Azken hiru urteetan gertatutakoei erantzun nahian, erakusketa zabalduko dugu 27 artistak datorren astean, Bilboko Errekalde auzoko Kampai espazioan. Ostiralean zabalduko da, pare bat emanaldik lagunduta, eta asteburuan zehar bisitatu ahal izango da.
Testu honen inguruan batu gara guztiak, eta nahi izan duen ekarpena egin du bakoitzak:
Azken hiru urteetan, orain arte ezagutu gabeko eskubide eta askatasun murrizketa handiak bizi izan ditugu osasun-krisia zela eta, eta tabua izan da ezarritako neurrien baliozkotasuna zalantzan jartzea, zientziaren, osasunaren eta etikaren ikuspegitik. Gehienetan, ikuspegi bakarra eman dute komunikabide nagusiek, eta estigmatizatu egin da hortik ateratzen zena, sailkapen orokortuekin, gutxiespenekin eta irainekin. Horrekiko kezkak batzen gaitu erakusketa honetan parte hartzen dugun artistak. Ñabardura asko daude kezka horretan, asko izan daitezke geure ikuspuntuen arteko ezberdintasunak, eta ugariak dira gure zalantzak ere. Ez dugu konponbideak eta erantzunak geure eskuetan ditugunik uste, baina badugu segurtasun partekatu bat: errespetuzko eztabaidaren falta eta iraina ez dira gizarte osasuntsu eta heldu baten ezaugarriak. Egoera sosegatu dela dirudien honetan, ez dugu besterik gabe gertatutakoa ahaztu nahi, eta beharrezkoa iruditzen zaigu iragan hurbil hori eta oraina begirada kritikoz aztertzea. Geure artelanak hemen jarrita, behar hori aldarrikatu nahi dugu. Bizitakoa bizi eta gero, ez da anekdotikoa ekintza sinple hau: eztabaidatzearen eta zalantzak erakustearen aldeko jarrera publikoki agertzea.
Irailak 8-9-10 / Kampai Espazioa. Moncada kalea 5, 3. solairua. Bilbo.
Irekiera: Irailaren 8an, 18etan
19etan, Leire Ugalderen performancea
19:45ean, Andrea Berbois eta Peru Galbeteren kontzertua
Erakusketa zabalik: Irailak 9 eta 10, 11:00-14:00 / 17:00-20:00
Kartelen diseinua: Leire Lacunza
Ni artisten hausnarketa edo bristaden zain eta, horratx, batzuek zerbait adierazi nahi dute. Bejondeizuela, Oier eta konpainia. Jode! Baina 3 urte… amnesia garaia astintzeko, zertxobait sikira, balioko al du.
Zorionak!
Asko estimatzen dut ekintza eder hau eta talante zabal, sortzaile eta komunitate indartzaile hori!
Testua irakurri dut arretaz, eta fin-fina iruditu zait.
“asko izan daitezke geure ikuspuntuen arteko ezberdintasunak, eta ugariak dira gure zalantzak ere.”
Ziur gu ere, errespetuzko elkarrizketa, gizarte osasuntsu eta heldu baten oinarri.
Bejondeizuela!