Protokoloak

Maskararik gabe baina protokoloak dirau

Derrigorrezko maskara desagertu da, baina protokolo maltzur horrek hor jarraitzen du.

0

Ainara Madariaga

DBH eta Batxilergoko Historia irakaslea. Bilbo

Bi urte luzez izan ditugu haurrak, gazteak eta irakasleak ahoa eta sudurra trapu zikin batekin estalirik dituztela, “guztion” ongiaren izenean. Gobernuak hala erabaki duenean -erabaki politikoa eta ez osasun erabakia-, maskara barrualdean erabiltzeko derrigortasuna kendu du, bere garaian kanpoaldean erabiltzeko derrigortasuna kendu zuen bezala. Herritar gutxi batzuek beti pentsatu dugu maskara erabiltzeko derrigortasunik ez zuela inoiz egon behar, eta beldurra duenak zazpi FFP2 jar ditzakeela bata bestean gainean, eta libreki arnas egin nahi dugunok, aldiz, subiranoak izan behar dugula hori erabakitzeko.

Zelan ez da hau lehen orrialdeko albistea izan Euskal Herriko hedabide nagusienetan?

Gauza da, bi urte luze pasa ostean, gure umeak berriro itzuli ahal izan direla ikastetxeetara aurpegi erdia estali gabe, eta berriro arnas egin dezaketela apirilaren 25az geroztik, Aste Santuko oporren bueltan. Ez dut ulertzen zelan ez den hau lehen orrialdeko albistea izan Euskal Herriko hedabide nagusienetan, Macronek hauteskundeen bigarren itzulia irabazi duelako berriaren gainetik.

Ematen du dena konponduta dagoela ikastetxeetan, baina ez da hala

Artikulu honek, maskara erabiltzearen derrigortasuna desagertzeagatik poza adierazteaz gain, ikasturteko ez dakit zenbatgarren protokoloa aipatu nahi du, eta berorren hainbat puntu kritikatzeko helburua ere badu. Onargaitzak, iraingarriak eta lotsagarriak diren hainbat puntu.

Maskararen derrigortasun kenduta, ematen du dena konponduta dagoela ikastetxeetan, baina ez da hala:

  • Protokoloaren B atalean (“prebentzio pertsonaleko neurriak” deritzona, alegia), a) azpiatalean gogorarazten zaiguna honakoa da: “ikasleei higieneari eta portaerari buruzko prebentzio-neurriak gogorarazteko saioak egiten jarraituko da, gela, ikastetxe eta adin bakoitzera egokituta, neurriak lasaitzea saihesteko”. Lasaitzea saihesteko??? Ez erlaxatzeko??? Baina zer da hau? Gure umeak erne izan behar al ditugu denbora guztian? Beldurtuta denbora guztian?
  • B atalaren b) azpiatalean, eskuetako higienea maiz egingo dela esaten da eta ura eta xaboia lehenetsiko direla. Bada, oporren osteko lehenengo egun hauetan, jakin dugu hainbat eskolatan hidrogelarekin itxaroten dituztela irakasle askok umeak eskolako atarian. Askok ez dugu ulertzen eskuak “garbitzeko” sukar hau.
  • Guztiz iraingarria deritzodan azpiatala vii) da, eta honakoa esaten du: “zaindu eta prebenitu behar da Covid-19aren arrisku-baldintzetan edo norberaren erabakiz maskara erabiltzen jarraitu nahi duten pertsonak estigmatizatzea”. Estigmatizatzea??? Noski, maskara erabiltzen jarraitu nahi duten guztiek, erabil dezatela, baina zergatik ez zuten ezer aipatzen aurreko protokoloek maskara erabili nahi ez genuenak edo txertorik ez jasotzea erabaki dugunak ez estigmatizatzeari buruz?
  • Burbuilarik ez dago jada, baina eskola-autobusean sei urtetik gorako umeek maskara eroan behar dute derrigor eta, Nafarroan, are txarrago, legearen kontra joanez, hiru urtetik gorako umeak derrigortzen dituzte.
  • Gelen aireztapen zorrotzarekin jarraitzea ere eskatzen du protokoloak. Orain udaberrian gaudelako, baina umeak derrigorrez hotza pasatzera behartzeak ez dauka inongo zentzurik, eta horrela izan ditugu negu osoan.

Estigmatizatzea??? Zergatik ez zuten ezer aipatzen aurreko protokoloek maskara erabili nahi ez genuenak edo txertorik ez jasotzea erabaki dugunak ez estigmatizatzeari
buruz?

Beraz, bai, orain eskoletan indarrean dugun protokoloan, derrigorrezko maskara desagertu da, baina protokolo maltzur horrek hor jarraitzen du, eskola publikoaren maskaradun matrikulazio-kanpaina lotsagarriak jarraitzen duen bezala, edo maskararik gabe lan egitea erabaki zuten hainbat irakaslek espedientatuta jarraitzen duten bezala, lan egin ezin, soldatarik gabe eta, orain maskarak derrigorrezkoak ez direnean, lanera itzultzen uzten ez zaien irakasleak.

Honegatik guztiagatik, edozein eskolatako Covid-protokoloaren berehalako desagerpena eskatzen dut oraintxe. Gure umeenganako torturarik, doktrinamendurik eta beldurraren zabalpen gehiagorik EZ. Aitak, amak, irakasleak, ikasleak: edozein eskubide urraketa pairatzen baduzue, salatu ezazue dagokion tokian, eta, laguntzarik behar izanez gero, bizitzahezkuntza@protonmail.com helbidera idatzi.


Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak