Hiru zigor
2025ean Europako Kontseiluak, Errusiaren aurkako zigorren markoan, hainbat zigorturen artean (tipikoki, Europar Batasunetik kanpo bizi diren errusiar politiko eta aberatsen artean) mendebaldeko Europako lagun batzuk — informatzaile, ekintzaile, iritzi-emale batzuk — zigortu ditu.
Lagun hauei kontuak itxi dizkiete; ezin dute banku-txartelik erabili, ezin dute bidaiatu (ezin Europako mugarik zeharkatu, ezin haren aire-espazioetan ibili); ez dakite lan egin dezaketen… Ezin dute, behintzat, inorengandik dirurik jaso — emaile zein hartzailearentzat kartzelaratuak izateko arriskuz.
Zigortu horietako hiru aitatuko ditut.
Hüseyin Dogru, 50 urtekoa, alemaniarra da, palestinarren aldeko Red Mediakoa.
Gazako genozidioa salatzeaz, palestinarrei (“terroristei”) ahotsa emanez, “errusiar desinformazioaren aktorea” dela dio Europako Kontseiluak. Arrazoibidea, entzutekoa da: “Diskordia etniko, politiko eta erlijiosoak eragiten ditu” eta, beraz, “Errusiaren aktibitate desestabilizatzaileak” laguntzen ditu. Noski, Europar Batasuna desestabilizatzea Errusiaren mesedean baino ez baitaiteke izan…
Nathalie Yamb, 56 urtekoa, suitzar-kamerundarra da, aktibista antikoloniala, afrikar soberaniaren aldekoa, France-Afriqueren aurkaria, hori dela-ta lehen ere Frantziak zigortu zuena.
“Moskuren lengoaia bere eginez eta Frantzia eta Mendebaldea jomugatzat hartuz, haiek afrikar kontinentetik baztertzeko asmoz, Errusiaren alde egiten du. (…) Beraz, demokrazia, zuzenbide estatua, Europar Batasuneko estabilitatea edo segurtasuna konprometitzen dituzten ekintzak babesten ditu”.
Yamb-ek ohartarazi du, bere aspaldiko ekinbideetan, Afrikan, askotan ikusi izan dituela horrelakoak (aurkariei bizitza gaiztotzea, atxilotzea, hiltzea)… Orain, Europara heltzen ari dela gaitza.
Dogru eta Yamb 2025eko maiatzetik zigortuta daudelarik, Jacques Baud (Xavier Moreaurekin batean), abenduan zigortu dute.
Jacques Baud, beraz: 70 urte, Suitzako koronel-ohia, Belgikan bizi dena. Europar Kontseiluaren erabakiaren arabera, “Errusiaren aldeko propagandaren bozeramaile” da.
Baud aski ezaguna denez, eta ezagutzen dutenek Errusiaren aldekoa ez dela dakitelarik, haren aurkako zigorrak espiritu asko ernarazi ditu.
Baud-en beraren ustez, Frantziatik heldu da Europako Kontseilura bera zigortzeko aholkua eta, antza, Suitzak bere onespena eman du.
Zigorrak, ez gara harrituko, ez dira legezkoak. Zein legek debekatzen du, adibidez, inor hala izatera ere, “Errusiaren aldekoa” izatea?… Ez dago auzitegirik, ez epaimahairik, ez, noski, defentsarako eskubiderik ere. Zigorrok, beraz, EBeko “politiko burokratek” erabaki dituzte. Ezin jakin nork; ezin jakin, hortaz, nola “zerrenda beltzetik” atera litezkeen. Errugabetasun presuntziorik ez dago; aitzitik, kontrakoa erakusten ez den bitartean, errudunak izango dira. Zigorrari buelta emateko prozedurak kafkiarrak eta ezin ahalakoak dira…
Europako eliteen ahulezia eta beldurra adierazten dituzte debeku horiek
Europako eliteen ahulezia eta beldurra adierazten dituzte debeku horiek. Haien sokako komunikabide nagusiek zabaltzen dituzten gezur eta desinformazioaren aurrean, hainbat herritarrek ez dute onartzen isilik geratzea…
Atentzio emangarria da, eta interesgarria oso, bide batez esateko, zigortuen dibertsitate ideologikoa…
Sarrarazi nahi diguten beldurraren aurrean, esan du Nathalie Yambek, “sarea behar dugu, eta (…) ekosistema berriak antolatu, Europa okupatutik aparte”.
Sukaldaritza saioak errebisatzen hasten badira, David de Jorge giltzapera bidaliko dute zuzenean.
Erahilketa zibila