Barau egitea erabakitzea ez da erraza, motibazio sendoa eta ondo informatuta egotea beharrezkoak dira. Nola eta zergatik utzi jateari? Janariaren bidez ez ditugu gure behar fisikoak bakarrik asebetetzen. Jakina da behar emozionalak eta sozialak ere janariarekin betetzen ditugula: asperduratik eta bakardadetik ihes egitea, urduritasuna baretzea, hutsune desberdinak estaltzea, lagunekin zerbait partekatzea eta abar luze bat.
Nire kasuan, ura baino ez hartuz lehenengo barau osoa egitea erabaki baino lehen, ondo irakurrita nuen Karmelo Bizkarraren “El poder curativo del ayuno”. Horrela, ziurtasun osoa nuen barauak onurak baino ez zizkidala ekarriko. Etxean egitea erabaki nuen, inork ez zidan trabarik egingo, bakarrik bizi bainintzen. Hozkailua hustu tentaziorik ez izateko eta nahiko eskuragarri egoten diren elikagaiak ere ikusiko ez nituela ziurtatzeko neurriak hartu nituen, hain zaila iruditzen zitzaidan egin asmo nuena.
Hamabost egunez esperientzia berezia bizi izan nuen, zorte handiarekin-edo, apenas eduki nuen desintoxikazio sintoma desatseginik, eta, janaria prestatzeak ematen duen lanetik libre nengoenez, egun osoa zen hondartzatik ibiltzeko, eguzkia hartzeko, parkera joateko, irakurtzeko, pentsatzeko. Azken finean, neure buruarekin egoteko. Eta, argaltzeaz gain, aldaketa batzuk nabaritu nituen: nire zentzumenak zorroztu ziren, nire hautematea desberdina zen, nire sentiberatasuna handitu zen. Baraualdia norberaren barrura begira egoteko denbora egokia dela egiaztatu ahal izan nuen. Egia da, barauari buruzko liburuetan azaltzen den bezala, barauak kontzientziaren hedapenari laguntzen diola.
Handik urte batzuetara, bigarren barau osoa erabat desberdina izan zen. Profesionalen laguntzarekin, taldean egin nuen, osasun arazoak konpondu nahi zituzten beste pertsona batzuekin batera; nik hipertiroidismoa nuen. Sintoma ugari eta oso desatseginak eduki nituen, mingarriak ere bai, eta laguntza profesionala behar izan nuen krisialditik irteteko. Aholku medikoa gutxienez hamar eguneko baraualdia egitea zen, baina ni hain etsita nengoen sintoma haiekin, ezen eta zazpigarrenean baraualditik irtetea erabaki nuen, nire gutxienekoa bete nuen. Egin zidaten hurrengo analitikan hipertiroidismoa txikiagoa zen.
Ez nuen hain sintoma desatseginik eta mingarririk berriro eduki nahi barau egin bitartean, eta, honengatik, hurrengoan barazki eta fruten zukuen bidezko baraua egitea erabaki nuen, dieta likidarianoa ere deitzen dena. Asko gozatu nuen barau mota hau eta askotan errepikatu dut. Asko dira egin daitezkeen nahasketak eta lortzen diren zaporeak plazer handia dira. Ez dago inolako sintoma desatseginik, gorputza desintoxikatu egiten da, baina energia nahikoa du gutxieneko batzuk egin ahal izateko. Honi buruz jakin nahi duenari Steve Meyerowitz-en “Ayuno con zumos y desintoxicación” liburua gomendatzen diot.
Amaitzeko, hipertiroidismoa barau hauek eginez erabat sendatu zitzaidala kontatuko dizuet, Osakidetzako familia medikuaren eta endokrinologoaren harridurarako. Gainera, osasun reset bat egiteko modurik onena iruditzen zait.
Beraz, uztailaren 21etik 27ra Independenteak antolatu duen baraualdira etortzera animatzen zaituztet, lagunarte ederrean damutuko ez zareten esperientzia berri bat bizitzera.
Noiz: 2023ko uztailaren 21etik 27ra
Non: Bergarako Elosuko aterpean
Izen emateko epea:
EGUNERAKETA: uztailaren 20ra arte luzatu da epea.
Garrantzitsua: Baraurako Prestaketa Dieta
Prestatu zaitez barauari buruz egunero zertxobait irakurriz:
independentea.eus/etiketa/baraua
Iradokizunik? Zalantzarik?
Idatziguzu: baraualdia@gmail.com
Deitu: 623416512
Ze polita zure esperientzia! Eskerrik asko partekatzeagatik Ane Miren. Laster ezagutuko dugu elkar
Mila esker, Ane! Abstentzio zale, zein bozkazale, Elosun barauzale ;-)!
Ane Miren… Zure hipertiroidismoaren sendabidearen narrazio zehatza egin behar duzu, kaltetutako beste pertsona batzuen orientazio gisa balio duena. “Besteek jarraitu ditzaketen oinatzak uzten ari gara”