Piztu Donostia
ELKARTASUN AGIRIA:
Datorren urtarrilaren 29an epaitegitik pasa beharko dute Joseba eta Eñaut Alvarezek, 2 urte t’erdi eta 1 urte t’erdiko espetxe zigor eskaerekin. Zigor eskaera hauek, 2023ko Donostia Egunaren bezperan Plaza Berrian (Konstituzio Plaza) ETXERA jartzen zuen pankarta zintzilikatu nahi izatearen ondorio dira.
2 urte t’erdi eta urte 1 t’erdi
Euskal Herriko auzo eta herrietako jaiak festarako eta aldarrikapenerako espazioak izan dira beti, biak jai giroan uztarturik. Donostiako San Sebastian Eguna ez da salbuespena eta ohikoa da aldarrikapen ezberdinak hiriko kale eta plazetan presente egotea. Hala, urte askotan egin dugun moduan, Euskal Herriaren askatasunaren alde borrokatzeagatik espetxean dauden lagun eta senideen etxeratzea aldarrikatzen zuen bandera zintzilikatzeko asmoz bertaratu ginen Plaza Berrira hainbat herritar.
Bandera kolokatzeari ekin genionean, Plaza Berrian zeuden Udaltzainak, aldarrikapen ezberdinak jartzea debekatua dagoela esan eta errefortzuak eskatzearekin batera, herritarron aurka oldartu ziren. Borra eta ezkutuak baliatuz, oihu eta mehatxu artean, bandera jartzen ari ginen herritarron aurka egin zuten Udaltzainek. Azkenean laban bat baliatuz banderaren soketako bat moztea lortu zuten, pankarta jartzea ezinezko eginez.
Pasa den maiatzaren 18an, Udaltzaingoak ezarritako salaketaren ondorioz eta nahiz eta gertaeren egunean poliziak ez zuen inor identifikatu, Eñaut eta Joseba Alvarezek epaitegira deklaratzera joan behar izan zuten. Geroztik, fiskaltzak eta akusazio partikularrak Eñaut Alvarezi urte t’erdiko espetxe zigor eskaera egin dio eta bi urte t’erdikoa Joseba Alvarezi, autoritateari atentatua eta lesioak eragitea egotzita. Era berean, isun administratibo bana ere jaso dute biek, 750€koa, Mozal Lege bezala ezaguna den arautegia aplikatuta.
Oso gertaera larria deritzogu kalean aldarrikapen ezberdinak jartzen ari diren herritarren aurka poliziak era honetan ekiteari, baina are larriagotzat jotzen dugu gertaerak judizializatu eta ondorio penalak bilatzea, Eñaut eta Joseba Alvarezen kasuan gertatu den moduan
PIZTU Donostiatik, agiri honekin batera, ostiralean (urtarrilaren 17an) 18:30ean Bulebarrean adierazpen askatasunaren alde antolaturiko elkarretaratzean parte hartzera, bai eta urtarrilaren 29an Eñaut eta Joseba Alvarezekin elkartasunez 9:00etan Donostiako Epaitegietara bertaratzera animatu nahi ditugu Donostiako eragile sozial, sindikal eta politikoak. Oso gertaera larria deritzogu kalean aldarrikapen ezberdinak jartzen ari diren herritarren aurka poliziak era honetan ekiteari, baina are larriagotzat jotzen dugu gertaerak judizializatu eta ondorio penalak bilatzea, Eñaut eta Joseba Alvarezen kasuan gertatu den moduan.
Adierazpen askatasunaren eta oinarrizko eskubide sozial, zibil eta politikoen aurkako beste gertaera baten aurrean gaudela salatu nahi dugu berriro ere, eta auziperatuak izan diren Eñaut eta Joseba Alvarezi gure babes osoa adierazi, propaganda politikoa jartzea delitua ez dela gogoratuz eta, beraz, beraien aurkako zigorrak lekurik ez duela azpimarratuz.
Azkenik, mota guztietako oztopoen gainetik, Euskal Herriko kale, plaza eta jaietan propaganda politikoa egiten jarraituko dugula azpimarratu nahi dugu.
ADIERAZPEN ASKATASUNA!
EPAIKETA POLITIKORIK EZ!
Piztu Donostia
Azkenean espetxerik ez, eskerrak; isuna bai…
https://www.argia.eus/albistea/ez-espetxe-zigorrik-ez-autoritateari-atentaturik-alvarez-aita-semeentzat-azkenean