Pasa den astean harakina den lagun-min batekin berriketan, jubilatzera doan honetan, halaxe esan zidan: “gauzak aldatu ezean, negozio txiki guztiak ixten amaituko diagu”.
Hariari tiraka, Gipuzkoako Merkatarien Elkarteen Elkarteko, Dendartean elkarteko lehendakariak, Gipuzkoako Foru Aldundiko erreforma fiskala gauzatzeko ponetzian egin zuen agerraldiaren bideoa aurkitu nuen:
Bideoa: https://jggipuzkoa.seneca.tv/watch?id=MDhmNzgwNDgtOGU4ZS00ZDIxLWE5ZDItNjZkNDRjOTU5ZWQy
Agerraldia ikusi eta Txirritaren bertsoak etorri zitzaizkidan burura….
“lapur txikiak kastigatzeko
nonahi badago kartzela
haundiak hor ikusten ditut
paseoan dabiltzala”
Ponentzian La Vanguardiako artikulu bat aipatzen du Dendarteaneko lehendakariak, hemen esteka:
Agerraldian euskal prentsan agerturiko hainbat eta hainbat titular aipatu zituen, guztiek amankomunean zekarten berria honakoa zen: gure denda txikiak itxi eta itxi ari dira.
Beste berri sorta batean, Amazonek eta online erosteko plataformek dituzten irabaziez eta, oro har, zerga gisa ordaintzen dutenaz jardun zuen.
Hirugarren atal batean, Ogasunak egin ezin duena alde batera utzita, egin ahal duenaz baina egiten ez duenaz jardun zuen: neurri fiskal berriak proposatu zituen erreforma fiskala gauzatzeko ponetziaren aurrean.
Mahaiko politikariek Tapia eta Leturiaren “Real politik” ekarri zidaten burura:
“Berak ezin zuen ezer egin
ez zen bere eskumenekoa
baina ados zegoen gurekin:
doan eman zigun bost… ekoa!”
Komertzio txikiak bizirik dagoen herria egiten du.
Bizitza horretan dago, adineko gure herritarren zaintza besteak beste, edo gure seme-alaben autonomia, edo gure harreman sozialak, herrian elkar topatzen dugu.
Administrazioak, bere legeetan ere halaxe jasotzen du, EAEko ekainaren 27ko establezimendu komertzial handien lurralde antolamenduari buruzko 10/2019 LEGEA irakurtzea aski da horretarako. Baina azkenaldian paradoxa bat gertatzen ari zaigu administraziorekin: legea egiteko aurrekaria dena egingo genuke gure; legearen garapenak ekartzen duen errealitatea ez. Zertarako egin da orduan legea, ez badu bere helburuak betetzeko balio?
Zer egiten du administrazioak iruzur fiskalarekin? Zenbat iruzur egin dezake komertzio txiki batek? Jakin beharko genuke EAEn 10 langiletik 9 soldatapeko langile direla.
Eta autonomoa den horri ticket bai ezartzean? Gailuetan inbertsioa, formakuntza, aplikazioarekin gorabeherak, sistemaren mantenua… Ticket bai txosnetan, gure azoketan, baserritarrek plazetan, jai batzordeetan… ticket bai HERRIGINTZAN? Bertsolariak, artistak… fakturak emititzen?
Komertzio txiki eta autonomoak jarduera uzten dabiltzan honetan, nork esplikatuko dit, arren, non egon daitekeen IRUZUR FISKALA, iraun ere egin ezin dutenean?
Herritar talde bat antolatzen hasi da antza, ea Dendarteanekoekin batera indarrak batzen asmatzen duten:
📱WhatsApp https://chat.whatsapp.com/LginCUk2Ev95E3OaG8ElDD
📧Email: noalticketbai@gmail.com
Gipuzkoako lurralde historikoan zerga-egoitza duen edozein jarduera behartuta dago 2022az geroztik TicketBai ezartzera.
Hori egin ez duenak, gutxieneko 20.000 euroko edo negozio bolumenaren %20ko isuna jaso dezake.
Ze etorkizun izan dezake halako isuna jaso dezakeen edozein jarduera txikik? Ez al da heriotza-zigor mehatxua?
Gustura ikusiko nuke gure Ogasuna hain serio iruzurgile handien aurrean.
Zuhaitz onak fruitu onak ematen ditu. Gure administrazioaren zuhaitza fruitu txarrak ematen ari da azkenaldian. Ezjakintasuna ote? Inkonpetentzia ote? Edo intentzio txarra?
Askok itxi dute, eta gehiago etorriko dira gure Ogasunean haizeak aldatu ezean.
Hala ere, esan behar da herritarrak ere baduela bere erantzukizuna honetan guztian.
Zer gertatuko litzateke, gure erosketak gehienetan komertzio txikietan egitea erabakiko bagenu?
Gure eskuetan ez dagoena ez baitago gure esku, baina gure eskuetan dagoena…
Bihar eskudirutan, non egingo ditugu erosketak?
“Gure denda txikiak itxi eta itxi ari dira” ?
EZ !
Begira adibidez G1 sarearen garapena (https://t.me/G1Euskadi adibidez)!
Orain $i$temaren ‘denda txikiak’ dira, ZORITXARREZ!!
Aupa Poto.
Bikain azalduta berriz ere. Ez galdetu txorrada haueta geure iritzi sukaldari handiei edo Disney ezkerrari. Bizimodu esparruak estutzen ari zaizkigu abiada bizian, hor daude digitalizazio burokratikoa, eskudiruaren desagerpena eta autonomia posible guztien itolarria.
Eskerrak ultraeskuina behintzat ez dagoela agintean eta jarraitu dezakegula Euskal Herri antzua defendatzen plaza guztietan.