Agenda Globalista

Praxirik gabeko teoria

Eskuinak ez du luze jotzen ezkerrak egindakoa hankaz gora botatzeko. Honek, aldiz, sisteman zertxobait aldatzeko urteak behar ditu eta gehienetan adabakiak besterik ez du jartzen, ausardiarik gabe.

5

Santi Angulo

Irakasle erretiratua, hainbat herri mugimendutan ibilia. Orereta

Duela aste batzuk klima aldaketari buruzko jardunaldi batzuk direla eta, prentsako titular batek zera zioen: “Europak ez du nahikoa egiten, aldaketa sistemikoa ezkerretik etorriko da”. Europako ezkerra zertan ari den ikusita, aldaketa horren hasiera ere ez dugula ikusiko iruditzen zait, ezkerrak gobernatzen dituen leku batzuetan oso motel hartzen baititu erabakiak, beste batzuetan eskuinaren nahiak betetzen baititu eta gehienetan sortzen dugun zauri ekologikoari tirita jarri besterik ez baitu egiten.

Nire herriaren kasua aipatuko dut, espekulatzaileen neurrira egindako etxebizitza-politika kaltegarrian sartu gabe. Oreretak frankismoaren garaian presio urbanistiko izugarria jasan behar izan zuen eta ondorioz milaka etxe eraiki ziren era kaotiko batean, herritarren bizi-baldintzen beharrak kontuan hartu gabe. Ondoren, zoritxarrez, beti “ezkerrak” gobernatu badu ere, presioa ez da eten, gero eta berdegune gehiago zementu bihurtuz. Azken kasuan gure herrian 1.000 etxebizitza baino gehiago eraiki nahi ditu Udalak inguruko bi berdegunetan eta lehen CAMPSAk zuen eremu kutsatuan; gainera, erdialdean dagoen parketxo bakarra ere suntsituko du.

Arramendiko parkeak 1991tik hona Espazio Libreen 32.000 m² baino gehiago galdu ditu, % 18. Azken urteetan hiru eraikin gehiago altxatu dira. Herriko erdialdea kontuan hartuz, 380.000 m²tatik % 0,54 soilik dira Espazio Librea, hots, biztanleko 0,15 m², 2012ko dekretuak 5 m² aipatzen duenean. Gamongoa eta Esnabide, herritik gertu dauden berdeguneak, zementu pean desagertuko dira. Altzate, landareek berriro hartu dutela ikusteko aukera izan badugu ere, adituen uraren inguruan ez eraikitzeko gomendioari muzin eginez, ezkerreko gobernuak zementuz bete nahi du, nahiz eta jakin leku hori kutsatua dagoela eta urez bete daitekeela, itsasotik gertu eta ibaiertzean baitago.

Oreretako arramaendiko –Kutxaren menpeko– baratze komunitarioen informazio panela: fantasiazko 17 helburu koloretsuekin osatutako 2030 Agenda globalistaren borobila. Helburu bat ekologia da, bestea bizitzaren digitalizazioa… Irakurri kontrajarritako helburuetaz esteka honetan. / Argazkia: Koteto

Proiektu horiek eremu naturaletan hondamendi handiak sortuko dituzte, gure herria gehiago itoko dute eta inguruko auzoetan eragin kaltegarria izango dute. Herritarroi gozatzeko Espazio Libre naturalak izateko aukera murrizteaz gain, dagoeneko gainezka dagoen hirigunera mila autotik gora ekarriko ditu; ondorioz, kutsadura handituko da: zarata, argia, CO2… Eta honi guztiari, berdeguneak suntsitzeari eta kutsadura zabaltzeari jasangarria deritzo herriko ezkerrak. Aurten, osasun-egoera oker honek gauza bat erakutsi digu, gure hirigunean ez dagoela, Arramendi izan ezik, lasai egoteko beste lekurik, ez baititugu nahasi behar espazio libre naturalak eta lorategiz hornitutako urbanizazioak.

Berdeguneak suntsitzeko ematen den arrazoia aurreko gobernuaren herentzia da, hots, duela ia 20 urte onartu zen Plan Orokorra. Udalak ez du inoiz hainbeste etxebizitza behar dela jasotzen duen datu objektiborik aurkeztu. Plan hori herritarrek parte hartu gabe burutu zen eta gauzatzeko epea 2012an bukatzen zen; zortzi urte pasatu dira eta, legeak dioenez, dagoeneko berritua egon behar zen, baina ez dute nahi izan.

Eskuinak, ezkerraren ordez gobernuan sartzen denean, ez du luze jotzen hark egindakoa hankaz gora botatzeko (Iruñeko udala, Gizpuzkoako Aldundia…) eta ezkerraren herentzia deuseztuta harro azaltzen da. Ezkerrak, aldiz, sisteman zertxobait aldatzeko urteak behar ditu eta gehienetan adabakiak besterik ez du jartzen, ausardiarik gabe.

Azken urteotan, klima larrialdiari erantzuteko desazkundeaz edo hazkunde berdeaz hitz egiten da. Gipuzkoan, esaterako, milaka hektarea erabili nahi da plataforma logistikoak, industrialdeak eta etxebizitzak eraikitzeko. Noiz arte? Bada garaia garapenkeria suntsitzaile honi balazta jarri eta erabaki irmoak hartzeko, benetan klima aldaketari aurre egin nahi bazaio, praktikarik gabeko teoriak hondamendira baikaramatza.

Berria, Argia eta Garara (gaztelaniaz) ere bidalia.

5 erantzun “Praxirik gabeko teoria” bidalketan

  1. Badira bertso zaharrak:

    “Orain 40 urte
    gure Errenteri
    ……
    geroztikan honera
    Parisa dirudi”

    Gaur ez dago giza “sapiens”ik,
    giza “urbanus” digitalizatua baizik….

  2. Gauzatxo bat Santiri, zure anaia Donostian Analisi matematikoa saiatu zen neri irakasten….Matematika ez nuen ikasi baina analisia bai…..Goraintziak!

  3. Ez dut oso ondo ulertzen artikuluan proposatzen den ezkerraren eta eskuinaren arteko zatiketa hori. Nire ustez hori gaur egun guztiz gaindituta dago, hainbesteraino non gaur egungo ezkerra elite globalisten txontxongilo huts gisa ikusten baitut. Nor da hor ezkerra? Eta nor eskuina?

  4. Baiki ezkerraren miseria ideologikoaren ondorioz bizi dugu hein handi batean egungo koronaipuinaren lotsagabekeria ere

  5. Batzuk ezker askatzaile posible batekin ametsetan, besteak berriz ezkerra globalista dela eta ezker-eskuinaren artean zatiketarik ez dagoela pentsatuz… baina nahi genuken mugimendua zein motatakoa duNK? Anarkista? Komunista? Autonomoa? Garapenkeriaren aurkakoa? edo Klase borrokarik nahi ez duena? Vox-ekoen bideoak ere aldeko propaganda moduan jartzen dituena? koronabirusaren aurkako edozer? Mugimendu burujaberik izan al daiteke mugimendurik gabe? eta burujabeak izan al gaitezke mugimendurik (ingurune askatzailerik) gabe? Hortze galdera erretolika batzuk, ondo izen!!

Utzi iruzkina

Azken artikuluak