Badira idazteko besteak baino konplikatuagoak diren artikuluak. Ikuspuntu anitzetatik, ezohikoa, ulergaitza, jokoz edo ohikoz kanpokoa delako, ez da erraz halako idazki bat proposatzea. Euskaraz ere gai ezberdinak kontatzeko beharra dagoelako eta, mundu ilun eta ero honetan, mundu ikusezinak ulermen bide berriak ekar ditzakeelako, hemen duzue Béatrice Boninekin egin dudan elkarrizketa luzearen bigarren zatia, euskarara itzulita. Milesker Independenteari ezohiko formatuan, ezohiko gai honi buruz idazteko aukera emanik; irakurle begiluze bati interesa piztuko zaiolakoan…
BÉATRICE ETA JULIE BONIN AMA-ALABEI ELKARRIZKETA
(Honen jarraipena da).
J. I. — Konexioa, komunikazioa, telepatia… Azalduko al dizkiguzu teknika desberdinak, baita egoera desberdinak eta harrigarriak ere?
B. B. — Hasieran, konexioaren bidezko adierazpen metodoa pertsona mutuek beren burua adierazteko tresna bat zen. Baina azkar hedatu zen esparru horretatik, izan ere, hildako pertsonekin loturak edukitzen hasi ginen eta gero naturarekiko, animaliekiko, mundu honetako izaki bizidun guztiekiko.
Edozein lege unibertsal bezala, denok barne-barnean dugun legea da, eta hortik haratago, garatu eta jarraitu behar dugun etika bat dago.
Zoritxarrez, askotan, fenomeno bat ulertzen ez dutenean, existitzen ez dela esaten dute eta horrela eztabaida asko saihesten dituzte
Zoritxarrez, zientziak eta zientzialari handiek askotan legeztatzen duten mundu batean, fenomeno bat ulertzen ez dutenean, existitzen ez dela esaten dute eta horrela eztabaida asko saihesten dituzte. Beraz, aldea dago irakasten zaigunaren, azaltzen zaigunaren eta gero bizi eta esperimentatzen dugun guztiaren artean. Horregatik, liburuan hainbat kapitulu eskaintzen zaizkio zientziari eta zientifikoki frogatu diren konexio legeei, ikerketa askoren oinarri guztiak zorrotzak eta zientifikoak direla azpimarratuz. Hemen ez gaude New Age edota Baba Coolen gutxi gorabeherakoan; liburu honetan, lege kopuru baten existentziaren frogapen zientifiko zorrotzean gaude, batez ere fisika kuantikoaren edota telepatiaren azken ikerketei esker. Oso garrantzitsua zen Julie eta niretzat liburu honetan konexio bidezko esamoldearen oinarriaren egia eta errealitatea erakusten duten ikerketa guztiak aurkeztea, hau da, bihotzetik bihotzera telepatia, jakinda komunikazio bide hori ez dela izakien bihotzetara, ulertzen ditugun gizakietara soilik, baizik eta izaki bizidun guztietara, edozein dela ere bere forma, bere egoera, izaki hori espazio-denboran kokatuta dagoen lekuan.
— Imajina dezaket ulertezintasuna, edo bazterketa, mingarria bihur daitekeela halako egoera batean.
Uste dut ulermen eza edo ulertzeko ezintasuna, zenbait zirkulutan, zientifikoetan, medikoetan eta beste alor anitzetan, mendeetan zehar errepikatzen dela. Galileo eta Leonardo da Vinciren adibideak hor daude. Zaila da bizitzea? Gehiago edo gutxiago. Oso zaila bihur daitekeen uneak daude, batzuetan jazarpena tortura bihur daiteke, modu ezberdinetan. Hemen, Euskal Herrian, ondo dakigu zer jasan zuten “sorginek”… Eta, beste modu batzuetan ere, ez gaude horretatik hain urrun. Julierekin, batzuek sutan erre beharreko sorginak bezala hartzen gintuzten. Beno, azken finean, gure eginkizuna gauzak astintzea eta mugak gainditzea da. Misio bat da guretzat, egia esan, ez da beti erraza izaten, baina hasieratik onartu genuen, beraz, gure esku dago hura hartzea.
— Connexions liburuaren pasarte batean diozu garai berezia bizi dugula, zeinean baltsako indarra garatzeko deia entzuten den, mundu eterikoan lanean dabilen indar bat, Iturriko argiz jantzitako mundu bat elkarrekin sortzeko, dualitatetik harago. Munduan antzeko mezua errepikatzen da, alor eta jatorri ezberdinetako jende eta zuhur espiritualen artean.
Beti zalantzak izaten ditut “mundu espirituala” terminoa erabiltzeko, zoritxarrez, gehiegi eta tarteka gaizki erabili izan den terminoa baita. Edozein mikrokosmosetan bezala, espiritualtasunaren munduan ere, batzuetan garia lastotik bereizi behar dugu, baita espiritualtasunaren munduko buru gisa aurkezten direnengandik ere. Bestalde, konbentzituta nago lanean ari diren jende askoz gehiago dagoela. Baina oro har, jende diskretuak dira eta ez dira nahitaez espiritualtasunaren munduko krema izateaz harrotzen. Argi da jende horren artean ahalmen urriko haurrak edo haur autista anitz direla.
Zalantzak izaten ditut mundu espirituala terminoa erabiltzeko, gehiegi eta tarteka gaizki erabili izan den terminoa baita
— Idazten duzu ere gaur egungo zientziak berresten dituela arbasoen tradizioak, errituen, ezagutzaren, irudikapenen edota testuen bidez gordetzen saiatu direnak. Euskal Herrian, mitologiak ditu gorde erritu, mito, espiritu eta beste Jainkosa edo Jainko askoren memoriak. Uste duzu eginkizun berezi bat bete behar luketela planeta honetako herri autoktonoen sinesmen, ohitura edota errituek?
