Testu hau sinatzen dute:
Enea Andueza Otsoa, Beatriz Arana Ortiz, Julio Villanueva Villanueva, AHT Gelditu! Nafarroako kideak.
AHTaren mafia
Duela hilabete batzuk, AHTaren aldeko plataforma eratu zen Nafarroan, Foru Komunitatean makro azpiegitura horren eraikuntza bizkortzeko. Plataforma hori Nafarroako AHTaren proiektuaren ahultasun une batean sortu da, hamalau urte baino gehiagoko lanen ondoren bultzatzaileek nahi bezain azkar aurrera egiten ez duelako eta proiektua erreskatatu zuten Next Generation funtsak agortzear daudelako.
Plataforma horren sustatzaile nagusiak Nafarroako Enpresarien Konfederazioa (CEN), Merkataritza Ganbera, Institución Futuro Think Tank enpresariala eta ingeniarien hainbat elkargo dira. Erakunde horiek Nafarroako enpresa-eliteen interesak ordezkatzen dituzte; izan ere, aurrekaririk gabeko krisi ekosozial globalaren testuinguruan, ez dute zalantzarik haien onura ekonomikoa natura eta langile klasearen bizi baldintzen gainetik jartzeko, azken hori gero eta kaltetuago izanik bizitzaren garestitasuna, murrizketa eta pribatizazioengatik. Era berean, badirudi bost axola zaiela eraikuntzan izaten ari den muturreko lan-esplotazioa, Euskal Herriko AHTaren obretan hamahiru langileren heriotza eragin duena. Hasiera batean, erakunde horiek beren enpresa-harremanen sarea hauspotuz, plataformaren sorrera-agiriarekiko 41 antolakunderen atxikimendua lortu zuten.
Manifestua izenpetzen duten enpresa-elkarte oso gutxik –eta are gutxiago beste mota bateko antolakundeek– jasoko dute AHT-tik inongo onurarik; izan ere, bere garaian CEOEk adierazi zuen bezala, “enpresek salgaien trenbide garraio eraginkorra behar dute, eta ez AHTrik”, Espainiako Estatuko gainerako lekuetan bezala, Nafarroan ere merkantziarik ez baitu garraiatuko.
Plataformaren atxikimenduen zerrendan deigarria da hainbat antolakunde ikustea, ez baitago batere argi babesa zergatik eman duten. Batzuk aipatzearren: Iturgintza eta Berokuntza Enpresen Elkartea (ANAFONCA), Laguntza Entitateen Nafarroako Elkartea (ANEA), Irakaskuntza Zentroen Nafarroako Elkartea (CECE), Nafarroako Gizarte Graduatuen Elkargo Ofiziala, beste askoren artean. Ez ote dira elkarte horiek jasotako presioak erabakigarriak izan kasu askotan plataformari atxikitzeko?
Era berean, atxikitako erakunde askotan, zuzendaritza-batzordeek modu antidemokratikoan hartu dute erabakia, oinarrien iritzia kontuan hartu gabe, hala nola C.A. Osasuna, ANAPEH, Iratxe kontsumitzaileen Elkartea, eta abar, kide askorengan ezinegon handia sortuz.
Patetikoa da UGT bezalako sindikatu batek, teorian langile-klasearen interesak defendatu beharko lituzkeenak, patronalaren plataformarekin bat egin izana.
Gainera, eta nola ez, Plataformak Sociedad Civil Navarraren sostengua du, izaera erreakzionario nabarmena duen erakundea.
Une honetan, plataforma banakako zein taldeko atxikimendu-kanpaina bat bultzatzen ari da. Horren helburua da jendartean legitimatzea makro azpiegitura honen eraikuntza; izan ere, Nafarroako jendartearen zati handi batek ez du berau ontzat hartzen, kezkaz ikusten baitu ingurunea suntsitzea, poltsiko pribatuak gizentzeko diru publikoa xahutzea, eta herri xehearen ohiko trena ziztu bizian hondatzea, tren elitista bat bultzatzeko. Makro azpiegitura hori Nafarroako inoizko suntsitzaile, xahutzaile eta anti-sozialena izan arren, ez du izan ez bideragarritasun-azterketarik, ezta parte-hartze prozesurik txikienik ere.
Plataformaren helburu nagusia da presio lobby gisa jardutea Nafarroako eta Madrilgo gobernuekiko. Ildo horretan, salatu behar da urrats garrantzitsua eman dutela trenbide-azpiegiturak bultzatzeko (AHTa, batez ere) Lan Batzordearen sorrerarekin, Nafarroako Gobernuko Lurralde Kohesiorako Sailak, gobernu zentraleko Garraio Ministerioak eta Atlantikoko Korridorerako Sailak eta Nafarroako AHTaren aldeko Plataformak osaturik, hau da, erakunde publiko-pribatua, azken boladan modan dagoena. Mafiak bezala, AHTaren aldeko plataforma da gaur egun Nafarroako AHTaren hariak itzalpetik nahieran mugitzen dituena. Hilabete hauetan, AHT Gelditu! Nafarroak fokua jarri du itzal hori argitzeko eta hariak nola mugitzen diren eta zein interesekin argitu ahal izateko.
* * *
Otsailaren 21eko AHTaren AURKAKO IRUÑEKO MANIFESTAZIOAREN KRONIKA
Aurreko larunbatean, hilak 21, eguerdian, Iruñeko Diputaziotik abiatuta, “DESJABETZAREN AURREAN, AHTaren MAFIA BORROKATU!” lelopean manifestazioa egin zen. Mobilizazio koloretsuan 500 pertsona inguruk hartu zuten parte. Manifestazio hau Nafarroako AHTaren aldeko Plataformaren salaketa-ekimen baten amaiera izan zen. Plataforma hori enpresa-lobby bat da, Nafarroako zein Espainiako gobernuei presioa egiteko, Foru Erkidegoan makro azpiegitura horren eraikuntza bizkortu dezaten.
Martxaren buruan elefante txuria izan zen, azpiegitura alferrikako, suntsitzaile eta inposatuen nazioarteko ikurra, langileek eramana. Goiburuko pankartaren atzean, parte-hartzaileek kartelen eta kontsignen bidez eskatu zuten AHTaren gastuak jendarte-beharrizanak asetzeko erabiltzea. Martxa UGT sindikatuaren eta Nafarroako Enpresarien Konfederazioaren egoitzetatik igaro zenean, AHTaren mafiaren aurkako oihuak bizkortu ziren.
Mobilizazioa Gurutze plazan amaitu zen, eta bertan antzerki emanaldi bat eskaini zuten. Modu sarkastikoan enpresa-eliteek AHTaren eraikuntzarekin jarraitzeko duten interesa salatu zen, horrek natura suntsitzea eta gastu sozialerako beharrezkoak diren baliabideak xahutzea baitakar.
Bukaerako irakurketan, makro azpiegitura honen eraikuntza inguratzen duten interes politiko eta ekonomikoen aurka borrokatzen jarraitzeko deia egin zen.
* * *
ARGAZKIAK ETA BIDEOA HEMEN:
Manifestazioa Iruñean (2026/02/21): Desjabetzaren aurrean, AHTaren mafia borrokatu!
Bideoa: https://youtu.be/HBtZFa87HJs
Argazkiak: https://www.ekinklik.org/es/ultimas-coberturas/1448-
