Burmuinaren funtzionamendu egokiak lan kontzientea eskatzen du

(Honen jarraipena da).

Argi dago ez dugula gure garuna maila biologikoan soilik elikatu behar, baita kultura-, hezkuntza- eta gizarte-mailan ere. Zeregin hori ezin dugu garunaren ezabaketa aurreikusten duen hezkuntza-sistema baten esku utzi, eta are gutxiago planeta osorako gero eta sistema globalagoa den horrek eskaintzen duen ezagutza bakarraren menpe baldin badago.

Aukeran ematen dizkiguten tresnen erabileran hezten bagaituzte eta, jakina, ezagutza hori errealitateaz hutsik dagoenean, kontzeptu okerrez eta erdizkako egiaz hornitua datorkigunean, antzeztutako bizi bat biziko dugu. Hau jendeari aipatzen zaionean, ez du sinistuko. Sistema batek, sistema politikoak adibidez, nola liteke gu engainatzea? Hori gertatzen denean, eta ezin sinetsi dugunean hori gertatzen dela, lehen aipatutako disonantzia kognitiboa gertatzen da. Elkarren artean kontraesanean dauden bi pentsamendu edo sentimendu ditugunean, edo arrazionalki ados ez gauden modu batean jokatzen dugunean, disonantzia kognitiboa gertatzen ari da, eta horren ondorioz antsietatea, urduritasuna eta ondoeza sortzen dira.

Komunikabideak disonantzia kognitiboaren eragile nagusietako bat dira

Komunikabideak disonantzia kognitiboaren eragile nagusietako bat dira, eta sistema dominatzaile eta distopiazale baten esanetara daude. Sistemak berak nahi duen errealitatea eratzeko erabiltzen duten bideetako bat da pertsonengan disonantzia kognitiboa sorraraztea. Norbaitek, sinesmen edo ideia bati eusten dionean, eta ideia horren aurkako frogak aurkezten zaizkionean, ebidentzia berria ezin izango du onartu. Sentsazio deserosoa sortuko da, aipatzen ari garen disonantzia kognitiboaren eraginez. Sinesmen hori babestea berarentzat hain garrantzitsua denez, pertsona horrek bere ideologia zalantzan jartzen duen informazio edo ezagutza berri hori baztertu egingo du automatikoki, baita ukatu ere, era guztietako aitzakiak bilatuz. Egoera horretan topatzen ditugun pertsonekin hitz egitea zaila da, eta, laguntzeko asmoz egiten dugula esaten badugu ere, oso korapilatsua egingo zaigu. Haien garuna buklean dagoela konturatuko gara, eta ezintasun hori onatu beharra dago; nahi ez duenari zerbait inposatzea ezinezkoa da, eta independente izatea baino, menpeko izatea aukeratzen du. Unean uneko erosotasun jarrai bat duela pentsatzeak ziurtasuna ematen dio, baina, esan dugun bezala, garunaren narriadura goiztiarraren ordainetan izango da.

Zer egin horren aurrean? Bada, argi dago garuna modu kontziente batean elikatu behar dugula, eta, behintzat, hori gure ingurukoei aldarrian jarriko diegu, ikus dezaten guk praktikan jartzen duguna aukera bat dela, eta ona ere badela. Eguneroko elikaduran, garuneko glutationa neurri egokietan izan behar dugu, baita kolesterol, potasio, sodio eta egunero behar diren osagai kimiko eta natural horien kopuru egokia ere.

Glutationa gorputzak metabolismoaren baitan ekoizten duen proteina txiki bat da, hiru aminoazidoz osatua: zisteina, azido glutamikoa eta glizina. Glutationak zeluletako toxinak ezabatzen, bitaminak eta mineralak garraiatzen, immunitate-sistema erregulatzen eta, batez ere, babes antioxidatzailean parte hartzen du. Hau da, gure garunaren funtzionamendu egokirako ezinbestekoa den zelulen elikagai bat da. Hori zaindu eta eta gure inguruan zabaldu behar dugu. Horrekin batera, glia zelulak aipatu behar dira: neuronak bere lekuan mantentzen dituzten zelulak dira, eta behar bezala funtzionatzen laguntzen diete, ez espazioaren ikuspuntutik bakarrik, baizik eta baita funtzio metabolikoaren, endokrinoaren eta immunologikoaren ikuspuntutik ere.

