Kaixo! Gure herriko natur ondarea eta landa eremuak gogor kaltetzen dituzten hainbat proiektu eta azpiegitura-lan handiren oposizioan diharduten taldeek eta mugimenduek Euskal Herri mailako batzarra deitu dute otsailaren 25ean, larunbata, Ziordian. Besteak beste, zentral eolikoak eta energia berriztagarrien makro-proiektuak, autopista elektrikoak, Baztango Erdizko mendi-lurretan Magnesitas de Navarraren harrobi berria zabaltzeko egitasmoa, AHT, eta gisa bereko proiektu txikitzaileekiko arbuioa eta erresistentzia kaleratzeko mobilizazio dinamika bateratu bat abian jartzen ari dira, eta horren buruan apirilaren 22an Iruñean eta maiatzaren 20ean Gasteizen manifestazio garrantzitsuak antolatzea da deialdiaren helburua. Batzarra goizeko 11etan egingo da, Ziordiako Amarauna Gune Autogestionatuan (helbidea: Iruñeko errepidea, 7). Deialdia Euskal Herriko talde eta pertsona interesatu guztiei zabaltzeko eskatzen dute.
Eoliko eta berriztagarrien makro-proiektuak, autopista elektrikoak, Baztango Erdizko mendi-lurretan Magnesitas de Navarraren egitasmoa, AHT eta gisa bereko proiektu txikitzaileekiko arbuioa eta erresistentzia antolatzeko
Ekimen hori Arabako Mendiak Aske eta gure ingurune aski hondatuan eragiten duten makro-proiektuen aurka borrokan ari diren beste hainbat taldek sustatu dute, lurraldearen defentsan indarrak biltzeko eta mobilizazio indartsuago bati ekiteko asmoz. Hainbat herritan desadostasun nabarmena eta herritarren erantzuna piztu duten egitasmoak pilatuz doaz. Hori dela eta, ekimen hau Euskal Herriko txoko desberdinetako pertsona eta taldeen arteko elkarlana eta indar-batuketa sustatzeko heldu-leku bat izatea proposatzen dute, proiektu horiek gelditzeko herriz herri egiten ari diren borrokei mobilizazio-dinamika orokor batez bultzada berri bat emateko.
Bestalde, Iruñea eta Gasteizko manifestazioen aurretik “Lurraldearen defentsan, Euskal Herria Bizirik” lema amankomunarekin ekintzak antolatzeko proposatzen dute. Ildo honetan, Baztango Erdiz Bizirik taldeak ahal den herri edo auzoetan solasaldiak antolatzeko eskatzen du (proiektorez eta pantailaz hornituriko leku batean), ahal dela otsailaren 23tik apirilaren 5era.
IKUS Erdiz Bizirik solasaldiaren informazio grafiko laburtua eta harremanetan jartzeko helbidea ATXIKITAKO ARTXIBOAN:
Prentsaurrekoa Donostian otsailaren 21ean
Azkenik, ekimena aurkezteko datorren asteartean, otsailak 21, Donostian egingo den prentsaurrekora biltzeko dei egiten dute. Agerraldi hori goizeko 11etan egingo da, udaletxearen ondoan dagoen Nautikoaren zabalgunean.
Beraz, Ziordiako asanbladara biltzeko eta ekimena herri guztietara zabaltzeko gonbitea egiten zaie interesa duten talde eta pertsona guztiei.
Informazio gehiago eta ekimena sustatzen duten taldeekin harremanetan jartzeko bide bat:
Emaila: arabakomendiakaske@gmail.com
Tlfnoa: 665727713
