Iruña Veleiaren Zientzia

Jose Ignacio Vegas Aranburu arkeologo arabarra hil da

El Correo egunkariak luze jorratzen du notizia, eta Vegasen gorazarrea egiten du baina ez du aipatu ere egiten Iruña-Veleiako auzian Eliseo Gil eta Idoia Filloyren alde egin zuen arkeologo bakarrenetarikoa izan zela.

1

Juan Martin Elexpuru

Euskal idazlea eta filologoa. Bergara

Astelehenekoa da berri tristea: Jose Ignacio Vegas Aranburu joan zaigu 89 urterekin, gaixotasun luze baten ondorioz. Nik Iruña-Veleiako auziaren harira ezagutu nuen duela hamabost urte. Eliseo Gil eta Idoia Filloyren alde egin zuen lehen momentutik, eta esan behar aurpegia eman zuen arkeologo bakarrenetarikoa izan zela. Aurrez Lurmen taldearen inguruan zebiltzan beste gehienak lurrundu egin ziren bat-batean. “Ikusi bazaitut ez naiz gogoratzen”, gazteleraz esan ohi den bezala. Hori kasurik onenean, izan zirelako ofiziokideak eta Lurmeneko langile ohiak Eliseoren kontra sutsu jokatu zutenak epaiketan zein hedabideen aurrean. Vegas Aranburuk garesti ordaindu zuen benetakotasunaren aldeko jarrera: aurrez ahots estimatua zen Arabako irrati eta egunkarietan tertuliakide eta zutabegile gisa; Iruña-Veleiako auzia lehertuz geroztik ez zuten gehiago deitu, eta abian zituen kolaborazioak ere eten egin zizkioten “denboraldi berria” , ”ahots gazteei aukera ematea”  eta horrelako  aitzakiak erabiliz.

Jose Ignacio Vegas Aranburu Gasteizen jaio zen 1934an. Arkeologo gisa da batez ere ezaguna. Hemen haren publikazioen zerrenda luze bat. Baina gizon polifazetikoa zen, beste gauza asko ere egin zituen.

Idoia eta Eliseok, eta haien inguruan bildu ginen taldeak beti gozatu genuen Jose Ignacioren presentziaz eta itzalaz, itzal lasai, goxo eta umoretsua. Ezagutu duten guztiek azpimarratzen dute haren onberatasuna, ogi pusketa bat zela. 2015ean omenalditxo bat egin zitzaion Langraitzen SOS Iruña-Veleia, Euskeraren Jatorria eta Martin Txipia taldeen eskutik. Ordukoak dira azpiko argazkiak. Ekitaldi haren bi kronika: EJ eta IV.

Jose Ignacio, Eliseo, Idoia eta Maritxu Goikoetxea aurkezlea. Argazkia: Euskeraren Jatorria.

Asteartean el Correo egunkariak luze jorratzen du notizia, eta Vegasen gorazarrea egiten du baina ez du aipatu ere egiten Iruña-Veleiako auzian izan zuen jarrera. Ez da ahaztu behar egunkari honek “El azote de Eliseo”tzat definitu zuela bere burua, eta artikulu honen egilea, Sergio Carracedo, izan dela kazetari zitalena gai honetan. Honela aurkezten du notizia:

“Este lunes ha fallecido a los 89 años José Ignacio Vegas Arámburu, «un hombre bueno y amable» y «un referente en arqueología y en otros muchos campos». Nacido en 1934, la sombra de este vitoriano es alargada. Destacó en disciplinas como la arqueología, la fotografía, el cine, el arte y fue colaborador en temas culturales y columnista de EL CORREO durante años.

«Fue un hombre siempre dispuesto a echar un cable. Un hombre bueno y amable», dicen de él quienes bien le conocieron. Vegas Arámburu formó parte de la veintena de historiadores y arqueólogos que crearon la Asociación de Amigos del Museo de Arqueología, que trabajó por acercar y hacer comprensible esta disciplina a los ciudadanos. Autor de varias publicaciones y cientos de artículos, José Ignacio fue un hombre inquieto, con una dilatada trayectoria como arqueólogo, historiador, investigador y otras facetas”.

Hamaika ikusteko jaio ginen. Dena dela onartu behar da txukuna dela egunkariko kronika, lehen esan duguna kenduta. Oraindik ez da ezer agertu beste egunkarietan, baina baliteke asti faltaz izatea, astelehenean azkenengo orduan jakin baitzen herriotzaren notizia.

PD: Astearte goizean zehar, AleaNoticias de Alava.

Jatorriz Elexpururen blogean argitaratuta asteartean 2024/01/09

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Erantzun bat “Jose Ignacio Vegas Aranburu arkeologo arabarra hil da” bidalketan

  1. Juan Martin, eskerrik asko Jose Ignacioren omenez egindako artikuluagatik eta diskurtso ofizial txaketeroak argitara ekartzeagatik, baita Maritxu eta zeuk Iruña Veleiaren inguruan egia babesteko egiten duzuen lan guztiagatik ere, bihotzez.

Utzi iruzkina, izen eta abizenez

Azken artikuluak