Magufo, nor da nor?
Aste huntan, X sarean, magufo deitu nauen txiolari bati erantzuteko asmoz, animatu naiz lerro hauen idaztera. Lehenik, magufo hitz espainolaren definizioa bilatu ondoan, zehaztu nahi dut ez dudala ezer saltzen eta argi dago ez naizela zientzialaria; kazetari izana naiz garai batez, hartaz esperientzia badut albisteen tratamenduan, komunikazio gaietan, eta kuriositate handia dut alor ezberdinetan, batez ere kontzientziak barnetik xuxurlatzen didan momentuetan. Goazen harira!
Ni ezagutu gabe, magufo naizela erran didan herritarra bezala, jende askok telebistan, hedabide ofizialetan agertzen diren iturri ofizialetako albisteak sinisten dituzte, egia bakar balitz bezala. Ni kazetari izan ondoan ohartu naiz, norainoko manipulazio/gezur hedatze tresna izugarriak diren hedabideak, agintean dauden erakunde eta buru publiko edo pribatuen interesen arabera. Mikroaren atzean egon naizen urte luzeetan, gezur andana hedatu eta egia batzuk auto-zentsuratu ondoan, manipulazioaren neurriaz oharturik, ogibidez aldatzea hobe zela erabaki dut nire kontzientziarekin nuen deserosotasuna handitzen zen heinean. Argi da profesional onak badirela denetan, kazetarien artean ere bai, eta ez dut jende guztia zaku berean inoiz sartzen. Tamalez, soldata galtzearen beldurrez, eta erredakzio eztabaidetan politikoki zuzen gisa inposatzen den ikuspuntua eztabaidatzeak eragin dezakeen ezinegona saihesteko, profesional askok onartzen du gainetik diskretuki datorren iritzi ildoa. Bizitakoarekin ikasgaia harturik eta eskerturik, hasi naiz arreta jartzen instituzioek eta gizarte gehiengo batek azkarregi zentsuratzen duen gaietan, trufatzen edo baztertzen dituzten ideietan, zientzialarietan eta pertsonetan… eta, aizue, betitik nituen pentsatzeko eskemak pikutara joan zaizkit.
lan sakon bezain deseroso hori hasi dudanetik, askoz hobeto noa nire bidetik
Kuriositateak gauza esperimentatzera eraman nau gero. Bai, reikia, konstelazioak, xamanismoa bezalako terapiak, jarduerak probatu ditut; eta badakizue zer? Nire eguneroko bizitzan, harremanetan, ulermenean ekarpen onuragarria izateaz gain, bertan bizitakoa, ikasitakoa askoz errealagoa, eraginkorragoa egin zait, hedabideetako albisteak edo politikarien hitzak baino. Bai, aldatu dira goitik behera aspalditik nituen hainbat pentsatzeko eskema, segurtamen. Eta aizu, lan sakon bezain deseroso hori hasi dudanetik, askoz hobeto noa nire bidetik eta egunero eskertzen dut bizia, lan pertsonal hori egitera eramanik, indar hori emanik, nire barne mugak askaturik.
Batzuek uste dute Pradales, Etxegarai, Santxez, Abascal, Macron, Le Pen, Biden Trump, Melenchon edota Otxandiano bezalakoen hitzetan sinistu behar dela, hor dagoela mundua aldatzeko gakoa. Gizartean oro har munduko agintariek sortzen dituzten arau, lege edota irizpideak (krisi faltsuen ondorioz sortzen direnak, covid garaiko guztiak edota klimaren aitzakiapean orain jartzen diren IGE eremuak, edo ura kentzearena leku publikoetan…) jendeen edo lurraren onerako inposatzen dituztela sinisten du ere askok. Nik ez. Bozkatzeko adina dudanetik, hauteskunde garai guztiek erakutsi didate kolore guztietako politikarien hitz ederren atzean, sistema ez aldatzea dela aulkian egoteko ezinbesteko jarrera. Alegia, boterera iristeko eta bertan egoteko, “sasi-iraultzaileek” ere argi dute joko araua, politikoki zuzenaren aldean egoteko arauarena, jokabide zehatz, zorrotz eta mugatua asumituz. Politikan jolasteko, politikaren joko araua onartu, asumitu behar duzu, hor dago koska, hor dago tranpa.
sasi-iraultzaileek ere argi dute sistema ez aldatzea dela aulkian egoteko ezinbesteko jarrera. Haiek ere joko bereko aurpegiak dira, sistemaren panpinak
Politika bilakatu da herritarren mendekotasuna eta miseria iraunarazteko oinarrizko tresna, jendea zatitzeko, elkarren kontra jartzeko ezinbesteko gailua; egiazki gauzak aldatzeko, denbora galtze hutsa… Ezkerretik eskuinera, muturretik muturrera, denak joko bereko aurpegiak dira, sistemaren panpinak.
