslarien Batzorde Nazionalak (CONARE) ezarritako jarraibideari jarraiki, Venezuelako Migrazio eta Immigrazio Identifikazioko Administrazio Zerbitzuak (SAIME) Venezuelako Nortasun Agiri Nazionala eman didala jakinarazi nahi diot euskal jendarteari. Errefuxiatu baten identifikazio agiria izapidetu edo tramitatzeko betebeharra bete da. Gogoratu Aterpe-egoera aitortzeko ziurtagiriak zehazten zuela Errefuxiatuen Legearen Araudiaren arabera identifikazio-agiri bat tramitatu edo izapidetu behar zela.

Errefuxiatu eta Asiloen Lege Organikoaren Araudiaren 13. artikuluak hauxe dio: «Eskaera onartzen bada, Barne eta Justizia Ministerioak iraganeko (tránsito) bisa emango dio errefuxiatu gisa aitortua izan den pertsonari eta dagokion Nortasun Agiri Nazionala emango zaio. Errefuxiatu eta Asilatuei buruzko Lege Organikoaren 19. artikuluan aurreikusitako eskubideak gauzatzeko aukera emango dio agiri honen eramaile edo titularrari».

Identifikazio-dokumentu horri esker, errefuxiatuen prozesua bururaino eramana izango da eta, aurrerantzean, gizaki guztien berezko giza eskubide unibertsalez gozatu ahal izango dut, funtsezko gizarte-zerbitzuetan sartu eta bizitza duin baterako ezinbesteko finantza-tresnak eskuratu ahal izango ditut. Era berean, erregistro eta auzitegien aurrean jardun ahal izango dut semearen agiriak ordenan jarri eta semeari bere eskubideak transmititzeko beharrezko izapideak edo tramiteak egiteko. Familiari dagozkion eskubideak eskualdatu edo transmititu ahal izateko izapide edo tramiteak ere hasi ahalko dira.

Nortasun Agiri hau bidea irekitzen duen lorpena dela adierazi nahi dut; Venezuelako identifikazio zerbitzuan, SAIMEn, errefuxiatuen identifikazio agiriak tramitatzeko zegoen blokeoa desblokeatu ahal izan da eta orain Venezuelan paperik gabe dauden beste errefuxiatu batzuk dokumentatzeko aukera ere izan beharko luke. Justizia ez da eskertzen; bidezkoa denaren materializazioa besterik ez da eta hori kale dinamikari, desobedientziari eta borrokari esker izan dela ozenki esan behar da.

Zalantzarik gabe, egindako hainbat bilerak eta elkarrizketak; hainbat instituziotan sartutako idatzi kopuru handiak; Venezuelako Fiskaltzaren aurrean 31 eguneko egonaldiak eta oraingoan guztira 146 eguneko ekimen iraunkor eta anitzez egindako dinamikak, Venezuelako Errepublika Bolivariarreko Zuzenbide Estatuaren arabera eta berau betearaziz, emaitza positibo hori posible egin dute. Borrokan etengabe irautea eta desobedientzia erabiltzea baloratu behar da; eskubideen defentsarako eta injustiziaren aurkako herriaren borroka tresnak dira.

Venezuelako Estatuak aitortutako errefuxiatu gisa, Asanblea Nazionalean onartu diren Legeak bete ditzaten nire deia errepikatu nahi diet Venezuelako Errepublika Bolivariarreko erakunde guztiei. Besteak beste, legeak ez betetzeak Venezuelako Errepublika Bolivariarreko Zuzenbide Estatuari erasotzea ekarriko lukeelako. Bereziki, Errefuxiatu eta Asilatuen Lege Organikoa (LORRAA) eta bere Araudia bete beharrekoak dira; baita Venezuelak errefuxiatuen gaian sinatu dituen eta Konstituzio-maila hartzen duten Nazioarteko Itunak ere, hala nola, 1967ko Errefuxiatuen Estatutuari buruzko Protokoloa, eta Protokoloaren lehen artikulua aplikatuz, 1951ko Errefuxiatuen Estatutuari buruzko Hitzarmena 2. artikulutik 34.eraino. Administrazioak eta erakundeak dira Legeetara egokitu eta bete behar dituztenak eta ez alderantziz; inor ez dago Legearen gainetik!

Azkenik, esan nahi dut estimu handia diedala Venezuelako Errepublika Bolibartarrari eta bere agintariei, lehenik errefuxiatu estatusa onartu eta orain errefuxiatu gisa aitortuak diren pertsonei dagokien babes humanitarioa gauzatzen lagunduko duen nortasun agiria izapidetu edo tramitatu izanagatik.

BORROKA LUZE BATEN EMAITZA… AMESTU, SINISTU, EGIN!!!

ASIER GURIDI ZALOÑA
Euskal Errefuxiatu Politikoa Venezuelan