Jokatzeko rol bat baino askoz harago doa; niretzat funtsezko eginkizuna da. Uste dut izaki hauek, edozein izen ematen diegula ere, edozein herrialdetan, beti egon direla hor, beti daudela hor, eta beti egongo direla.
Orain, gure esku dago haiekin berriro konektatzea; uste dut hori funtsezkoa dela. Eta hori da Connexions liburu honen helburua, argi uztea gizateria berria eta, ondorioz, gizateriaren etorkizuna, sortzetik dugun gure dohainekin berriro konektatzeko erakutsiko dugun gaitasunaren araberakoa izango dela. Eta horien artean konektatzeko dohaina dago, bizirik, dardaratsu dagoen guztiarekin. Naturan bizi den guztiarekin hasita, biztanleak edozein direla ere. Arbasoen tradizioez egin genuen lehen sinposioaren gaia hau izan zen: “Arbasoen Medikuntza, Etorkizuneko Medikuntza. Arbasoen Medikuntza, Medikuntza Kuantikoa”. Horrek argi erakusten du zein funtsezkoa den Julie eta niretzat arbasoen tradizioarekin lotura duen guztia; gure oinarriak baino gehiago, gure hasierako zutabeak dira. Ezinbestekoa da berriro ikastea, oraindik ikasi ez dutenentzat, gure seme-alabentzat nola konektatu naturarekin eta naturako izaki guztiekin, izan ikusgaiak edo izan ofizialki ikusezinak. Julie gosaltzen ari denean, kanpora begira jartzen da (baso baten ondoan bizi gira) eta badakit etxean sartu diren lamina batzuekin konektatu dela. Nire aldetik, oso zorte ona izan nuen, egun batean, errepidea zeharkatzen ari zen lamina batekin topo egitean. Badakit halakoak erratean batzuek erotzat hartuko nautela, baina hori da errealitatea. Zortea dut ere jatorriz afrikarra den senarra dudalako, eta Afrikara joaten zarenean, lurraren, uraren, haizearen, naturaren izpirituekin konektatzea normala da haientzat. Horrekin guztiarekin konektatuta ez egotea anormal bihurtzen da. Anormala dena da jendea eta batez ere haurrak erabat deskonektatuak direnean denetatik, hori bada kezkatzekoa.
Gizateriaren etorkizuna sortzetik dugun gure dohainekin berriro konektatzeko erakutsiko dugun gaitasunaren araberakoa izango da
— Zure ustez, zein izan liteke gaur egun euskal lurretako Mari Jainkosaren mezua, adibidez?
Beraz, mezua biziki sinple izaten da: Entzun gaitzazu.
Zergatik? Ahaztu ohi dugun edo entzun nahi ez dugun jakinduria dutelako. Naturaren jakinduria dute, guk baino hobeto dakite zer egin behar den ura kudeatzeko, lurra zaintzeko, nekazaritzarako… Laburbilduz, guk baino hobeto dakite zer egin behar den naturaren kudeaketarako, eta guk baino hobeto dakite nor garen funtsean edota zertarako egon behar dugun hemen. Beraz, bai, bi hitzetan laburbil daiteke Mariren mezua : Entzun gaitzazu.
— Euskal Herrian bizitzeko zuen erabakia nondik dator?
Lehenengo interpretazioa, sinpleena eta pragmatikoena, hau da: euskaldunak bihotzez betidanik gara, izan ere, nire kasuan, hamar urte nituenean Euskal Herrian egon nintzen behin eta, lur hau zapaldu nuenean, etxean bezala sentitu nintzen. Geroztik beti erraten nuen, ezkontzean eta seme-alabak izatean, hemen kokatuko ginela familian. Nire senarra ezagutu nuenean Euskal Herrira ekarri nuen eta gauza berdina sentitu zuen. Nire seme-alabei dagokienez, %100ean euskaldunak dira. Semea Donibane Lohitzundarra, bigarren alaba Irisarrin bizi da eta gu Julierekin Uztaritzen gira, eta ez ditugu mugituko!
Gero, beste irakurketa bat hartzen badugu, nire aitzineko bizitzak begiratzeko aukera izan nuen eta noizbait, nonbait, euskal pirata izan nintzen.
— Esan diezaiekezu irakurle interesatuei non eta nola hobeto ezagutu dezaketen zure lana eta zure ibilbidea?
Gure bi liburuak ezagutzera gonbidatzen ditut lehenik, Le Cercle Magique eta Connexions, gure ibilbidea hobeto ulertzeko. Gero, julieetbeatriceb.com webgunea hor dago, gurekin harremanetan sartzeko, edozein kontsulta eskatzeko edota Lapurdi aldean antolatzen ditugun prestakuntza saioez informazioa edukitzeko. Jakin behar da Julierekin egoteko eta hura ezagutzeko eskaera anitz eduki ditugula, eta haren osasuna babesteko bisitak mugatu behar izan ditugula. Azkenik, Independentean eskaintzen didazuen aukera baliatu nahi dut, bihotz-bihotzez, Julie bat-batean gurpildun aulkian aurkitu zenetik lagundu gaituzten gure lagun euskaldun guztiak eskertzeko. Baita milesker, ahalmen urriko haurrentzat antolatu diren ekitaldi guztientzat. Eta eskerrik asko onartu gintuzten pertsona guztiei ere. Jatorriz bertakoak ez garen arren, hemengo jendeak ulertu zuen bihotzez hemengoak sentitzen ginela eta hori bihotzez eskertzen dut.
* * *
