Duela bost hilabete Independentea egunkari digitala sortu berria ezagutu nuen.
Independentea.eus webgunean sartu nintzen, eta oso gustatu zitzaidan antolaketa. Beraz, prest neukan idatzi bat bidali nien, egokia bazeritzaten argitaratzeko eskatzen.
Argitaratu egin zuten, eta ez hori bakarrik, estilo handiz editatu ere, haiexek bilatutako irudi egokiak gehituz eta guzti. Beste bi aldiz ere errepikatu nuen. Pozik geratu naiz bidali dizkiedan hiru idazkiei eman dieten trataera profesionala ikusita.
Argi ikusi dut egunkari erabat libre eta irekia dela. Artikulu idatziak ez ezik, bideoak eta audioak ere argitaratzen dituzte. Zentsuraren aurkakoak dira eta areago, beste lekuetan zentsuratutako idatziak ere onartu egin dituzte. Webgunean barrena, adierazpen-askatasunean sartu izanaren sentsazioaz geratzen naiz.
Hala eta guztiz ere, berehala itxiko dela jakinarazi didate lan eskerga handiegi jasangaitza dutelako. Zoritxarra da, kalte handia dugu haien profesionaltasunaz gozatu eta, batez ere, egunero egunkari libre hau ezagutu dugunok.
Itxieraren berria aurrez emateko begirunea izan dute, eta horretarako ere ekintzaileak izaten jarraitzen dute, albistea horrelaxe amaitzen dute eta: “ez al da zerbait berria antolatzeko garaia?”
Eskerrik asko, Haizea eta Kote, informazioaren alde egin duzuen ahaleginagatik. Laster arte!
Gasteiz, 2021-03-22
Ados Gontzal.
Asko gara zurekin bat egiten dugunak.
Eskerrik asko Independentea ahalbidetu duzuenoi eta baita, iritziz, iruzkinez eta hausnarketaz elikatu duzuen guztioi.
Ondo bizi!!