Alfredo Cospito: anarkista bat heriotzaren eta italiar Estatuaren zein 41 bis-aren aurkako borrokan
Alfredo Cospito anarkista, 2022ko urriaren 20tik, maiatzetik jasaten ari den isolamendu erregimenaren aurka —41 bis eztabaidatu eta ankerra—. 125 egundik gorako baraualdiaren ondorioz Alfredok 50 kilo inguru galdu ditu, haren analisien emaitzak kezkagarriak dira, gurpildun aulkian dabil, ez du gorputzeko tenperatura erregulatzerik lortzen eta osagarriak hartzen saiatu denean haren gorputzak ez ditu jada onartu… heriotzari aurre egiten ari zaio.
125 egundik gorako baraualdiaren ondorioz Alfredo Cospito anarkistak 50 kilo inguru galdu ditu
Haren sailkapenaren aurka Alfredoren abokatuak aurkeztu zuen helegitea aztertu behar duten epaileek ere horretarako zehaztutako data martxoaren 7tik otsailaren 24ra aurreratu dute, eta Alfredori 41 bis artikulua ezartzearen aurkako adirazpenak egin dituzte. Eta entzungogor jarraitzen duen Carlo Nordio Justizia ministroari eskakizun hauei irtenbide azkar bat emateko eta 41 bisaren aurkako gizagabekeria eta krudelkeria salaketak eztabaidatzeko prozesu bat irekitzeko eskatzen diotenak egunetik egunera gehiago dira.
Bitartean, Alfredo Milaneko San Paolo ospitaleko presoentzako sailean dago, otsailaren 11n Opera espetxeko medikuntza-sailetik hara lekualdatu zutenetik.
2022ko martxoan, “Scripta Manent” auziaren harira (2016an abiatutakoa), Anna Beniamino eta Alfredo Cospito anarkistek, hurrenez hurren, 16 urte eta 6 hilabeteko eta 18 urteko zigorrak jaso zituzten, egileek berek %40ko fidagarritasuna ematen dioten froga kaligrafiko batean eta haien idatzietan oinarrituta. Biei hainbat eraso (nagusiena 2006ko uztailean Fossanoko (Cuneo) Carabinierien eskolaren aurka burututako erasoa1 ) eta FAIko (Federazione Anarchica Informale)2 kideak izatea leporatu zieten.
Fiskaltzak, Carabinieriek eta DIGOS polizia politikoak, hedabideen ezinbesteko laguntzarekin, “FAIko buruzagien” kondena saldu nahi zuten, eta horretarako nor hobeto aurretik Genovan 2012/05/07an Ansaldo Nucleare-ko buruzagiari hankan tiro emateagatik zigortutako anarkistak baino. Horietako bat, gainera, azken urteotan nazioarteko anarkista insurrekzionalisten argitalpenetan eta eztabaidetan partaide aktiboa izan zenean!!! Eta horixe da Torinoko epaileek eskaini dietena.
2022ko uztailean, berriz, Erromako Kasazio Gorteak (apelaziorako auzitegi gorena), “Scripta Manent” auziko sententziaren aurka fiskalak zein defentsak aurkeztutako helegiteen gainean erabakitzeko saioan, 2006ko Fossanoko erasoa “Estatuaren segurtasunaren aurkako sarraski” gisa (italiar Kode Penaleko 285. artikulua) berrizendatu zuen, eta auzia Torinoko epaitegira birbidali zuen, Alfredo eta Annaren zigorrak, gogortze aldera, berriro kalkulatu ditzan. Italian zerbitzu sekretuek zein mafiak ehundaka hildako eraginez burututako sarraski odoltsuak gertatu direnean, horien egileei ez zaie delitu hau egotzi eta egun denak aske dira… baina Annari eta Alfredori bai?
2022ko abenduaren 5ean, Torinon zigorrak birkalkulatzeko saioan, fiskalak Alfredorentzat “ergastolo ostativoa” edo biziarteko zigor zorrotza eta Annarentzat 29 urteko zigorra eskatu zituen. Epaileek eskaera hauek Konstituzioarekin zein giza eskubideekin bateragarriak eta neurrikoak ote diren garbi ez zutenez, gaiaren inguruko galdeketa bat igorri dute Epaitegi Konstituzionalera.