Errezeta bakar bat ez dago, ezta denontzat balio duen aholku egoki bat ere, baina, gutxienez, argi izan beharko genituzkeen bost gauza zerrenda ditzakegu eta gure ingurukoen artean zabaldu. Guk egiten duguna agerian jarriko dugu eta zein onura dakartzan aldarrian jarriko dugu. Hauek dira:

• Egunero ibili eta ibilbidean 30 minutuz oin biluziak lurrean jar itzazu, eta amalurrarekin harremanean gozatu, sentitu. Entzuna duzun toma de tierra delakoa egitea zure energiaren antolaketarako ezinbestekoa da (eta ez dizute esan).
• Eguzkia har ezazu; esan beharrik ez dago zure metabolismoaren funtzionamendu egokirako dela. Horrekin lotuta, egunaren eta gauaren zikloak orekan izatea ezinbestekoa duzu, ezaguna den melatonina hormonaren jario egokirako beharrezkoa baita.
• Elikagai osasuntsu eta ekologikoak kontsumitu behar dituzu, toxikoak elikaduraren bidez jaso ez ditzazun.
• Ez ikusi telebista, eta teknologia berriek ez dezatela zure bizitzaren gidaritza antola. Botere kontsumista, menderatzaile eta kapitalista batek sustatzen dituen ereduetatik ihes egin. 
• Ez izan beldurrik, eta horrek psikologikoki orekatua izaten lagunduko zaitu. Ezinbestean, zure emozioek energiarekin duten lotura ezagutuz, sistemak ezartzen dituen txantaiak alboratuko dituzu.

Orobat, argi izan behar dugu energiaren bibrazioa emozioekin lotuta dagoela, eta pertsona heldugabez osatutako gizarteak bibrazio baxua duen neurrian, gizarte hori ez da garatuko eta mendean hartua izango da, urruti egongo da independente izatetik. Esan den bezala, garunaren elikadura kontziente bat behar da. Burmuinaren erabileran kontziente izan gaitezen, zelulen funtzionamendu zuzena ezinbestekoa da, eta, horretan, odolaren jarioa inplikatuta dago. Miraririk egiterik ez dago, baina elikatze kontzienteak mota guztietako elikagaien aldetik izan behar du, noski. Gure sendagarriak ezin dira toxikoz beteriko botikak izan, baina bai bizipen jatorrez, osasuntsuz eta emozio egokiz kudeatutakoak.

Ingurune artifizialean bizi garenez, ez dugu errealitateaz jabetzeko eta benetan merezi duen bizimoduaz gozatzeko aukerarik

Gaur egun, Mendebaldeko gizartean, burmuinaren funtzionamendu egokiak lan kontzientea izan behar du. Beste garai batean bazegoen kontzientzia, beste bizimodu bat, gaur egun oraindik munduko beste leku batzuetan badutena, non naturarekin lotuta bizi diren. Hemen, aldiz, ba al dakigu inguru artifizial bati lotuta bizi garela? Naturaren erritmoei begiratuta, gure garunaren funtzionamendua zuzena izango litzateke, baina, ingurune artifizialean bizi garenez, ez dugu errealitateaz jabetzeko eta benetan merezi duen bizimoduaz gozatzeko aukerarik.

Finean, zer egin dezaket buru osasunaren alde eta garunaren zaintza lortzeko? Galdera honetatik atera da artikulu-sorta honen izenburua, eta azalpena amaitzeko erantzun bat behar dugu. Testuan pista asko eman dira, eta nabarmendu da garunak behar dituen oinarrizko elikagai psikologikoak garrantzitsuak direla, metabolismoaren funtzionamendu biologiko egoki batetik abiatuta, psikearen oreka bateraino.

Lehen aipatu ditugun kontzeptuen hariari tiraka, gizarte gaixo batean gaudela esaten da. Hori askotan aipatzen da, baina agian ez da zehaztu zertan datzan gaixotze hori. Baliteke hain azkar bizi eta erantzun bizkorrei begira gaudelako izatea, edo gure egunerokoa unean unekoa dela esaten digutelako. Horri erantzuten ez badiogu, beldurtze prozesu batean erortzen gara, plazerari zuzendutako bizitza horri exijentzia ugari esleitzen dizkiogulako. Sare sozialetan like positiboaren bila goaz, existitzen ez den sailkapen bateko goiko postuetan egon nahi dugulako, eta antsietatea sorrarazten digu. Horrek gurpil zoroan sartzen gaitu ezinbestean, eta hortik ateratzea ez dugu beharrezkoa ikusten ere, ezbaiak bizi ez ditugulako, disonantzia kognitibo gidatu bat bizi dugulako, gizarteak plazer-une pilaketa hutsa sustatzen duelako, eta hori zoriontasunarekin eta askatasunarekin lotzen delako. Baina oker gabiltza, iruzurretan gabiltza. Horretan komunikabideek badute erantzukizun soziala; ez lukete beldurrarazte horretan aritu behar, jendeak ARGIA ETA EGIA BEHAR DITUENEAN, bidean mugarriak eskaintzera deituak daude.

Garunaren zaintzak kontzientea izan behar duelako, buru osasunaren aldeko jarrera aktiboa izatera deituta gaude. Dugun denbora librea ez genuke aisialdian kontsumitzeko erabili behar, gure burua independente egiteko baizik. Hori denok jakin eta gauzatzen dugunean, herria, taldea, independentea dela esan ahal izango dugu. Eraiki ditzagun garun independenteak, bada.