Izate atzendua

Birus batekin higatu dute
jendearen osasuna.
Atzendu dugu gure izatea
eta galdu nortasuna.
Debekatutako hitza bihurtu
da gure askatasuna.
Urrunkeria nagusituta,
urrundu hurbiltasuna.
Erne, normala bihur daiteke
gaurko menpekotasuna.

Hau ez da inolaz berez etorri,
guretzat dute ekarri.
Agenda baten urratsak dira,
boterearen egarri.
Teknologiaren adimena
gure gainetik ezarri.
Etorkizuna nahi ez badugu
beren eskuetan jarri,
gure barneko indar guzia
behar dugu iratzarri.

Next Generation limosnarekin
heldu da berpizkundea.
Txotxongiloen gisara dabil
gaurko euskal erakundea.
Baina orainik ez da ohartu
Euskal Herriko jendea,
noren neurrira egin nahi duten
hogeita batgarren mendea.

Etorkizuna soilik omen da
digitalizazioa.
Politikoek eman diote
honi bedeinkazioa.
Berdez margotuz egikaritu
daiteke ekuazioa,
ezker ta eskuin abertzaleak
batzen dituen fikzioa.

Basque Research edo Basque Culinary
orain dugu dena basque
Osasunaren negozioan
pozik dabil Ikerbasque.
Euskal Herriko unibertsitate
hortara zoazte, zoazte.
“Zientziaren” dogma onartu ezkero
izanen zarete “aske”.

Orain “zientziak” duen lekua
lehenago erlijioak.
Lehengo apaizen indarra orain
aditu prodijioak.
Inkisizio papera hartu
medikuen kolegioak.
Desertorerik ez du onartzen
ejerzitoen legioak.

Baina orainik bagara batzuk
jabetu gara xarmanki.
Elite horien musika ez da
dantzatzeko horren punki.
Diruak beti kolore bera
du txinatar edo yanqui,
Euskal Herria ez da inoiz izanen
zuek nahi duzuen Basque Country.