2022ko maiatzaren 5ean, aurreko Justizia ministroak “Scripta Manent”eko zigorra eta Alfredo Cospito beste auzi batean sartu izana (“Sibilla”3izenekoa) baliatu zuen Alfredo 41 bis izenez ezaguna den isolamendu eta suntsitze erregimenean sartzeko, eta presoa Sardinia uharteko Bancali espetxera lekualdatu zuen.
Alfredo zein Anna jazarriak, zigortuak eta kriminalizatuak izan dira anarkistak izateagatik, botere egituren aurkako erasoa praktikatu eta babestu dutelako, eta, bereziki, espetxeratzearen zein errepresioaren gainetik, haien printzipioei muzin egin ez dietelako. FAIko buruzagi gisa saldu dizkigute, guztiok dakigunean, epaileak izan ezik antza denez, anarkistok buruzagirik ez dugula eta buruzagitzarik ez dugula onartzen; FAIko ideologo gisa ere seinalatu dituzte.
Kutsu politiko eta ideologiko garbia duten bi auziren aurrean gaude, “Scripta Manent” eta “Sibilla”; Estatuaren eta haren erakundeen zilegitasuna ezbaian jarri eta haien aurka borrokatzera ausartzen direnak zigortzera bideratutako auziak. Anarkiston printzipio ideologikoak jazarri dira, eta iraganean anarkismoaren aurkako beste muntaia batzuetan erabilitako argudioekin, neurrira egindako diskurtso bat eraiki da.
Haren ibilbide militante luze eta zintzoarengatik, nazioarteko anarkismo insurrekzionalistaren barneko azken urteotako eztabaida publikoetan parte hartu izanagatik eta erasorako anarkismoaren babesa egiteagatik, italiar estatuko indar errepresiboek lezio bat emateko aukeratu duten anarkista dugu Alfredo Cospito. Estatuaren oldarraldiari eskura duen arma bakarrarekin, bere gorputzarekin, aurre egin dion anarkista bat, gose greba mugagabe bati ekinez. Haren egoera salatzeko ez ezik, 41 bis isolamendu eta suntsitze erregimena eta ergastolo ostativoa (bizi arteko zigorraren aldaera zorrotzena) salatzeko ere baden borroka.
Mundu zabaleko anarkisten mobilizazio eta agitazio jarraiari, Italian, sindikatuak, ikasleak, juristak, abokatuen elkargoak, ministro ohiak, presoen eskubideen babesleak eta oposizioko alderdi nagusiak batzen joan zaizkio. Alfredoren borroka eta 41 bisa hedabide nagusietan daude egunero, parlamentuko saioetan maiz agertu izan da eta joan den otsailaren 3an irlandar parlamentari batek Europar Parlamentura ere eraman du.
Mahai gainean daude Alfredoren osasun kaxkarra eta gogo irmoa (azaroan indarrez elikatua ez izateko agiria sinatu zuen), eta, 125 egun baino gehiagoko gose grebaren ostean, hiltzeko arriskuaren errealitate gordina. Alfredo Cospitoren eta Anna Beniaminoren askapenaren alde mobilizatu beharra dago! Eta disidentzia politikoaren aurka erabiltzen diren 41 bis edota Espainiako FIES+art.10 bezalako suntsitze eta isolamendu erregimenak indargabetzeko ere bai!
12006eko ekainaren 2 eta 3 arteko gauean ezezagunek Carabinieriek Fossano-n duten eskola aurrean etxean egindako bi lehergailu arin jarri zituzten. Hoietako batek besterik ez zuen eztanda egin kalte arinak eraginez. Erasoa FAIk bere gain hartu zuen.
2 Federazione Anarchica Informale o Federakunde Anarkista Informala: eraso zuzena praktikatzen duten talde anarkista txikien (asko behinbehinekoak) eta norbanakoen koordinazio informala; ekintzei lotutako adierazpenen eta idatzien bidez koordinatzen direnak. 2001-2002 inguruan Italian sortu bazen ere azkar mundu osora zabaldu zen.
3 ”Sibilla operazioa”: 2021ko azaroan Spoleto-ko “Circolaccio Anarchico” taldearen eta “Vetriolo” aldizkariaren aurka burututako errepresio operazioa. FAIk bere gain hartutako hainbat erasoen bultzatzaileak edo sustatzaileak izatea leporatu zieten. Auziaren erdian Alfredok aldizkariari emandako elkarrizketa bat eta bertan argitaratutako idatziak.