Azken urteetan dena azkartu da; bai, covidak inoiz baino gehiago berretsi du, agerian utzi du hedabideen eta mundu kapitalistaren, eliteen tresna ezberdinen manipulazio maila, eta arriskua bide batez… Kapitalismoko dirudunek nahikoa botere dute prentsa, zientzia edota politika alorreko aktoreak erosteko eta hori egiten dute, diskurtso bakarra erraz nonahi hedatzeko. Gogoratu behar da, adibidez, euskal hedabide batzuek B. Gates OMSeko buruaren dirua eskuratu dutela, diskurtso ofizialaren kontra zeuden zientzialariak, adituak, iritziak zentsuratzeko; hori egin dute GURE hedabide gehienetan.
Orduan, magufoa nor da, nor da sasi-zientzia hedatzen duena eta hartaz bere poltsikoak betetzen saiatzen dena?
Nik ez zaitut konbentzitu nahi, ez dut ezer saldu nahi, bai ordea informatu. Informatu zaitez munduan etika duten eta diru gosez ez dauden milaka zientzialarik diotenaz, RNA teknikaren arriskuez, txertoen orokortzearen arriskuez, txerto kanpainen ondorio larriez, klima aldatzeko teknologiaz, sute eta uholde batzuen atzean dauden gertakariez, elitearen helburu ezkutuez, 2030 AGENDAren egiazko helburuez, masaren manipulazio teknika orokortuez… alde batetik eta bestetik, neurozientzietan dauden aurrerapausoez, kontzientzia modifikatuaren indarraz, gaitasunez, meditazioaren onurez, pentsamoldeen garrantziaz, kontrolaz, gorputzaren gaitasun naturalez, naturaren milaka ekarpenez…
Interneten milaka dokumentu topatuko dituzu nik aipatutako gaiez, interesa baduzu.
Porzierto, galdetu diozu zure buruari zergatik debekatu edo hetsarazi nahi dituzten adierazpen askatasuna defenditzen duten sare sozialak?
Gero, nahi duzunean, kafea hartu eta magufoa nor den, alegia zer, nor, nola sinistu aipatzen ahalko dugu modu lasaian… epairik gabe.
Bestela, segi albistegiak behatzen, politikoki zuzenak diren lerroburuak soilik sinetsiz uros bizi, eta utzi ezagutzen ez duzuna arinki epaitzeari, plazer baduzu. Uros bizi, paradisutar hori!
Bejondeizula Jasone, ni zurekin nago bete-betean!. Zenbat eta gehio hitzegiten duten zikinduagoak ikusten ditut.
Zorionak guztia hain ongi planteatu duzulako, itu-ituan jo duzu. Baina oraindik badira milaka pertsona “kaja tontak” eta egunkariek esaten dutena oso-osorik sinisten dutenak, ez diote buruari eragiten, ez dute egia jakin nahi, ez ezagutu nahi.
Kezkagarriena klase politikoarena da. Klase politiko osoa erosita dago eta agintari handien interesei lotuta dago. Butakek eta soldatek irentsi egin dituzte. Jada ez dituzte beren kontu pertsonalak baino defenditzen.
“Jendea dagoen lekuan egon behar dugu hedabideok !”
(gaurko Argian:
https://t.me/ARGIAeus/13064 )
Oso iritzi artikulu zuzena eta benetakoa idatzi duzu, Jasone! Bejondeizula argitasungatik, ausardiagatik eta egiak hain modu zuzen eta borobilean azaltzeagatik. Ezin dugu egia saldu hain merke eta ezin dugu gure espiritu kritikoa mundua manejatu nahi dutenen eskuetan utzi. Aupa, Jasone! Eutsi goiari!
“Kuriositateak gauza esperimentatzera eraman nau gero. Bai, reikia, konstelazioak, xamanismoa bezalako terapiak, jarduerak probatu ditut; eta badakizue zer? Nire eguneroko bizitzan, harremanetan, ulermenean ekarpen onuragarria izateaz gain, bertan bizitakoa, ikasitakoa askoz errealagoa, eraginkorragoa egin zait, hedabideetako albisteak edo politikarien hitzak baino. Bai, aldatu dira goitik behera aspalditik nituen hainbat pentsatzeko eskema, segurtamen. Eta aizu, lan sakon bezain deseroso hori hasi dudanetik, askoz hobeto noa nire bidetik eta egunero eskertzen dut bizia, lan pertsonal hori egitera eramanik, indar hori emanik, nire barne mugak askaturik”.
Niri berdin-berdina gertatu zait. Aupa Jasone!
“Politikan jolasteko, politikaren joko araua onartu, asumitu behar duzu, hor dago koska, hor dago tranpa”.
Hala da, bai.