Urriaren 27ko auzolanaren biharamunean Departamenduko lehendakariak igorritako gutunari (behean ikusgai) hauxe erantzun dio herriBiltzak:
Kontseilu Departamentaleko lehendakari jauna, agur,
Zuregandik eskuratu dugun gutunak ez ditu gure eskaerak asetzen.
Hain zuzen:
- Bide departamentaletako seinaletikarentzat egin dizuegun eskaerari buruz ez du aipamenik egiten.
- Behin eta berriz egin dizuegun bilkura eskaerari buruz ez du aipamenik egiten erez.
Gogoratzen dizuegu, Euskal Herriko bide departamentaletako seinaletikan lehentasuna eta nagusitasuna euskarari emaitea eskatzen dizuegula.
Eskaera hori berregiteko, aste honetan auzolan berria burutu dugu: euskara bigarren mailan tratatzen duen bide departamental bateko taula bat kendu eta ostegunean Departamenduaren Baionako ordezkaritzaren eskuetan utzi ginuen.
Eskatzen ditugun aldaketak Departamenduak egiten hasi arte, euskara bigarren mailako hizkuntza bezala tratatzen dituzten bide seinaletikako taulak kentzeko auzolanekin segituko dugu, euskarak ezin duelako itxoin.
Gauzak hola, azaroaren 5ean, taula batzuk kenduko ditugu eta helaraziko dizkizuegu, euskara lehen mailan ezar dezazuen.
Eta berriz ere, elgarrekin gai hauek aipa ditzagun bilkura bat antolatzea eskatzen dizuegu.
Har ezazu, lehendakari jauna, gure agur zintzoa.
herriBiltza
2022ko urriaren 30a
