Joan den larunbatean, martxoaren 25ean, Arabako Mendiak Aske plataformak BABESTU MAITE DUZUN MENDIA mendi martxen edizio berri bati hasiera eman zion, Araban ezarri nahi diren zentral eoliko eta fotoboltaikoen proiektuek arriskuan jartzen dituzten naturguneak zeharkatzeko eta ezagutarazteko asmoz. Hain zuzen, oligopolio elektrikoaren enpresek proiektu hauek sustatzen dituzte, erakunde eskudunetako, Eusko Jaurlaritzako eta Arabako Foru Aldundiko goi-arduradunen oniritziarekin.
Uribarri-Jauregiko lehenengo mendi martxan dozenaka mendizale elkartu ziren Laminoria inguruko mendietan bi ibilbide egiteko; jakinda, bertan, zortzi aerosorgailuko eta 40 MW-ko potentziako zentral eoliko berri bat eraiki nahi dutela.
Ekimen honen bidez, Arabako Mendiak Askek, alde batetik, herri-interesaren defentsa eta Arabako natura- eta paisaia-ondarearen kontserbazioa eta zainketa aldarrikatu nahi ditu, baita Arabako kontzejuena eta landa eremuena ere, oligopolio elektrikoaren enpresen mugarik gabeko anbizioaren eta hiri handien beharren aurrean. Eta, bestetik, AIXEINDAR, S.A. enpresaren lege-iruzurra salatu nahi dugu, Azazetako eta Laminoriako zentral eolikoak bi zentral ezberdin direla proposatzen baitu, jakinda mendikate berbera partekatzen dutela, beraien arteko distantziak oso txikiak direla eta energiaren ebakuazio azpiegitura amankomuna dutela. Gainera, agerian jarri izan nahi dugu estrategia honekin enpresa sustatzaileak 16 aerosorgailuko zentral baten ingurugiro eskakizunak saihestu nahi dituela.
Bestalde, jakinarazi nahi dugu datorren apirilaren 1ean Aramaion bigarren mendi martxa burutuko dugula.
Azkenik, Lurraldearen defentsan, Euskal Herria Bizirik ekimenak sustatuta hurrengo maiatzaren 20ean arratsaldeko 6etan Gasteizen burutuko den Euskal Herri mailako manifestaldian parte hartzeko gonbita ere egiten dizuegu.
